မ့ၣ်အူအီၣ် ဘၣ်လ်စိရၣ် ဘျၢထံသရိာ် လၢာ်စီကွံာ်န့ၣ်လီၤ. ဖဲမ့ၣ်အူလၣ်လီၤပံာ်ဝဲအကတီၢ် ဂ့ၢ်ဂီၤအူ ပှၤမၤတၢ်ဖိ, ဒီးတၢ်အိၣ်ဖှိၣ်ဖိတဖၣ် ပာ်ဖှိၣ်ထီၣ်သးန့ၣ်ဒီး, လၢတၢ်ကမၢကမၣ်အပူၤ အဝဲသ့ၣ် ထံၣ်ဝဲ သွဲၣ်လး ထူၣ်စုညါတထူၣ် အိၣ်ဆၢထၢၣ်ဘျၢဘျၢ လၢမ့ၣ်အူလုၢ်, ဒီးဖၣ်ကမူၣ်အကျါန့ၣ်လီၤ. ပှၤမၤသံမ့ၣ်အူဖိတဂၤ စံးဝဲလၢ, မ့ၣ်အူ “အီၣ်လၢာ်ကွံာ် တၢ်သူၣ်ထီၣ်ဘၣ်ဆၣ်, ထူၣ်စုညါန့ၣ် တအီၣ်ဝဲဘၣ်. တၢ်အံၤ မ့ၢ်တၢ်ဟ့ၣ်ပလီၢ်တမံၤလၢ တၢ်သူၣ်ထီၣ်န့ၣ် မ့ၢ်ဒၣ်တၢ်သူၣ်ထီၣ်န့ၣ်လီၤ.
မ့မ့ၢ် တၢ်အိၣ်ဖှိၣ်တခီ မ့ၢ်ယွၤအပှၤဂီၢ်မုၢ်တဖၣ် အတၢ်ပာ်ဖှိၣ်ထီၣ်သးန့ၣ်လီၤ.”
တၢ်အိၣ်ဖှိၣ်စံးတၢ်န့ၣ် တမ့ၢ်တၢ်သူၣ်ထီၣ်တဖျၢၣ်ဘၣ်, မ့ၢ် ပှၤတဝၢဖိတဖၣ်ပာ်ဖှိၣ်ထီၣ်သးလၢ ကစၢ်ခရံာ် အထူၣ်စုညါအဖီလာ်, ကစၢ်လၢအသံ, ဒီးဘၣ်တၢ်ခူၣ်လီၤ, ဒီးဂဲၤဆၢထၢၣ်သမူထီၣ်က့ၤတဂၤန့ၣ်လီၤ. မးသဲ ၁၆:၁၈ ပာ်ဖျါဝဲ ဖဲကစၢ်ယ့ၣ်ရှူး အိၣ်မူအိၣ်ဂဲၤလၢဟီၣ်ခိၣ်ချၢအကတီၢ်, ကစၢ်ယ့ၣ်ရှူး စံးဘၣ် စီၤပ့းတရူးလၢ ကသူၣ်ထီၣ် ဟီၣ်ခိၣ်ဒီဘ့ၣ် တၢ်အိၣ်ဖှိၣ်, ဒီးတၢ်မၤဟးဂီၤတၢ်အိၣ်ဖှိၣ်အံၤ တန့ၢ်ဘၣ်န့ၣ်လီၤ. ကစၢ်ယ့ၣ်ရှူး ကပာ်ဖှိၣ်ထီၣ် ပှၤစူၢ်က့ၤနာ်က့ၤတၢ်တဖၣ်လၢ ဟီၣ်ခိၣ်ဒီဘ့ၣ်, ဒီးကရူၢ်တဖု လၢအကအိၣ်ဂၢၢ်ဆိးကျၢၤ လီၤစိၤအဂီၢ်န့ၣ်လီၤ. ပှၤတဝၢအံၤ ကဘၣ်ကွၢ်ဆၢၣ်မဲာ် တၢ်ကီတၢ်ခဲ နးနးကျံးကျံးဘၣ်ဆၣ်, အဝဲသ့ၣ် တူၢ်ခီၣ်ဝဲဒၣ် ကန့ၢ်န့ၣ်လီၤ. အ့းဖ့း ၂:၂၂ ပာ်ဖျါဝဲလၢ ကစၢ်ယွၤ ကအိၣ်ဆိးလၢ အဝဲသ့ၣ် အသိးအကျါ, ဒီးကဟံးဃာ်ပၢၤဃာ် အဝဲသ့ၣ်န့ၣ်လီၤ.
ဖဲပဂုာ်ကျဲးစၢးသူၣ်ထီၣ် လီၢ်ကဝီၤ တၢ်အိၣ်ဖှိၣ်တဖၣ်, ဒီးတၢ်အိၣ်ဖှိၣ်တဖၣ် တဂၢၢ်တကျၢၤ, တၢ်ဂုၢ်ထီၣ်ပသီထီၣ်တအိၣ်, ဖဲတၢ်သူၣ်ထီၣ်တဖၣ် မ့ၢ်ဘၣ်တၢ် မၤဟးဂီၤ, မ့တမ့ၢ်ဘၣ်ဒီး, ဖဲပဘၣ်ယိၣ်တၢ်လၢ ပှၤစူၢ်က့ၤနာ်က့ၤတၢ်ဖိ, လၢအဘၣ်အိၣ်မူဟူးဂဲၤ လၢဟီၣ်ခိၣ်ချၢ တၢ်လီၢ်အဂုၤအဂၤတဖၣ်အဂီၢ်, ပသ့ၣ်နီၣ်ထီၣ်က့ၤသ့ဝဲလၢ ပကစၢ်ယ့ၣ်ရှူးန့ၣ် မူဝဲ, ဒီးလၢတၢ်သးဆူၣ်အပူၤ ကတဲာ်ကတီၤန့ၢ် ယွၤအပှၤဂီၢ်မုၢ်တဖၣ် တူၢ်ခီၣ်တၢ်ကန့ၢ်အဂီၢ်န့ၣ်လီၤ. ပမ့ၢ် တၢ်အိၣ်ဖှိၣ်အက့ၢ်အဂီၤလၢကစၢ်ယ့ၣ်ရှူးသူၣ်ထီၣ်ဝဲလၢ မုၢ်မဆါတနံၤအံၤန့ၣ်လီၤ. ကစၢ်ယ့ၣ်ရှူးအိၣ်ဒီးပှၤ, ဒီးအဝဲမ့ၢ်ဝဲဒၣ်ပဂီၢ်န့ၣ်လီၤ. အထူၣ်စုညါ အိၣ်ဂၢၢ်ဆိးကျၢၤဝဲဒၣ်န့ၣ်လီၤ.
