ဖဲ ၂၀၀၅ နံၣ်န့ၣ်, ကဲးတြံနၣ် ကလံၤမုၢ်ဖးဒိၣ်မၤဟးဂီၤတၢ်ဝံၤ, တၢ်သူၣ်ထီၣ်က့ၤ ဝ့ၢ် နယူအီၣ်လ့ ကယီၤကယီၤန့ၣ်လီၤ. တၢ်လီၢ်တၢ်ကျဲတဖၣ် လၢအဘၣ်ဒိဘၣ်ထံး အါကတၢၢ်အကျါ တတီၤန့ၣ် မ့ၢ်ဝဲ လီၢ်ကဝီၤ (၉) လာ်တကပၤ, ဒီးပှၤအိၣ်ဆိးဖဲန့ၣ်တဖၣ် ကလံၤမုၢ် ကဲးတြံနၣ် လဲၤပူၤဝဲအါနံၣ်အါလါအပူၤဒၣ်လဲာ်, တဒိးန့ၢ်ဘၣ် တၢ်စုလီၢ်ခီၣ်ခိၣ်အဂံၢ်ထံးတဖၣ်ဒံးဘၣ်န့ၣ်လီၤ. တၢ်အိၣ်သးအံၤ ကဆီတလဲအသးအဂီၢ် ဘၢနၢၣ် ခီးလိ (Burnell Cotlon) မၤဝဲဒၣ်န့ၣ်လီၤ. ကလံၤမုၢ်လီၤဝံၤ ဖဲလါနိၣ်ဝ့ဘၢၣ် ၂၀၁၄ နံၣ်န့ၣ်, အဝဲအိးထီၣ် တၢ်ဆါတၢ်ပှ့ၤအကျးအဆိကတၢၢ်တဖျၢၣ်လၢ လီၢ်ကဝီၤ (၉) လာ်တကပၤအံၤန့ၣ်လီၤ. လၢခံန့ၣ်, ခီးလိ ပာ်ဖျါထီၣ်က့ၤဝဲလၢ, “ဖဲယပှ့ၤတၢ်သူၣ်ထီၣ်အံၤန့ၣ်ဒီး, ပှၤအါဂၤ ဆိကမိၣ်ဝဲလၢယပျုၢ်”န့ၣ်လီၤ. ဘၣ်ဆၣ်, “ပှၤလၢအဟဲပှ့ၤတၢ်အဆိကတၢၢ်တဂၤန့ၣ်, ဆိကမိၣ်ဝဲလၢ ပှၤအိၣ်ဆိးလၢအကပီၢ်အကပၤတဖၣ် တမ့ၢ် ကဟဲက့ၤလၢၤဘၣ်အဃိ, ဟီၣ်ဘၣ်အသးန့ၣ်လီၤ.” ခီးလိ အမိၢ် စံးဝဲဒၣ်, “တၢ်လၢ ယတထံၣ်ဘၣ်န့ၣ် ယဖိခွါထံၣ်စိဝဲလီၤ. ဒီးဟံးန့ၢ်ဝဲ တၢ်ခွဲးတၢ်ယာ်အံၤအဃိ ယသးခုဘၣ်ယဲန့ၣ်လီၤ.”

ဖဲတၢ်ဘၣ်ကွၢ်ဆၢၣ်မဲာ်ဒီးတၢ်ဟးဂုၢ်ဟးဂီၤအကတီၢ်, ခါဆူညါအတၢ်မုၢ်လၢ်လၢ ပှၤတဆိကမိၣ်ပာ်အီၤတမံၤ ကဟဲအိၣ်ထီၣ်ဝဲဒၣ်န့ၣ် ကစၢ်ယွၤ ဒုးထံၣ်ဝဲ ဝံယရှါယၤန့ၣ်လီၤ. ယရှါ ၄၁:၁၇ ပာ်ဖျါထီၣ် ဝံအတၢ်ထံၣ်, “ပှၤဘၣ်နးဘၣ်ဖှီၣ် ဒီးပှၤဖှီၣ်ဖိယာ်ဖိ ဃုထံဒီး တအိၣ်ဘၣ်” န့ၣ်လီၤ. အဆၢဖိ ၁၈ န့ၣ်, ကစၢ်ယွၤ အၢၣ်လီၤဝဲ “ယကပာ် ပှၢ်မုၢ်ကနၢလၢ ထံနိၣ်တပူၤ, ဒီးဟီၣ်ခိၣ်ဃ့န့ၣ်လၢ ထံထီၣ်ပၢၢ်တဖၣ်လီၤ” န့ၣ်လီၤ. လၢတၢ်သၣ်ဝံၤ, ဒီးတၢ်သးသူထံအလီၢ်န့ၣ်, ဖဲအပှၤဂီၢ်မုၢ်လဲၤခီဖျိဘၣ်ဝဲ တၢ်ဘီၣ်ထီၣ် ညီထီၣ်ကဒီးတဘျီ, ဒီးဒ်အဆၢဖိ ၂၀ စံးဝဲအသိး, အပှၤဂီၢ်မုၢ်ကသ့ၣ်ညါက့ၤဝဲလၢ “ယွၤအစုမၤတၢ်န့ၣ်…….တ့လီၤဝဲလီၤ” န့ၣ်လီၤ.

ကစၢ်ယွၤ မ့ၢ်ဒံးဒၣ်ကစၢ်လၢ အသူၣ်ထီၣ်က့ၤတၢ်, မၤဝဲဒံးတၢ်လၢ အကဟဲစိာ်န့ၢ် ခါဆူညါတၢ်ကမၤအသး ဒ် ရိ ၈:၂၁ ပာ်ဖျါဝဲ “တၢ်ဘၣ်တ့ဒၣ်လဲာ်န့ၣ် ကထူၣ်ဖျဲးဒီး တၢ်အုၣ်တၢ်ကျၣ်အတၢ်ကဲကုၢ်” န့ၣ်လီၤ. ဖဲပနာ် ဒီးသန့ၤ ပသးလၢ ကစၢ်ယွၤအတၢ်ဂ့ၤတၢ်ဝါန့ၣ်ဒီး, ယွၤကမၤစၢၤပှၤ ဒ်သိးပကထံၣ် ခါဆူညါတၢ်ကမၤအသး, တၢ်မုၢ်လၢ်လၢအကဲထီၣ်လိၣ်ထီၣ်သ့ဝဲဒၣ်န့ၣ်လီၤ.