“ယမ့ၢ်ဘၣ်စံးကတိၤတီတီန့ၣ်, ယသးဘၣ်ဖှီၣ်ယဲန့ၣ်လီၤ. ပှၤတအဲၣ်ဒိးရ့တံၤရ့သကိးဒီးယၤနီတဂၤဘၣ်, ဒီးပှၤထဲတဂၤဧိၤ လၢအဒိကနၣ်ယတၢ်ကတိၤတဖၣ်စ့ၢ်ကီး တအိၣ်လၢၤဘၣ်. ယဘၣ်ဟီၣ်ယဲ ကိးမုၢ်နံၤဒဲးန့ၣ်လီၤ,” ဒ်သိးကပာ်ဖျါထီၣ်ဝဲ အတၢ်သူၣ်အုးသးအုးအဂီၢ်, သးစၢ်မုၢ်ဖိ အဲလံၣ် (Allie), ကွဲးလီၤ လံာ်မဲာ်ဖျၢၣ်တဖၣ်အံၤ လၢသ့ၣ်ဘ့ၣ်ဘၣ်တဘ့ၣ်အလိၤ, ဒီးဘျးလီၤဝဲလၢ ဖီကရၢၢ်အပူၤန့ၣ်လီၤ.

ဖဲပိာ်မုၣ်တဂၤ ထံၣ်ဘၣ်ဝဲတၢ်ကွဲးအံၤဒီး, ဟဲစိာ် ဟီၣ်ခိၣ်ဝါလၢအထံၣ်ဝဲလၢ ပှၤဟးထီၣ်ဟးလီၤတၢ်အကျဲ ဆူဖီကရၢၢ်, ဒီးဃ့ကညးဝဲပှၤဂုၤပှၤဂၤ, ဒ်သိးကကွဲးပာ်ဖျါထီၣ်အဝဲသ့ၣ် အတၢ်ထံၣ် ဘၣ်ထွဲဒီး အဲလံၣ် န့ၣ်လီၤ. တၢ်ကွဲးဟ့ၣ်ဂံၢ်ဟ့ၣ်ဘါ “ပအဲၣ်ဘၣ်နၤလီၤ,” “ကစၢ်ယွၤအဲၣ်နၤ,” “နဘၣ်တၢ်အဲၣ်နၤကွံနၤ” လၢအဆံဘျဲၣ်တဖၣ်န့ၣ်, ဘၣ်တၢ်ကွဲးန့ၣ်အီၤလၢ လၢကၠိဖိတဖၣ် လၢအအိၣ်ဘူးဒီးဖီကရၢၢ်အံၤန့ၣ်လီၤ. ကၠိခိၣ်ပာ်ဖျါထီၣ်ဝဲလၢ, “တၢ်မၤအံၤမ့ၢ်ကျိၤကျဲဖိတဘိလၢ ပကတုၤဃီၤအီၤ, ဒီးကဲထီၣ်တၢ်မၤစၢၤသ့ဝဲဒၣ်လၢ တၢ်မၤပှဲၤတၢ်လီၤဟိလၢအဂီၢ်န့ၣ်လီၤ. မ့ၢ်လၢ ပဝဲအါဒံအါဂၤ, ဘၣ်တဘျီဘျီန့ၣ်, ပဝဲကိးဂၤ ပကလဲၤခီဖျိဘၣ် တၢ်သူၣ်အုးသးအုး, ဒီးတၢ်နးတၢ်ဖှီၣ်အဃိ, အဲလံၣ်မ့ၢ် ပဝဲခဲလၢာ်အခၢၣ်စးန့ၣ်လီၤ.”

တၢ်ကတိၤတကျိၤဖိလၢအစံး, “နဘၣ်တၢ်အဲၣ်နၤကွံနၤ” န့ၣ် ဒုးသ့ၣ်နီၣ်ထီၣ်က့ၤယၤလၢတၢ်ဆိၣ်ဂ့ၤဃံလၤတထံၣ်, ဖျါဖဲ ၅ မိၤ ၃၃:၁၂ အပူၤ, တချုးဖဲစီၤမိၤရှ့ သံဝဲန့ၣ်, ကတိၤလီၤတၢ်ဆူအံၣ်စရ့လး ၁၂ ဒူၣ်အကျါတဒူၣ် လၢအမ့ၢ် ဘံၣ်ယၤမံၣ် အဒူၣ်, ဒီးစံးဝဲ “ပှၤလၢ ယွၤအဲၣ်အီၤ ကအိၣ်ဝဲလၢ အဃၢၤခၢၣ်သနၢၣ်” န့ၣ်လီၤ. လၢကစၢ်ယွၤအဂီၢ် စီၤမိၤရှ့ မ့ၢ်ခိၣ်နၢ်ဂံၢ်ဆူၣ်ဘါဆူၣ်တဂၤ, မၤနၢၤဒုၣ်ဒါအထံကီၢ်တဖၣ်, တူၢ်လိာ် တၢ်မၤလိာ်အထံၣ်တဆံ, ဒီးတၤပှၤဂီၢ်မုၢ်တဖၣ် ဒ်သိးကပိာ်ကစၢ်ယွၤအခံန့ၣ်လီၤ. စီၤမိၤရှ့ ပာ်တ့ၢ်ဝဲကစၢ်ယွၤ အတၢ်ထံၣ်လၢအပှၤဂီၢ်မုၢ်အလိၤန့ၣ်လီၤ. မ့ၢ်လၢ ယိၤ ၃:၁၆ အပူၤန့ၣ် ကစၢ်ယ့ၣ်ရှူး စံးဝဲ “ယွၤအဲၣ်ဟီၣ်ခိၣ်ဖိ, တုၤအဟ့ၣ်လီၤ(ပှၤလၢ) အဖိခွါအိၣ်တဂၤဃီ” အဃိ, တၢ်ကတိၤ “ဘၣ်တၢ်အဲၣ်” အံၤန့ၣ်, တၢ်စူးကါအီၤသ့စ့ၢ်ကီးလၢပဂီၢ်န့ၣ်လီၤ.

ကစၢ်ယွၤ မၤစၢၤပှၤ ဒ်သိးပကအိၣ်ကဒု, အိၣ်ဘံၣ်အိၣ်ဘၢလၢအတၢ်မ့ၢ်တၢ်တီ, လၢအမ့ၢ် ကယဲၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးတဂၤလၢ်လၢ်န့ၣ် မ့ၢ်ပှၤလၢ “ဘၣ်တၢ်အဲၣ်အီၤ” အဃိ, ဒ်အဲလံၣ် အတံၤသကိးအသီဖိတဖၣ် မၤဝဲအသိး, ပကအဲၣ်ပှၤဂုၤပှၤဂၤအဂီၢ်န့ၣ် ပတုၤအိၣ်ဃီၤသ့ဝဲဒၣ်န့ၣ်လီၤ.