ခိၣ်နၢ်တၢ်အိၣ်ဖှိၣ်အဂီၢ်, ပထံၣ်လိာ်သး အတၢ်လီၢ်တၢ်ကျဲ, ဒီးတၢ်အိၣ်ဆိးအလီၢ်အကျဲ လၢ ခၠံၣ်ကၤကိၣ် (Chicago) အဝ့ၢ်ခၢၣ်သးန့ၣ် လီၤဆီလိာ်သးဒိၣ်မးဒီး တၢ်ဖှီၣ်တၢ်ယာ်လၢယထံၣ်ဘၣ်ယဲ ဖဲယလဲၤထီၣ်တၢ်အိၣ်ဖှိၣ် အတၢ်လဲၤကျဲအကတီၢ်န့ၣ်လီၤ. တၢ်ဖှီၣ်တၢ်ယာ်တမံၤအံၤ, ပၣ်ဃုာ်ဒီးပှၤတဂၤဘၣ်တဂၤ လၢအတအိၣ်ဒီးတၢ်လိၣ်အဂံၢ်ခီၣ်ထံးတဖၣ်, ဒ်အမ့ၢ် တၢ်အီၣ်တၢ်အီ, ဒီးတၢ်အိၣ်ဆိးအလီၢ်အကျဲန့ၣ်လီၤ. တၢ်လီၤဆီလိာ်သးတဖၣ်အံၤ ကဲထီၣ်တၢ်မၤစၢၤ, ဒ်သိးယထံၣ်န့ၢ်, ဒီးထိၣ်ဒွး တၢ်လၢပကဘၣ်ထၢနုာ်လၢ ပတၢ်ထံၣ်စိ, ပတၢ်တိာ်ကျဲၤလၢ ပကမၤတၢ်သးခုကစီၣ်လၢ ဝ့ၢ်မုၢ်အပူၤ, ဒီးလၢတၢ်လီၢ်အဂုၤအဂၤတဖၣ်, ဒ်သိးပကဒိးန့ၢ်တၢ်သးခုကစီၣ်အဂံၢ်ခီၣ်ထံးတဖၣ် (ဒ်သိးကကဲထီၣ်တၢ်မၤစၢၤလၢ တၢ်ဟ့ၣ်ခီရၤလီၤ ယွၤအတၢ်အဲၣ်, ဒီးအတၢ်အုၣ်က့ၤခီၣ်က့ၤ အတၢ်ကစီၣ်အဂီၢ်, ကယဲၢ်တၢ်တမံၤလၢ်လၢ် လၢယွၤဟ့ၣ်ပှၤ) ဆူတၢ်လီၢ်တဖၣ်လၢအလိၣ်ဘၣ်ဝဲ အဒိၣ်ကတၢၢ်န့ၣ်လီၤ.
ဖဲ စီၤပီလူး ကွဲးဝဲဆူ ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် လၢဝ့ၢ်ရိမ့ၤအကတီၢ်န့ၣ်, တလဲၤအိၣ်သကိးဘၣ်ဝဲဒံးဘၣ်ဆၣ်, အဲၣ်ဒိးလဲၤအိၣ်သကိးဝဲဒၣ်န့ၣ်, ရိမ့ၤ ၁:၁၁-၁၂ ပာ်ဖျါဝဲလၢ “တၢ်မိၣ်ထံၣ်ဘၣ်ယသးလၢသု, ဒ်သိးယကဟ့ၣ်သုလၢ တၢ်ဘျုးတမံၤမံၤ ဘၣ်ဃးဒီးသးန့ၣ် ဒ်သိးသုကအိၣ်ဂၢၢ်ဆိးကျၢၤလီၤ. ဒ်ပစံးတၢ်အသိး, တၢ်စူၢ်တၢ်နာ်လၢ သုဒီးယၤ ယၢ်ခီယၢ်ခီသတးဒီး, ယကဘၣ်တၢ်မၤမုာ်ထီၣ်ယသးသကိးဒီးသုလၢသုကျါ” န့ၣ်လီၤ. ပှၤတၢ်မၢဖိ မုၢ်လၢ်ကွၢ်စိဝဲ “တၢ်ခီလဲလိာ်သးတၢ်ဟ့ၣ်” လၢအကကဲဘျုးကဲဖှိၣ်လၢအဂီၢ်, ဒီးပှၤဂၤအဂီၢ်, ဒ်အဝဲသ့ၣ်ဃုထၢ အိၣ်မူလၢကစၢ်ယ့ၣ်ရှူးအဂီၢ်, ဒီးကမၤဂ့ၤ မၤစၢၤပှၤဂၤအဂီၢ်န့ၣ်လီၤ.
တၢ်အဂံၢ်ခီၣ်ထံးလၢ အအိၣ်ဒီးပှၤတဖၣ်န့ၣ် မ့ၢ်ဝဲသးအတၢ်ဟ့ၣ်တဖၣ်, ပၣ်ဃုာ်ဒီးတၢ်စုလီၢ်ခီၣ်ခိၣ်တဖၣ် လၢယွၤဟ့ၣ်ပှၤန့ၣ်လီၤ. ဒ်သိးပကဟ့ၣ်ခီဟ့ၣ်နီၤတၢ်သးခုကစီၣ် လၢတၢ်အဲၣ်အပူၤ, ဆူပှၤကညီတဖၣ်အဂီၢ်, မ်ပကပျဲလၢ ကစၢ်ယွၤကစူးကါပှၤန့ၣ်တက့ၢ်. ဒီးလၢတၢ်မၤဂ့ၤမၤစၢၤပှၤဂၤအဂီၢ်, ဒ်ယွၤဟ့ၣ်စိဟ့ၣ်ကမီၤပှၤအသိး, မ်ပကအိးထီၣ်ပသး, ပစု, ဒီးပထးခိၣ်တဖၣ်န့ၣ်တက့ၢ်. ဒ် အဆၢဖိ ၁၆ ပာ်ဖျါဝဲလၢ, “ယမဲာ်တဆှးဘၣ်လၢ ခရံာ်အတၢ်သးခုကစီၣ်ဘၣ်. အဂ့ၢ်ဒ်အံၤ, မ့ၢ်ယွၤအစိအကမီၤ လၢတၢ်အုၣ်က့ၤခီၣ်က့ၤ ကယဲၢ်ပှၤလၢအစူၢ်က့ၤနာ်က့ၤတၢ် ကိးဂၤဒဲးအဂီၢ်” အသိး, မ်ပကမၤသကိးတၢ်န့ၣ်တက့ၢ်.
