ဒ်အမ့ၢ်တၢ်ထုကဖၣ်အတၢ်စံးဆၢတမံၤန့ၣ်, အဲလဲး(စ) (Alex) အတၢ်ကူစါယါဘျါအမဲအဂီၢ်, တၢ်လၢာ်ဘူၣ်လၢာ်စ့ၤန့ၣ် လၢတၢ်တမုၢ်လၢ်ဘၣ်အပူၤ, ဘၣ်တၢ်ဟ့ၣ်န့ၢ်တ့ၢ်လံဝဲလၢ အတၢ်အုၣ်ကီၤစ့ပာ်ဖှိၣ်န့ၣ်လီၤ. ခဲကနံၣ်အံၤ, အလီၢ်အိၣ်ဝဲလၢ ကဘၣ်ကူစါယါဘျါအသး လၢခံတဘျီန့ၣ်လီၤ. အဲလဲး(စ) ကဒူးကဒ့ၣ်ဝဲဒၣ်လၢ “တၢ်ကူစါယါဘျါယသးအဂီၢ်, မ့ၢ်ယကလဲၤမၤန့ၢ်စ့ဖဲလဲၣ်” န့ၣ်လီၤ. တၢ်လၢာ်ဘူၣ်လၢာ်စ့ၤ အါအါဂီၢ်ဂီၢ်အဃိ, လၢအသးအတၢ်ဆိကမိၣ်အပူၤန့ၣ် အိၣ်ပှဲၤဝဲဒီးတၢ်သးဒိၣ်, တၢ်သးဟးဂီၤတဖၣ်န့ၣ်လီၤ.

ဘၣ်ဆၣ်, ဖဲတၢ်ဆၢကတီၢ်တုၤဃီၤဝဲလၢ ကဘၣ်ဟ့ၣ်လီၤဆိပာ် စ့ဆူ မဲကသံၣ် သရၣ်အအိၣ်န့ၣ်ဒီး, အဘူးအတံၢ်တဂၤ အတၢ်ဟ့ၣ်, လၢအမ့ၢ်ကျိၣ်စ့န့ၣ် ဟဲတုၤဝဲသတူၢ်ကလာ်န့ၣ်လီၤ. Alex စံးဝဲဒၣ်လၢ, “ယမဲာ်ဆှးလီၤယသးန့ၣ်လီၤ. ယထံၣ်တ့ၢ်လံလၢ ယွၤကတဲာ်ကတီၤန့ၢ်တၢ်လၢယဂီၢ် ခီဖျိတၢ်အုၣ်ကီၤအတၢ်ဟ့ၣ်လံ. တကြၢးလၢယကဒူးကဒ့ၣ်တၢ်ဘၣ်, မ့မ့ၢ်လၢတၢ်ကဒူးကဒ့ၣ်တၢ်အလီၢ်န့ၣ်, ယကြၢးဃ့ တၢ်မၤစၢၤလၢယွၤန့ၣ်လီၤ.”

၂ မိၤ ၁၄ ပာ်ဖျါဝဲ, ဖဲပှၤအံၣ်စရ့လးဖိတဖၣ်နုာ်လီၤဆူ ပှၢ်မုၢ်ကနၢရှုာ်အဆၢကတီၢ်, ပှၤဂီၢ်မုၢ်လဲၤခီဖျိဘၣ်ဝဲ ယွၤအတၢ်မၤထူၣ်ဖျဲး ဖဲပီၣ်လဲၣ်ဂီၤ ဝံၤသီသီဖိန့ၣ်လီၤ. ဘၣ်ဆၣ်,၂ မိၤ ၁၅:၂၂-၂၄ စံးဘၣ်ပှၤ, မ့ၢ်လၢပှၢ်မုၢ်ကနၢန့ၣ် ထံဧိၤနိဧိၤလၢကအီဝဲအဂီၢ် တအိၣ်ဘၣ်အဃိ, ပှၤဂီၢ်မုၢ်တဖၣ်ကဒူးကဒ့ၣ်တၢ်န့ၣ်လီၤ. ခဲကနံၣ်အံၤ, ဖျါလၢယွၤ အတၢ်မၤစၢၤလီၤလိၣ်လီၤလးန့ၣ် ဘၣ်တၢ်သးပ့ၤနီၣ်အီၤလံန့ၣ်လီၤ. ဧ့ၤဘြံၤကျိာ်တၢ်ကတိၤ “ကဒူးကဒ့ၣ်တၢ်” န့ၣ် မ့ၢ်တၢ်ပူထီၣ်ထီဒါယွၤန့ၣ်လီၤ. လၢတၢ်သူၣ်ဒိၣ်သးဖျိးအပူၤ ပှၤအံၣ်စရ့လးဖိတဖၣ် အတၢ်မၤဆၢက့ၤတၢ်န့ၣ် လီၤဆီလိာ်သးဒိၣ်မးဒီး စီၤမိၤရှ့ ဃ့တၢ်မၤစၢၤလၢကစၢ်ယွၤ, ဖျါဖဲ အဆၢဖိ ၂၅ န့ၣ်လီၤ. ဒီးလၢခံန့ၣ်, အဆၢဖိ ၂၅-၂၇ ပာ်ဖျါဝဲလၢ, အပှၤဂီၢ်မုၢ်အဂီၢ် ယွၤကတဲာ်ကတီၤန့ၢ်ထံအါအါဂီၢ်ဂီၢ်န့ၣ်လီၤ.

ဒ်စီၤမိၤရှ့မၤဝဲအသိး, ဖဲပလိၣ်ဘၣ်တၢ်အကတီၢ်တဖၣ်န့ၣ်, ခီဖျိလၢပဃ့ကစၢ်ယွၤအတၢ်မၤစၢၤ, ဒီးပဟးဆှဲးတၢ်စံးကတိၤကဒူးကဒ့ၣ်တၢ်သ့ဝဲဒၣ်န့ၣ်လီၤ. ယွၤအတၢ်မၤစၢၤကအိၣ်ဟဲဝဲဒၣ် ခီဖျိလၢကျဲလီၤလးတဖၣ်မ့ၢ်ဂ့ၤ, ခီဖျိလၢတၢ်ဟ့ၣ်မၤစၢၤလိၤလိၤမ့ၢ်ဂ့ၤ, ပှၤကညီတဖၣ်အတၢ်မၤစၢၤဆီၣ်ထွဲမ့ၢ်ဂ့ၤ, မ့တမ့ၢ် ဟ့ၣ်လီၤပှၤဂံၢ်ဘါလၢ ပတူၢ်န့ၢ်ခီၣ်တၢ်ကန့ၢ်အဂီၢ်မ့ၢ်ဂ့ၤန့ၣ်, ကစၢ်ယွၤနၢ်ဟူပှၤ, ဒီးသူၣ်အိၣ်သးအိၣ်ပှၤန့ၣ် ပနာ်န့ၢ်အီၤ သ့ဝဲဒၣ်န့ၣ်လီၤ.