ပိးလီဖိအံၤ, မ့ၢ်ဒၣ်တၢ်ချံးအနး အလီၢ်လံၤဖီဃးဖိတဘ့ၣ်, ဒီးမ့ၢ်လၢတၢ်ဆၢကတီၢ်ယံာ်တ့ၢ်မးလံအဃိ, အလွဲၢ်တဖၣ်ဟးဂီၤလံန့ၣ်လီၤ. ဒီးနးအကနၣ်န့ၣ် ပိာ်, တအ့ၣ်လၢၤဘၣ်, ဒီးတၢ်ပဲာ်ပနီၣ်ဃာ်ဝဲ လၢအစုဖီၣ်န့ၣ်လီၤ. ဘၣ်ဆၣ်, နးဖိတဘ့ၣ်အံၤ မ့ၢ်ဝဲယပၢ်အတၢ်လုၢ်ဒိၣ်ပှ့ၤဒိၣ်အကျါတမံၤ, ဒီးပာ်ဝဲလၢတလါဖိတဖျၢၣ်အပူၤ, လၢအစိၤကျိးအဖီခိၣ်တုၤ အဟ့ၣ်လီၤယၤတစုန့ၣ်လီၤ. ယပၢ်ဒုးသ့ၣ်ညါယၤလၢ, “နးဖိတဘ့ၣ်အံၤ မ့ၢ်တၢ်စှၤမံၤအကျါတမံၤ, ယဒိးန့ၢ်ဝဲလၢ နဖုအအိၣ်” န့ၣ်လီၤ. ဖဲယပၢ်အသးစၢ်အကတီၢ်, ယဖုလဲၤပူၤကွံာ်ဟီၣ်ခိၣ်, ဒီးယပၢ်န့ၣ် မ့ၢ်လၢအပာ်လုၢ်ပာ်ပှ့ၤအပၢ်အဃိ, ပာ်လုၢ်ပာ်ပှ့ၤဝဲဒၣ် နးဖိတဘ့ၣ်အံၤန့ၣ်လီၤ.

လံာ်စီဆှံ ပာ်ဖျါဝဲလၢ ယွၤအိၣ်စ့ၢ်ကီးဒီးတၢ်လုၢ်ဒိၣ်ပှ့ၤဒိၣ်တမံၤသ့ၣ်သ့ၣ်, တၢ်လၢ ပတဆိကမိၣ်တ့ၢ်ဝဲန့ၣ်လီၤ. ဖဲလံာ်တၢ်လီၣ်ဖျါ အဆၢဒိၣ် ၄-၅ အပူၤန့ၣ်, ပကထံၣ်ဘၣ်လီၢ်ပစိာ်လၢမူခိၣ်, ဘၣ်တၢ်အိၣ်ဝးတရံးဃာ်အီၤလၢ “တၢ်အသးသမူအိၣ်လွံၢ်ဒု,” ဒီး “ပှၤသူၣ်က့သးပှၢ်ခံဆံလွံၢ်ဂၤ,” န့ၣ် ထိၣ်လီၤပှီၤအသးလၢ ကစၢ်ယ့ၣ်ရှူးအမဲာ်ညါ, ဒီးဘူၣ်ထီၣ် ဘါထီၣ်အီၤန့ၣ်လီၤ. လီၣ် ၅:၈ ပာ်ဖျါဝဲလၢ အဝဲသ့ၣ်တဂၤစူၢ်စူၢ်န့ၣ် “အိၣ်ဒီးလီခီထူတဖၣ် ပှဲၤဒီးတၢ်ဆိၣ်ကဲၤနၢမူလၢ အမ့ၢ်ပှၤစီဆှံအတၢ်ထုကဖၣ်” န့ၣ်လီၤ. လၢပျၢၤလၢသီ, တၢ်ဆိၣ်ကဲၤနၢမူန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်မးတမံၤ, မ့ၢ်တၢ်လၢစီၤပၤတဖၣ် စူးကါဝဲဒၣ် (ကွၢ်ဆိကမိၣ် တၢ်ဟ့ၣ်လီၤ ကစၢ်ယ့ၣ်ရှူးလၢ ထူ, လီၢ်ဘၣ် ဒီးမူရၣ်အဂ့ၢ် ဖဲမး ၂:၁၁ အပူၤ) န့ၣ်လီၤ. ဘၣ်တဘျီဘျီ, ပတၢ်ထုကဖၣ်တဖၣ်န့ၣ် ဖျါလၢအကါတဒိၣ်ဝဲဒၣ်သ့ၣ်သ့ၣ် လၢပဂီၢ်ဘၣ်ဆၣ်, ကစၢ်ယွၤအဲၣ်ဒိးဝဲလၢ ပကလဲၤစိာ်ထီၣ်ဆူအမဲာ်ညါထီဘိန့ၣ်လီၤ.

ကစၢ်ယ့ၣ်ရှူး အတၢ်အိၣ်မူလၢ အတအိၣ်ဒီးတၢ်ဒဲးဘး, ဒီးလၢတၢ်အဲၣ်ဘၣ်အဃိ, တူၢ်သံအသးလၢပဂီၢ်အဂ့ၢ်န့ၣ် လံာ်တၢ်လီၣ်ဖျါ (၅) ပညိၣ်ပာ်ဖျါဝဲ ကစၢ်ယ့ၣ်ရှူးအလုၢ်အပှ့ၤန့ၣ်လီၤ. ကစၢ်ယ့ၣ်ရှူးအလုၢ်အပှ့ၤန့ၣ် ဒုးနဲၣ်ပှၤလၢ ဘၣ်မနုၤအဃိယွၤပာ်လုၢ်ပာ်ပှ့ၤ ပတၢ်ထုကဖၣ်လဲၣ်န့ၣ်လီၤ. မ့ၢ်လၢပဝဲနၤယၤတဖၣ်န့ၣ် ပမ့ၢ်တၢ်လုၢ်ဒိၣ်ပှ့ၤဒိၣ်လၢယွၤအဂီၢ်အဃိ, ပတၢ်ထုကဖၣ်တဖၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢယွၤအဂီၢ်န့ၣ်လီၤ. ကစၢ်ယွၤ အဲၣ်ပှၤ, ခီဖျိတၢ်အဲၣ်လၢအစူးကွံာ်ညိကွံာ်အသး, တၢ်အဲၣ်လၢတၢ်ထိၣ်တဲာ် အလုၢ်အပှ့ၤတန့ၢ်တသ့, တၢ်အဲၣ်လၢအပှဲၤမးဒီးတၢ်သးကညီၤအဃိ, ဒ်သိးပကအိၣ်ဘူးဒီးအီၤ ခီဖျိလၢတၢ်ထုကဖၣ်အပူၤအဂီၢ်န့ၣ်, ကစၢ်ယွၤအသးအိၣ်ဝဲဒၣ်န့ၣ်လီၤ.