Mr. လံၣ် (Lee) တဂၤ တနာ်ဝဲ ကစၢ်ယွၤဘၣ်, ဒီးကစၢ်ယ့ၣ်ရှူး ဂဲၤဆၢထၢၣ်သမူထီၣ် က့ၤလၢတၢ်သံန့ၣ် တနာ်ဝဲဘၣ်. ဘၣ်ဆၣ်, အဝဲမ့ၢ် ပှၤကွဲးတၢ်ကစီၣ် လၢအအိၣ်ဒီးသးလၢအပဲာ်ထံနီၤဖးတၢ်တဂၤန့ၣ်လီၤ. ဖဲအမါစူၢ်က့ၤနာ်က့ၤ ကစၢ်ယ့ၣ်ရှူးန့ၣ်ဒီး, Mr. လံၣ် ပာ်လီၤအသးလၢ အနီၢ်ကစၢ်ဒၣ်ဝဲ ကဃုမၤလိသ့ၣ်ညါ အမါအတၢ်စူၢ်နာ်အသီအံၤ န့ၣ်လီၤ. တၢ်ဃုထံၣ်သ့ၣ်ညါ ခံနံၣ်ဝံၤအလီၢ်ခံန့ၣ်, Mr. လံၣ် တူၢ်လိာ်ဝဲဒၣ် ကစၢ်ယွၤ, ကစၢ်ယ့ၣ်ရှူးအတၢ်ဂဲၤထၢၣ်သမူထီၣ်က့ၤ, ဒီးစူၢ်က့ၤနာ်က့ၤကစၢ်ခရံာ်န့ၣ်လီၤ.
Mr. လံၣ် အတၢ်အိၣ်မူ ဆီတလဲအသးန့ၣ် အိၣ်ဖျါထီၣ်ဝဲဂ့ၤဂ့ၤန့ၣ်လီၤ. စှၤလါပူၤကွံာ်ဝံၤန့ၣ်, အဖိမုၢ် ၅ နံၣ် ဖိတဂၤ တဲဝဲဒၣ် အမိၢ်လၢ “မိမိၢ်ဧၢ, ယအဲၣ်ဒိးကစၢ်ယွၤ မၤတၢ်လၢယဂီၢ်, ဒ်အမၤဝဲဒၣ် ယပါပၢ်အဂီၢ်အသိးန့ၣ်လီၤ.” ဒီးလံၣ် စထရိဘဲၣ် (Lee Strobel) အဖိမုၣ်တဂၤအံၤ စူၢ်က့ၤနာ်က့ၤ ကစၢ်ယ့ၣ်ရှူးစ့ၢ်ကီးန့ၣ်လီၤ.
ပှၤအါဒံအါဂၤန့ၣ် တတူၢ်လိာ်ဝဲဒၣ် တၢ်ဂဲၤဆၢထၢၣ်သမူထီၣ်က့ၤအဂ့ၢ်ဘၣ်. ဘၣ်ဆၣ်, ပှၤအုၣ်သးလၢ အကြၢးတၢ်ယူးယီၣ်ပးကဲအီၤတဖၣ်န့ၣ် ထံၣ်ဝဲဒၣ် ကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤဝဲဒၣ်န့ၣ်လီၤ. မၤတၢ် ၂:၂၉ န့ၣ် ပှၤအုၣ်အသးအါဂၤအကျါ, အပျဲၢ်အဘီၣ် စီၤပ့းတရူး န့ၣ် စံးဘၣ် ပှၤဂီၢ်မုၢ်ဖးဒိၣ်လၢ စီၤပၤဒၤဝံးသံဝဲနီၢ်နီၢ် ဒီးဘၣ်တၢ်ခူၣ်လီၤအီၤန့ၣ်လီၤ. ဝံၤန့ၣ်ဒီး, အဆၢဖိ ၃၁ န့ၣ် စီၤပ့းတရူး ဒုးနဲၣ်ဝဲဒၣ် တၢ်လၢ စီၤဒၤဝံး စံးကတိၤဆိပာ်, ဒီးစံးဝဲ “(စီၤဒၤဝံး) ထံၣ်ပာ်ဝဲသတးဒီး, ကတိၤတၢ်လၢ ခရံာ်အတၢ်ဂဲၤဆၢထၢၣ်က့ၤအဂ့ၢ်,” န့ၣ်လီၤ. ဒီးအဆၢဖိ ၃၂ န့ၣ် စီၤပ့းတရူး မၤကတၢၢ်က့ၤဝဲလၢ “ယ့ၣ်ရှူးတဂၤအံၤလၢ ယွၤဒုးဂဲၤဆၢထၢၣ်က့ၤအီၤအဂ့ၢ်န့ၣ် ပဝဲဒၣ်ခဲလၢာ်အံၤ ပမ့ၢ်ပှၤအုၣ်အသး” န့ၣ်လီၤ.
တၢ်အုၣ်သးအဂ့ၤကတၢၢ် ဘၣ်ဃးဒီးတၢ်ဂဲၤထၢၣ်သမူထီၣ်အဂ့ၢ်န့ၣ် မ့ၢ်ဝဲဒၣ် ပှၤအုၣ်သးတဖၣ်အတၢ်အိၣ်မူ လၢဆီတလဲအသး, ပာ်ဃုာ်ဒီးစီၤပ့းတရူးန့ၣ်လီၤ.ဖဲကစၢ် ယ့ၣ်ရှူး ဘၣ်တၢ်ပျၤထီအီၤလၢ ထူၣ်စုညါအလိၤအကတီၢ်, အပျဲၢ်အဘီၣ်တဖၣ် အိၣ်ခူသူၣ်ဝဲဒၣ်န့ၣ်လီၤ. ယိၤ ၁၈:၁၅-၁၇, ၂၅-၂၇ ပာ်ဖျါဝဲလၢ စီၤပ့းတရူး သမၢဝဲဒၣ် ကစၢ်ခရံာ် နီၢ်နီၢ်န့ၣ်လီၤ. ဖဲအဝဲသ့ၣ်ထံၣ် ကစၢ်ယ့ၣ်ရှူး အိၣ်မူဝဲန့ၣ်ဒီး, တၢ်ဆီတလဲအသး ကိးမံၤဒဲးန့ၣ်လီၤ. တၢ်သူၣ်ဒူသးဒူ အိၣ်ပှဲၤဝဲဒီးအပျဲၢ်အဘီၣ်တဖၣ်အသးကံၢ်ပူၤ,ဒီးစးထီၣ် နီၤဟ့ၣ်လီၤ တၢ်မ့ၢ်တၢ်တီ ဘၣ်ဃးဒီးဟီၣ်ခိၣ်အတၢ်မုၢ်လၢ်ဖးဒိၣ်- လၢအမ့ၢ်ခရံာ်ကစၢ် ဂဲၤဆၢထၢၣ်သမူထီၣ်က့ၤလၢတၢ်သံအဂ့ၢ်န့ၣ်လီၤ.
