တၢ်ဘျၣ်တဂၤ ဟဲနုာ်ဆူၣ်လီၤဆူ ပှၤဘှီလီတဲစိ အကျးတဖျၢၣ်, ဒီးတီၢ်သဘှံး မဲာ်ထံကလၤအတလါ လၢပှၤဒုးနဲၣ်တၢ်, ဒီးစးထီၣ်ထၢနုာ်လီတဲစိတဖၣ်ဆူအထၢၣ်ပူၤ န့ၣ်လီၤ. အဝဲ မၤဘၢအမဲာ်သၣ်လၢ တလါစးခိအတီၣ်တဖျၢၣ် ဒီးကျဲးစၢးပာ်ခူသူၣ် အတၢ်မ့ၢ်တၢ်လၢ တၢ်ဒိတၢ်ဂီၤဒၢလၢ အကွၢ်ဟုၣ်ကွၢ်စုာ်တၢ် (Surveillance camera) န့ၣ်လီၤ. ဘၣ်ဆၣ်, ဖဲအဟုၣ်တၢ်အဖၢမုၢ်န့ၣ်, တလါဒ့ခံအသးတစိၢ်ဖိ, ဒီးအမဲာ်သၣ်အိၣ်ဖျါထီၣ်အသးန့ၣ်လီၤ. စှၤမံးနံးလဲၤပူၤကွံာ်ဝံၤ, ကျးကစၢ်ထံၣ် တၢ်ဂီၤမူလၢပှၤဟုၣ်တၢ်, ဒီးကိးဝဲပၢၤကီၢ်, ဒီးပှၤဖီၣ်န့ၢ်တၢ်ဘျၣ်အံၤလၢ ကျးအိၣ်ဘူးတဖျၢၣ်အမဲာ်ညါန့ၣ်လီၤ. တၢ်ဘျၣ်အံၤအဂ့ၢ်န့ၣ် ဒုးသ့ၣ်နီၣ်ထီၣ်က့ၤပှၤ, ကယဲၢ်တၢ်ဒဲးဘးလၢအဘၣ်တၢ်ပာ်ခူသူၣ်တဖၣ်န့ၣ် မုၢ်တနံၤ ကဘၣ်တၢ်မၤဖျါထီၣ်က့ၤန့ၣ်လီၤ.
တၢ်ဂုာ်ကျဲးစၢးပာ်ခူသူၣ် ပတၢ်ဒဲးဘးတဖၣ်န့ၣ် မ့ၢ်ဒၣ်ပှၤကညီအန့ဆၢၣ် န့ၣ်လီၤ. ဘၣ်ဆၣ် ဖဲလံာ်ပှၤစံၣ်တဲၤတဲလီၤတၢ် ၁၂:၁၄ အပူၤန့ၣ်, ပကဖးဘၣ်လၢ ပဂ့ၤပိာ်ထွဲယွၤအတၢ်မၤလိာ်တဖၣ်, အဂ့ၢ်ဒ်အံၤ, ကယဲၢ်တၢ်ပာ်ခူသူၣ်ဃာ်တၢ်ခဲလၢာ်, ကဘၣ်တၢ်ဟဲစိာ်အီၤဆူ ယွၤအတၢ်ထံၣ်အတီအလိၤ, ဒီးအတၢ်စံၣ်ညီၣ်တီန့ၣ်လီၤ. ဖဲအဆၢဖိ ၁၃ န့ၣ်, ပှၤကွဲးလံာ်စံးဝဲဒၣ်လၢ, “ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ် မ့ၢ်ပှၤကညီအတၢ်ခဲလၢာ်လီၤ.” ၃ မိၤရှ့ ၄:၁၃ ပာ်ဖျါဝဲဒၣ်လၢ တၢ်တသ့ၣ်ညါ တၢ်မၤလိာ်အထံၣ်တဆံအဃိ, မ့ၢ်လဲၤခီပတာ်ဘၣ်ဝဲဒီးပာ်ခူသူၣ်ဝဲဒၣ်လဲာ်န့ၣ် တပူၤဖျဲးဒီးယွၤအတၢ်ခံကွၢ်စီၤကွၢ်တၢ်န့ၣ်ဘၣ်. ဂ့ၤမ့ၢ်ဂ့ၤ, အၢမ့ၢ်ဂ့ၤန့ၣ်, ယွၤကဟဲစိာ်တၢ်မၤကိးမံၤဆူတၢ်စံၣ်ညီၣ်န့ၣ်လီၤ. ဘၣ်ဆၣ်, အ့း ၂:၄-၅ စံးဘၣ်ပှၤ, မ့ၢ်လၢကစၢ်ယ့ၣ်ရှူးအဘျုးအဖှိၣ်အဃိ, ပဃုထံၣ်န့ၢ်တၢ်ပျၢ်ပတၢ်ဒဲးဘးတဖၣ် ခီဖျိလၢကစၢ်ယ့ၣ်ရှူး ဒီးအတၢ်ဟ့ၣ်လီၤအသးလၢပဂီၢ်အပူၤန့ၣ်လီၤ.
ပမ့ၢ်အိၣ်ဒီးသးအတၢ်သ့ၣ်ညါ, ဒီးဟံးဃာ်ဂၢၢ်ကျၢၤယွၤအတၢ်မၤလိာ်တဖၣ် လၢပသးကံၢ်ပူၤန့ၣ်ဒီး, တၢ်မၤအံၤကနဲၣ်ဆှၢပှၤဆူတၢ်ပျံၤယွၤ လၢတၢ်ယူးယီၣ်အပူၤ, ဒီးတၢ်အိၣ်မူအက့ၢ်အဂီၤလၢ အလီၤပလိာ်သးတၢ်ဘၣ်ယွၤအသးန့ၣ်လီၤ. ဒ်သိးဒီး ပသးကကလၢၢ်ဘၣ်ယွၤအသး လၢအအဲၣ်တၢ်, ဒီးလၢအတၢ်ပျၢ်ပတၢ်ဒဲးဘး အသီတဘျီအဂီၢ် မ်ပကဟဲစိာ်ပတၢ်ဒဲးဘးတဖၣ်ဆူအအိၣ်န့ၣ်တက့ၢ်.
