တၢ်တကြၢးတနါအတၢ်မၤအါမံၤလၢ အဆှၢထံကီၢ်တဖၣ် ကဒုးလိာ်ယၤလိာ်အသးအကျါ, တၢ်ဒုးတၢ်ယၤ လၢကိၣ်ဘၢအဃိန့ၣ် ကမ့ၢ်တၢ်အနးကတၢၢ်တမံၤန့ၣ်ဧါ. ဖဲ ၁၈၃၂ နံၣ်န့ၣ်, ဖြ့ၣ်စ့ၣ် (France) ဒီးမဲးကစံၣ်ကိၣ် (Mexico) ထံကီၢ် ခံဘ့ၣ်အဘၢၣ်စၢၤ တၢ်ရ့လိာ်သး တမုာ်တလၤအကတီၢ်, ပှၤမဲးကစံၣ်ကိၣ်အသုး ခိၣ်နၢ်တဖု လဲၤဝဲဆူ ပှၤဖြ့ၣ်စ့ၣ် အကိၣ်ဘၢအကျး, လၢဝ့ၢ်မဲးကစံၣ်ကိၣ်အပူၤ, ဒီးဟံးန့ၢ်ဆူၣ်ဝဲဒၣ် ပှၤတ့ကိၣ် အတၢ်ပိးတၢ်လီခဲလၢာ်, ဒီးတဟ့ၣ်ဝဲ တၢ်အပှ့ၤကလံၤဘၣ်. တၢ်ဂ့ၢ်လီၤတံၢ်လီၤဆဲးတဖၣ်န့ၣ် ပံာ်ပူၣ်သဘံၣ်ဘုၣ်အသး, (ဒီးတၢ်ဃုတၢ်အ့ၣ်လိာ်အဂၤ ပာ်ဖှိၣ်အါထီၣ်တၢ်ကီတၢ်ခဲ) ဘၣ်ဆၣ်, ဖြ့ၣ်စ့ၣ်ဒီးမဲးကစံၣ်ကိၣ်တၢ်ဒုးတၢ်ယၤ အခီၣ်ထံးတဘျီ (the first Franco-Mexican War (၁၈၃၈-၃၉)- ဒီးဘၣ်တၢ်သ့ၣ်ညါ ဒ် “ကိၣ်ဘၢ တၢ်ဒုးတၢ်ယၤ” (Pastry War) ကဲထီၣ်ဝဲဒၣ်, ဒီးပှၤသုးဖိအဂၤအါန့ၢ်ဒံး ပှၤသၢကယၤန့ၣ် ဘၣ်သံဝဲန့ၣ်လီၤ. တၢ်သးဒိၣ်ကဲၤထီၣ်အကတီၢ်တစိၤဖိလၢအထိၣ်ဟူးထိၣ်ဂဲၤထီၣ် တၢ်ဒုးတၢ်ယၤန့ၣ် မ့ၢ်တၢ်လီၤသးအုးတမံၤန့ၣ်လီၤ.

ပှၤဟီၣ်ခိၣ်ဖိတဖၣ်အကျါ တၢ်သဘံၣ်ဘုၣ်အအါကတၢၢ်န့ၣ် မ့ၢ်တၢ်ဆီဟံၣ်ဆီဃီလၢ အဟးဂီၤတဖၣ်, ဒီးတၢ်ရ့တံၤရ့သကိးလၢ အဟးဂီၤတဖၣ်, အိၣ်ဟဲကဲထီၣ်အသး ခီဖျိလၢတၢ်ပၢၤဃာ် တၢ်သးဒိၣ်ကဲၤထီၣ်တန့ၢ်အဃိသ့ၣ်သ့ၣ်န့ၣ်လီၤ. တၢ်အဲၣ်လီၤသး, ဒီးတၢ်ဒုးနဲၣ်တၢ်စိတၢ်ကမီၤ, တၢ်တဘှါဆှဲမၤဂ့ၤ တၢ်နၢ်ပၢၢ်ကမၣ်တၢ်, တၢ်စံးကတိၤတဲဆါတၢ်, ဒီးတၢ်မၤဆၢစံးဆၢတၢ်အၢအၢသီသီ, ဒီးဃုတၢ်အ့ၣ်လိာ်ဆိးက့တဖၣ်ခဲလၢာ်န့ၣ် မ့ၢ်တၢ်လၢအတကြၢးတနါတဖၣ်န့ၣ်လီၤ. ပတၢ်ပာ်သူၣ်ပာ်သး မ့တမ့ၢ် ပတၢ်စံးဆၢမၤဆၢတၢ်တဖၣ် လၢအတအိၣ်ဒီးတၢ်သူၣ်ဆးသးဆးန့ၣ် ညီနုၢ်နဲၣ်ဆှၢပှၤဆူ တၢ်သးဒိၣ်ကဲၤထီၣ်လၢ အကမၤဟးဂီၤတၢ်တလီၢ်လီၢ်န့ၣ်လီၤ. ဘၣ်ဆၣ်, လံာ်စံၣ်တဲၤတဲလီၤတၢ် ၇:၉ န့ၣ် ဟ့ၣ်ထီၣ်ပှၤတၢ်ကူၣ်သ့, ဒီးပာ်ဖျါဝဲလၢ “သးထီၣ်ချ့တဂ့ၤ. အဂ့ၢ်ဒ်အံၤ, တၢ်သးထီၣ် အိၣ်ဝဲဆိးဝဲလၢပှၤဟးဂီၤဖိအသးနါပှၢ်အပူၤ” န့ၣ်လီၤ.

လီၤဆီဒၣ်တၢ်, ဖဲကစၢ်ယွၤ ဟ့ၣ်လီၤကျိၤကျဲဂ့ၤဒိၣ်တဘိ, ဒ်အဆၢဖိ ၅ ပာ်ဖျါဝဲအသိး, ခီဖျိလၢ “ပှၤကူၣ်တၢ်သ့အသိၣ်ဃီၣ်တၢ်” ဘၣ်ဆၣ်, တၢ်စံးဆၢမၤဆၢတၢ်ချ့, ဒီးတၢ်သးဒိၣ်ကဲၤထီၣ်ညီစံးတၢ်န့ၣ် မ့ၢ်တၢ်တကြၢးတနါတမံၤန့ၣ်လီၤ. တၢ်ဃုထံၣ်န့ၢ်တၢ်ကူၣ်သ့စံးတၢ်န့ၣ်, ဒ် ကလီး ၃:၁၅ ပာ်ဖျါဝဲအသိး, မ့ၢ်ဒၣ်ပကပျဲန့ၢ် “ခရံာ်အတၢ်ဃူတၢ်မုာ်ပၢတၢ်လၢပသးပူၤ” န့ၣ်လီၤ. ကစၢ်ယွၤ မ့ၢ်မၤစၢၤပှၤန့ၣ်ဒီး, ပအိၣ်မူအိၣ်ဂဲၤလၢ တၢ်ကူၣ်သ့, ဒီးတၢ်ပျဲပျၢ်ပှၤဂၤ အတၢ်ကမၣ်သ့ဝဲဒၣ်န့ၣ်လီၤ.