တနံၣ်ဘၣ်တနံၣ်စုာ်စုာ်အတီၢ်ပူၤန့ၣ်, ပှၤကညီနီၣ်ဂံၢ်အါန့ၢ် အကကွဲၢ်ခံကယၤ, လၢတၢ်စူၢ်တၢ်နာ်အကလုာ်အကလုာ်န့ၣ်, လဲၤသကိးဝဲ တၢ်ဘူၣ်တၢ်ဘါအတၢ်လဲၤတဖၣ်န့ၣ်လီၤ. လၢနံၣ်ဧိၤလါဧိၤတဖၣ်အပူၤန့ၣ်, ပှၤလဲၤဘူၣ်လဲၤဘါတၢ်တဂၤ အတၢ်မၤမ့ၢ်ဝဲ တၢ်လဲၤဆူ တၢ်လီၢ်စီဆှံတတီၤ ဒ်သိးကဒိးန့ၢ် တၢ်ဆိၣ်ဂ့ၤတမံၤမံၤအဂီၢ်န့ၣ်လီၤ. တၢ်မၤအံၤကမ့ၢ် တၢ်လဲၤဆူတၢ်လုၢ်ဟံၣ်, တၢ်ဘါယွၤသရိၣ်ဖးဒိၣ်, တၢ်လီၢ်စီဆှံ မ့တမ့ၢ် တၢ်လီၢ်ဂုၤဂၤတတီၤတီၤ, လၢတၢ်ကဒိးန့ၢ် တၢ်ဆိၣ်ဂ့ၤတမံၤမံၤအဂီၢ်န့ၣ်လီၤ.
ဘၣ်ဆၣ်, လၢကီၢ်ဘရံးတ့ၣ်, စဲလ်တ့း ခရံာ်ဖိတဖၣ် အတၢ်ထံၣ်တၢ်ဘူၣ်တၢ်ဘါ အတၢ်လဲၤန့ၣ် တဒ်သိးလိာ်အသးဒီးပှၤအဂၤတဖၣ်န့ၣ်ဘၣ်. အဝဲသ့ၣ် စးထီၣ်လဲၤတၢ်ဆူသ့ၣ်ပှၢ်, ပှၢ်မုၢ်ကနၢအပူၤ လၢအတအိၣ်ဒီး တၢ်နဲၣ်ကျဲ, မ့တမ့ၢ် ဒိးထီၣ်ချံ ဒီးထိၣ်လီၤထွံအီၤလၢပီၣ်လဲၣ်ပူၤ, ဖဲပီၣ်လဲၣ်မိၢ်ပှၢ်ထံကျိၤ ကစိာ်ဆှၢဝဲ တၢ်လီၢ်တတီၤဂ့ၤတတီၤဂ့ၤ- အဝဲသ့ၣ်အဂီၢ်, တၢ်ဘူၣ်တၢ်ဘါအတၢ်လဲၤ မ့ၢ်တၢ်နာ်ကစၢ်ယွၤ, ဖဲကီၢ်/လီၢ်ကဝီၤ လၢအတညီနုာ်ဒီး အဝဲသ့ၣ်န့ၣ်လီၤ. မ့ၢ်လဲၤတုၤတၢ်လီၢ်တတီၤတီၤမး, ကထံၣ်န့ၢ်ဝဲ တၢ်ဆိၣ်ဂ့ၤတမံၤမံၤန့ၣ် တမ့ၢ်ဘၣ်. မ့မ့ၢ်လၢတၢ်လဲၤကျဲဒီဘိညါစ့ၢ်ကီး ကထံၣ်န့ၢ်တၢ်ဆိၣ်ဂ့ၤန့ၣ်လီၤ.
လံာ်ဧ့ၤဘြံၤ အဆၢဒိၣ် ၁၁ န့ၣ် မ့ၢ်လံာ်စီဆှံတတီၤ, အကါဒိၣ်ဝဲလၢ ပှၤစဲလ်တ့းဖိ တဖၣ်အဂီၢ်န့ၣ်လီၤ. အဆၢဖိ ၁၃-၁၆ ပာ်ဖျါဝဲ တၢ်အိၣ်မူလၢကစၢ်ခရံာ်အပူၤ စံးတၢ်န့ၣ် မ့ၢ်တၢ်ပာ်တ့ၢ်ကွံာ် ဟီၣ်ခိၣ်အကျိၤအကျဲတဖၣ်, ဒီးအတၢ်လဲၤဖးယံၤဖးထီ ဆူယွၤအဝ့ၢ်, ဒ်ပှၤထံဂၤကီၢ်ဂၤဖိအသိး- တၢ်ဘူၣ်တၢ်ဘါအတၢ်လဲၤအံၤ, အကလုၢ်သီၣ်ထွဲက့ၤလၢ သးသမူအတၢ်လဲၤန့ၣ်လီၤ. အဆၢဖိ ၁-၁၂ ပာ်ဖျါဝဲ, ခီဖျိတၢ်နာ်သန့ၤအသးလၢကစၢ်ယွၤ ကဆီၣ်ထွဲမၤစၢၤ ကျဲလၢပှၤတညီနုာ်လဲၤ အတၢ်ကီတၢ်ခဲတဖၣ်အဃိဒီး, ဒ်ပှၤဒူပှၤဃိၤလၢပျၢၤတဖၣ် အိၣ်မူပာ်ဖျါ အတၢ်စူၢ်တၢ်နာ်အသိး ပှၤလဲၤတၢ်ဖိအံၤ ကဒိၣ်ထီၣ်ဝဲန့ၣ်လီၤ.
တၢ်ဘူၣ်တၢ်ဘါအတၢ်လဲၤန့ၣ် ပနီၢ်ကစၢ်ဒၣ်ဝဲပမၤဂ့ၤ, ပတမၤဂ့ၤ, တၢ်လၢပမၤလိန့ၢ်တၢ်တမံၤန့ၣ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, တၢ်အိၣ်မူမ့ၢ် တၢ်ဘူၣ်တၢ်ဘါ အတၢ်လဲၤဆူ ကစၢ်ယွၤ အမူခိၣ်ဘီမုၢ်, ဒီးတၢ်လဲၤအံၤ ကအိၣ်ပှဲၤဒီးပှၢ်ယိာ်ခံးသူတဖၣ်, တၢ်စုကတၢၢ်ခီၣ်ကတၢၢ်, ဒီးတၢ်မၤကွၢ်သ့ၣ်တဖၣ်န့ၣ်လီၤ. ဖဲပလဲၤတၢ်လဲၤအံၤန့ၣ်ဒီး, လၢပတၢ်လဲၤကျဲဒီတကတီၢ်အပူၤ, တၢ်သးပလၢၢ်ဘၣ်တၢ်ဆိၣ်ဂ့ၤလၢကစၢ်ယွၤ ဟ့ၣ်မၤစၢၤပှၤန့ၣ် မ်ပသုတပျဲလဲၤပူၤကွံာ်အီၤတဂ့ၤ.
