ဖဲ ၁၉၆၀ နံၣ်န့ၣ်, အီးတိၣ် ပရဲမ့ကၠၢၣ် (Otto Preminger) ဒုးအိၣ်ထီၣ် တၢ်ကတိၤဂ့ၢ်လိာ် ခီဖျိလၢအတၢ်ဂီၤမူ “အဲးစ် စိဒၢးစ် (Exodus) န့ၣ်လီၤ. တၢ်ဂီၤမူအံၤ သန့ၤဝဲလၢ လံၣ်ယိၣ် ယူရံး(စ) (Leon Uris) အတၢ်ကွဲး, ဒီးတၢ်ကွဲးပူ ပာ်ဖျါထီၣ်ဝဲ, ဖဲတၢ်ဒုးဖးဒိၣ် ခံဘျီတဘျီဝံၤန့ၣ်, ပှၤယူၤဒၤဖိ ပှၤဘၣ်ကီဘၣ်ခဲတဖၣ်, သုးလီၢ်သုးကျဲနုာ်လီၤအိၣ်ဆိးလၢကီၢ်ပၤလၤစတဲၣ်အဂ့ၢ်, ဒီးလၢအတမ့ၢ်တၢ်မၤအသးနီၢ်နီၢ်န့ၣ်ဘၣ်. တၢ်ဂီၤမူအံၤကတၢၢ်ဝဲဒၣ်လၢ ယူရပၤ ယူဒၤမုၢ်ဖိဒီးပှၤအါရးပိာ်ခွါဖိ, ခံဂၤလိာ် ဘၣ်တၢ်မၤသံ, ဒီးဘၣ်တၢ်ခူၣ်လီၤ အဝဲသ့ၣ်လၢ တၢ်သွၣ်ခိၣ်တပူၤဃီ, လၢခံတၢ်လီၢ်လၢ အကကဲထီၣ်အံၣ်စရ့လးအကီၢ်န့ၣ်လီၤ.

ပရဲမ့ကၠၢၣ် ပာ်လီၤတဲာ်တ့ၢ်ဝဲလၢ ပကမၤကတၢၢ်တၢ်အဂီၢ်န့ၣ်လီၤ. မ့ၢ်က့ၢ်ဂီၤဒိလၢအအဲၣ်ဒိးပာ်ဖျါထီၣ် တၢ်သးဟးဂီၤ, ဘၣ်ထွဲဒီးတၢ်မံမီၢ်တမံၤလၢ အဘၣ်တၢ်ခူၣ်လီၤဘျၢလီၤအီၤန့ၣ်ဧါ. မ့တမ့ၢ်ဘၣ်ဒီး, ကမ့ၢ်တၢ်မုၢ်လၢ် အတၢ်ပနီၣ်တမံၤလၢ ပှၤခံကလုာ်လၢအအိၣ်ဒီးတၢ်သးဟ့, ဒီးတၢ်မၤဟးလီၤလိာ်သး လၢတၢ်စံၣ်စိၤတဲစိၤအပူၤန့ၣ် ပာ်ဖှိၣ်ထီၣ်အသး- လၢတၢ်သံဒီးတၢ်မူန့ၣ်ဧါ.

ဘၣ်သ့ၣ်သ့ၣ်, စီၤကိးရးအဖိခွါတဖၣ် လၢအကွဲး ထါစံးထီၣ်ပတြၢၤ ၈၇ န့ၣ် ကပတြၢၤဝဲ လၢထးအတၢ်ပာ်ဖျါ ခံထံၣ်တထံၣ်န့ၣ်လီၤ. အဝဲသ့ၣ် ဆၢမုၢ်လၢ်ဆိ တၢ်ဃူတၢ်မုာ်တမံၤ လၢပအိၣ်ခိးတ့ၢ်လံန့ၣ်လီၤ. အဆၢဖိ ၃ န့ၣ် အဝဲသ့ၣ် ကွဲးဖျါထီၣ် ဝ့ၢ်ယရူၤရှလ့ၣ်အဂ့ၢ်လၢ, “ပှၤကတိၤလၢနဂ့ၢ်နကျိၤန့ၣ် အိၣ်ဝဲဒီးအလၤကပီၤ, ယွၤအဝ့ၢ်ဧၢ” န့ၣ်လီၤ. အဝဲသ့ၣ် သးဝံၣ်ထီၣ် မုၢ်တနံၤအဂ့ၢ်, ဖဲပှၤကလုာ်တဖၣ်, အဆၢဖိ ၄ ပာ်ဖျါဝဲလၢ ရၤဃး (အဲၤကူပတူး), ဘၤဘူၤလိၣ်, ဖလ့ရှသး, စိၢ်, ဒီးကူၤရှးသ့ၣ်တဖၣ် လၢအအိၣ်ဒီး တၢ်စံၣ်စိၤတဲစိၤ လၢထီဒါဒုးလိာ်အသးဒီးပှၤယူၤဒၤဖိတဖၣ်န့ၣ် ကဟဲသကိးတပူၤဃီ လၢတၢ်သ့ၣ်ညါပာ်ပနီၣ်ယွၤ အမ့ၢ်အတီတဂၤန့ၣ်လီၤ. အဝဲသ့ၣ်, ကဘၣ်တၢ်နဲၣ်ဆှၢဆူ ဝ့ၢ်ယရူၤရှလ့ၣ်, ဒီးဆူကစၢ်ယွၤအအိၣ်န့ၣ်လီၤ.

ထါစံးထီၣ်ပတြၢၤ တယုၢ်အံၤ ကတၢၢ်ဝဲလၢ တၢ်စံးထီၣ်ပတြၢၤမၤလၤကပီၤတၢ်န့ၣ်လီၤ. အဆၢဖိ ၇ စံးဘၣ်ပှၤလၢ ပှၤဝ့ၢ်ယရူၤရှလ့ၣ်ဖိတဖၣ် ကသးဝံၣ် “ယထံထီၣ်ပၢၢ်အလီၢ် အိၣ်ဝဲလၢနပူၤခဲလၢာ်လီၤ” န့ၣ်လီၤ. အဝဲသ့ၣ် မ့ၢ်သးဝံၣ်စံးထီၣ်ပတြၢၤ မတၤတဂၤအဂ့ၢ်န့ၣ်လဲၣ်. ယိၤ ၄:၁၄ ပာ်ဖျါဝဲ ပှၤလၢအမ့ၢ် ထံမူ, သးသမူခဲလၢာ်အဂံၢ်ထံးတဂၤအဂ့ၢ်န့ၣ်လီၤ. ထဲကစၢ်ယ့ၣ်ရှူးတဂၤဧိၤန့ၣ်, မ့ၢ်ပှၤလၢအကဟဲစိာ် တၢ်မုာ်တၢ်ပၢၤ, ဒီးတၢ်ဃူတၢ်ဖိး အထူအယိာ်သ့ဝဲဒၣ်န့ၣ်လီၤ.