ဘၣ်ဃးဒီးတၢ်ယူၢ်န့ၢ် “သးပ့ၤနီၣ်ယၤတဂ့ၤ” (Forget-me-not) ဖီဃံလၤဖိအမံၤအဂီၢ်န့ၣ် ပမှံၤပပှၢ်အတၢ်စံၣ်ဃဲၤအိၣ်ဝဲအါမးန့ၣ်လီၤ. လၢတၢ်ယုၢ်န့ၢ်မံၤ အတၢ်စံၣ်ဃဲၤအိၣ်အါမးအကျါ, လၢပျၢၤပှၤကၠ့ၢမဲဖိ အတၢ်စံၣ်ဃဲၤစ့ၢ်ကီး ပၣ်ဝဲဒၣ်န့ၣ်လီၤ. တၢ်စံၣ်ဃဲၤပူဖိအံၤ ပာ်ဖျါဝဲ, ဖဲကစၢ်ယွၤ ယုၢ်န့ၢ်ဝဲ တၢ်မုၢ်တၢ်ဘိလၢ အတ့လီၤဝဲခဲလၢာ်အမံၤန့ၣ်ဒီး, ဖီဆံးဆံးဖိတထံးန့ၣ် ဘၣ်ယိၣ်ဝဲလၢ ကဘၣ်တၢ်လဲၤကပာ်အီၤန့ၣ်လီၤ. လၢတၢ်န့ၣ်အဃိ, ဖီဖိန့ၣ် ကိးပသူထီၣ်ဝဲလၢ “အိကစၢ်ဧၢ, သးပ့ၤနီၣ်ယၤတဂ့ၤ” န့ၣ်လီၤ. ဒီးကစၢ်ယွၤ ယုၢ်န့ၢ်ဖီဖိအမံၤလၢ “Forget-me-not” န့ၣ်လီၤ.

တၢ်အံၤ မ့မ့ၢ်ဒၣ် တၢ်တဲတယုၢ်ဘၣ်ဆၣ်, ဖီဖိ “သးပ့ၤနီၣ်ယၤတဂ့ၤ” အံၤ ကဲထီၣ် တၢ်အဲၣ်, ဒီးတၢ်သ့ၣ်နီၣ်ထီၣ်က့ၤတၢ် အပနီၣ်တမံၤန့ၣ်လီၤ. နီၢ်နီၢ်န့ၣ်, တၢ်သးပ့ၤနီၣ်ပှၤန့ၣ် မ့ၢ်တၢ်ဒ်လဲၣ်န့ၣ် ပဝဲခဲလၢာ်, ပလဲၤခီဖျိသ့ၣ်ညါဝဲဒၣ်န့ၣ်လီၤ. တၢ်ကသ့ၣ်နီၣ်ထီၣ်က့ၤပှၤအဂီၢ်- လီၤဆီဒၣ်တၢ်, လၢယွၤကသ့ၣ်နီၣ်ပှၤအဂီၢ်န့ၣ် မ့ၢ်ပသးအတၢ်မိၣ်န့ၢ်သးလီတၢ်နီၢ်နီၢ်န့ၣ်လီၤ. တၢ်ဂ့ၢ်ဒ်သိးအံၤန့ၣ် ပထံၣ်ဘၣ် တၢ်ပျၢ်ထီ ကစၢ်ယ့ၣ်ရှူးလၢထူၣ်စုညါအလိၤအဂ့ၢ်န့ၣ်လီၤ. လူၤ ၂၃:၃၂ အပူၤန့ၣ် စီၤလူၤကၣ် စံးဘၣ်ပှၤလၢ “ဒီးတၢ်မိၤထီၣ်ဃုာ်ဒီးအီၤ (ယ့ၣ်ရှူး) စ့ၢ်ကီး ပှၤမၤအၢတၢ်ခံဂၤ ဒ်သိးအကဘၣ် တၢ်မၤသံအီၤ” န့ၣ်လီၤ. ဖဲအဝဲသ့ၣ်ဘၣ်တၢ်ပျၤထီအီၤဝံၤန့ၣ်, ပှၤမၤအၢတၢ်အိၣ်ဝဲလၢ ကစၢ်ယ့ၣ်ရှူး အကပၤတဂၤ, တကီၢ်ခါန့ၣ် သ့ၣ်ညါနၢ်ပၢၢ်ဝဲ တၢ်မၤအသးန့ၣ်လီၤ. ဒီးအဆၢဖိ ၄၂ န့ၣ် စံးဘၣ်ကစၢ်ယ့ၣ်ရှူးလၢ “ကစၢ်ဧၢ, တုၤနဟဲလၢ နဘီနမုၢ်အပူၤ ဒီး,သ့ၣ်နီၣ်ထီၣ်က့ၤယၤတက့ၢ်” န့ၣ်လီၤ. အဆၢဖိ ၄၃ န့ၣ် ကစၢ်ခရံာ် စံးဆၢဝဲလၢ “ယစံးဘၣ်နၤတီတီအံၤ, ခဲမုၢ်ဆါအံၤ နကအိၣ်ဒီးယၤလၢ ပၤရဒံစူးအပူၤလီၤ” န့ၣ် မ့ၢ်တၢ်လၢ ပသးပ့ၤနီၣ်အီၤတသ့ဘၣ်န့ၣ်လီၤ.

မ့ၢ်တၢ်အကတီၢ်ဖိလၢ အလီၤကမၢကမၣ်ဒိၣ်မးန့ၣ်လီၤ. ပှၤမၤအၢတဂၤအဂီၢ်, ဖဲတၢ်ခံးသူယိာ်ကတၢၢ်အကတီၢ်, တၢ်သ့ၣ်နီၣ်အီၤလၢ ယွၤအဖိခွါန့ၣ် မ့ၢ်တၢ်အခီပညီမနုၤလဲၣ်န့ၣ် မၤလိန့ၢ်ဝဲဒၣ်န့ၣ်လီၤ.

ဖဲပလိၣ်ဘၣ်တၢ်အကတီၢ်န့ၣ် ပဝဲနၤယၤစ့ၢ်ကီး ပဘၣ်တၢ်သ့ၣ်နီၣ်ပှၤန့ၣ်လီၤ. ကစၢ်ယွၤလၢအအဲၣ်ပှၤ တုၤဒၣ်လဲာ် အတူၢ်သံအသးလၢပဂီၢ်တဂၤန့ၣ် တသးပ့ၤနီၣ်ပှၤနီတဘျီဘၣ်န့ၣ်လီၤ.