ရိး(စ) ထၢနၢၣ် (Rose Turner) မ့ၢ် တၢ်ကယၢက့ၢ်ဂီၤကျဲဒိ (Fashion) အပှၤကူၣ်သ့လၢသးဂ့ၢ်ပီညါတကပၤ, လၢဝ့ၢ်လိဒိၣ် တၢ်ကယၢက့ၢ်ဂီၤကျဲဒိ အခီလ့ၣ်ကၠိန့ၣ်လီၤ. အဝဲဃုသ့ၣ်ညါမၤလိဝဲလၢ တၢ်ကူတၢ်သိးတဖၣ် ကဲဘျုးဝဲဒၣ်တုၤလီၤတီၤလီၤလၢ ပှၤကညီတဖၣ်အတၢ်ဆိကမိၣ်, ဒီးအတၢ်ဟူးဂဲၤဒ်လဲၣ်, ဒီးတၢ်ကူတၢ်သိးတဖၣ် မၤဘျုးအဝဲသ့ၣ်အတၢ်ပာ်သူၣ်ပာ်သးထဲလဲၣ်အဂ့ၢ်န့ၣ်လီၤ. တၢ်ကူတၢ်သိးတဖၣ် လၢပနီၢ်ကစၢ်အလိၤန့ၣ် မ့ၢ်တၢ်လၢအိၣ်ဝဲဒၣ်အဘူးကတၢၢ်အသိး, ကဲထီၣ်ဝဲဒၣ် ပဖံးဘ့ၣ်ခံကလုာ်တလုာ်, ဒီး တၢ်ကမၤသးတမံၤဂ့ၤ, တမံၤဂ့ၤ ကတဲာ်ကတီၤန့ၢ်ပှၤလၢ မုၢ်တနံၤအဂီၢ်န့ၣ်လီၤ. အဒိန့ၣ်, တၢ်ကူထီၣ်သိးထီၣ် ဆ့ကူဆ့ကၤ အကြၢးအဘၣ်တမံၤန့ၣ် မၤစၢၤပှၤလၢ တၢ်ထိၣ်ဟူးထိၣ်ဂဲၤပှၤ, ဒီးပာ်ဖှိၣ်ပညိၣ်တၢ်သးစဲလၢ ပတၢ်ဖံးတၢ်မၤန့ၣ်လီၤ. ဒီးတၢ်ကူတၢ်သိး အလီၢ်လံၤလၢ အအိၣ်ဒီးတၢ်ကံးညာ်အကံၢ်စီဂ့ၤ, ဒီးပပာ်လုၢ်ပာ်ပှ့ၤအီၤတဖၣ်န့ၣ် ဟ့ၣ်ပှၤတၢ်သးမံ, ဖဲလၢပသးဘၣ်တံာ်တာ်အဆၢကတီၢ်န့ၣ်လီၤ.

တၢ်ပာ်သူၣ်ပာ်သး အတၢ်အိၣ်သးတမံၤအံၤ ဒုးထံၣ်ပှၤလၢ ကစၢ်ယ့ၣ်ရှူး လုၢ်ထီၣ်အသးသမူအတၢ်မၤအဂ့ၢ်, လၢဝံယရှါယၤ စံးကတိၤဆိပာ်ဝဲဒၣ်န့ၣ်လီၤ. ယရှါ ၆၁:၄ အပူၤန့ၣ် ဝံ ကွဲးနီၣ်ပာ်ဖျါဝဲလၢ ခါဆူညါန့ၣ် ပှၤယူဒၤဖိတဖၣ် ကဘၣ်တၢ်အုၣ်က့ၤခီၣ်က့ၤလၢ ဘၤဘူၤလိၣ်တၢ်စိာ်မၢကဲကုၢ်အလီၢ်, ဒီးမၤလီၤတံၢ်ဝဲဒၣ် ယွၤအပှၤဂီၢ်မုၢ်လၢ မုၢ်တနံၤန့ၣ် “အဝဲသ့ၣ်ကမၤက့ၤတၢ်အလီၢ်လီၤပှီၢ်လၢသီ, ဒီးကမၤထီၣ်က့ၤ တၢ်အိၣ်သယုၢ်လၢပျၢၤ” န့ၣ်လီၤ. ဖဲမုၢ်နံၤလၢအကဟဲဝဲတနံၤန့ၣ်, အဆၢဖိ ၁၀ ပာ်ဖျါဝဲလၢ အပှၤဂီၢ်မုၢ် ကကူသိးထီၣ် “ယွၤအတၢ်တီတၢ်လိၤအဆ့ဖးထီ” န့ၣ်လီၤ.

ဝံယရှါယၤ စံးကတိၤဆိပာ်ဝဲန့ၣ် လၢထီၣ်ပှဲၤထီၣ်ဝဲ အဆိကတၢၢ်, ဖဲယွၤအပှၤဂီၢ်မုၢ် ဟဲက့ၤကဒါဆူ ဝ့ၢ်ယရူၤရှလ့ၣ်, ဝံၤန့ၣ်ဒီး, လၢထီၣ်ပှဲၤထီၣ်လၢာ်လၢာ်ဆ့ဆ့ ဒ် ၂ ကရံၣ် ၅:၂၁ ပာ်ဖျါဝဲအသိး, ဖဲ “ကစၢ်ယွၤ ပာ်က့ၤအီၤ (ကစၢ်ယ့ၣ်ရှူး) လၢတၢ်ဒဲးဘးလၢပဂီၢ်, ဒ်သိးပကကဲလၢ ယွၤအတၢ်တီတၢ်လိၤလၢအပူၤ” န့ၣ်လီၤ. ဖဲပစူၢ်က့ၤနာ်က့ၤ ကစၢ်ခရံာ် တူၢ်သံအသးန့ၣ်ဒီး, တၢ်တီတၢ်လိၤ ပာ်ဖျါထီၣ်ဝဲ ပတၢ်ရ့လိာ်ဘၣ်ထွဲလိာ်သးအဂ့ၤအဘၣ်ဒီးယွၤန့ၣ်လီၤ. လၢပတၢ်ဒဲးဘးအဃိ, ကစၢ်ယွၤတထံၣ်ပှၤလၢ တၢ်မဲာ်ဆှးအကူအသိး အပူၤ, မ့တမ့ၢ် တၢ်လၢအတလီၤယူးယီၣ်တမံၤအသိးဘၣ်. လၢအလီၢ်န့ၣ်, ကစၢ်ယွၤထံၣ်ပှၤလၢ ပကူသိးဃာ် ကစၢ်ယ့ၣ်ရှူး အတၢ်တီတၢ်လိၤ လၢအအိၣ်စံာ်အိၣ်ကျၢၤ- ဖံးဘ့ၣ် ခံကလုာ်တကလုာ် လၢအကတဲာ်ကတီၤန့ၢ်ပှၤ တၢ်သးခု, လၢမုၢ်တနံၤအံၤ, ဒီးအစိၤစိၤအဃၣ်ဃၣ်အဂီၢ်န့ၣ်လီၤ.