ပှၤအိၣ်ဝဲတဂၤ, ဖဲလၢပှၤတနီၤဘူးထီၣ်ကသံန့ၣ် ပှၤဒိးလဲအီၤ, ဒီးဟ့ၣ်အီၤအဘူးအလဲ ဒ်သိးကပာ်ဖျါထီၣ် တၢ်ခူသူၣ်တဖၣ်လၢ အဝဲသ့ၣ် ကျဲးစၢးပာ်ခူသူၣ်ဝဲ လၢအိၣ်မူဒံး အကတီၢ်, ဖဲတၢ်ခူၣ်လီၤပှၤသံအကတီၢ်န့ၣ်လီၤ. ဖဲတၢ်ကတိၤစံးပတြၢၤအူးထီၣ် ပှၤသံ အကတီၢ်န့ၣ် အဝဲနုာ်လီၤ မၤတံၤတာ်ဝဲဒၣ်န့ၣ်လီၤ. ဖဲပှၤကတြီအီၤန့ၣ်ဒီး တဲဝဲ တၢ်ဘူၣ်တၢ်ဘါခိၣ်နၢ်လၢ ကဆ့ၣ်နီၤန့ၣ်လီၤ. တဘျီဃီန့ၣ် ဆၢထၢၣ် ပာ်ဖျါထီၣ်ဝဲ ပှၤလၢတလါ (ကျုာ်) ပူၤတဂၤအံၤ, တဘျီန့ၣ် မၤနၢၤတ့ၢ် တၢ်တၤကျိၣ်စ့ (lotto) ဘၣ်ဆၣ် တဒုးသ့ၣ်ညါဝဲ ပှၤနီတဂၤဘၣ်, ဒီးလၢနံၣ်အဆံတဖၣ်န့ၣ် ပာ်မၤအသးဒ်ပှၤမၤန့ၢ်အီၣ်ကဲတၢ်လၢ ပနံာ်ကၤအတၢ်မၤတဂၤအသိးန့ၣ်လီၤ. အါစုအါဘျီ ပှၤလၢအဘၣ်တၢ်ဒိးလဲတဂၤအံၤ ဘၣ်အၢၣ်လီၤန့ၢ်ဝဲ တၢ်အဲၣ်ဘၢမါအဲၣ်ဘၢဝၤဆူ မုၣ်ကမဲ, ခွါကမဲန့ၣ်လီၤ. ပှၤတဂၤဂၤ အတၢ်သံကွၢ်ကအိၣ်ဝဲလၢ တၢ်မၤအံၤ ကမ့ၢ်တၢ်ဃုအဘျုးဒၣ်ဝဲအဂီၢ်, မ့တမ့ၢ် ကမ့ၢ် တၢ်မၤလၢ တၢ်စူၢ်တၢ်နာ်အဂ့ၤအဂီၢ်ဧါန့ၣ်လီၤ. ဘၣ်ဆၣ် တၢ်လၢအဖျါလီၤတံၢ်တမံၤန့ၣ် ပှၤတဖၣ် သူၣ်ဝံၤသၣ်စ့ၤလၢ တၢ်ကပျၢ်န့ၢ် ခါလၢအပူၤကွံာ် တၢ်ဒဲးဘးတဖၣ်န့ၣ်လီၤ.

ပအိၣ်ဒီးပှၤတဂၤဂၤ, လၢကအၢၣ်လီၤ ပတၢ်ဒဲးဘးအဂီၢ် (လီၤဆီဒၣ်တၢ် ဖဲပသံဝံၤ အလီၢ်ခံ) န့ၣ် မ့ၢ်တၢ်မၤလၢအခီပညီတအိၣ်, ဒီးမ့ၢ်တၢ်ဘှါဆှဲ ပတၢ်ခူသူၣ်တဖၣ်လၢအလီၤဘၣ်ယိာ်န့ၣ်လီၤ. ဘၣ်ဆၣ်တၢ်ဂ့ၢ်တဖၣ်အံၤ လီၣ်ဖျါထီၣ် တၢ်မ့ၢ်တၢ်တီအဒိၣ်အယိာ်တမံၤ, လၢအမ့ၢ်, အလီၢ်အိၣ်လၢပကဘၣ်အၢၣ်လီၤ ပတၢ်ကမၣ်, တၢ်မၤဖှံထီၣ် ပတၢ်ဝံဃၢအဂီၢ်န့ၣ်လီၤ. တၢ်အၢၣ်လီၤ ပတၢ်ကမၣ်န့ၣ် မၤကဆှီထီၣ်က့ၤပှၤလၢ တၢ်လၢပပာ်ခူသူၣ်အီၤ, ဒီးတၢ်လၢအဒၢဖံထီၣ်ဘျါဘၢန့ၣ်လီၤ. ယၤ ၅:၁၆ အပူၤန့ၣ် စီၤယၤကိာ် စံးဝဲ, “တဲာ်လီၤ ကျဲၤလီၤလိာ်သုတၢ်သရူးတၢ်ကမၣ်သကိးသကိး, ဒီးဘါထုကဖၣ်လိာ် သုဂီၢ်သကိးသကိး ဒ်သိးသုကဘျါက့ၤတက့ၢ်” န့ၣ်လီၤ. တၢ်အၢၣ်လီၤ ပတၢ်ကမၣ်န့ၣ် မၤဖှံထီၣ် တၢ်ဝံတၢ်ယိးလၢအစၢဃာ်ပှၤ, အိးထီၣ်ပသူၣ်ပသး လၢတၢ်ဃ့ထုကဖၣ်တၢ်ဆူကစၢ်ယွၤ, ဒီးဆူပတၢ်စူၢ်တၢ်နာ်အတဝၢပူၤအဂီၢ်, ဟ့ၣ်ပှၤတၢ်သဘျ့လၢ ပကရ့လိာ်သးဒီးယွၤန့ၣ်လီၤ. တၢ်တဲာ်လီၤကျဲၤလီၤပတၢ်ဒဲးဘးန့ၣ် ဒုးအိၣ်ထီၣ် တၢ်မၤဘျါက့ၤတၢ်န့ၣ်လီၤ.

စီၤယၤကိာ် ကွဲဃီၤပှၤလၢ ပကအိၣ်မူ အိၣ်ဖျိအိၣ်ဖျါ, ဒီးတၢ်ကွဲန့ၢ်လွဲန့ၢ်ပှၤလၢ တၢ်ပာ်ခူသူၣ် ပတၢ်ဘၣ်ဒိဆါတဖၣ်, ဒီးပတၢ်လီၤတူာ်လီၤကာ်တဖၣ်န့ၣ် ပကအၢၣ်လီၤပာ်ဖျါထီၣ် ဆူကစၢ်ယွၤ, ဒီးဆူပှၤအိၣ်ဘူးကတၢၢ်တဖၣ်န့ၣ်လီၤ. တမ့ၢ်လၢ ပကဘၣ်ဟးဝံတၢ်ဃၢတဖၣ်အံၤ ထဲတဂၤဧိၤန့ၣ်ဘၣ်. တၢ်အၢၣ်လီၤ ပတၢ်ကမၣ်န့ၣ် မ့ၢ်တၢ်ဟ့ၣ်တမံၤလၢပဂီၢ်, ဒီးယွၤကသူအီၤလၢ တၢ်မၤကဆှီပသူၣ်ပသး, ဒီးတၢ်မၤပူၤဖျဲးပှၤအဂီၢ်န့ၣ်လီၤ.