ယီ(န်), ပှၤဒိးလဲအသးလၢ တၢ်သူၣ်တၢ်ဖျးအတၢ်မၤတဂၤန့ၣ်, ပှၤတဆိကမိၣ်ဒိၣ်အီၤလၢ အတၢ်ဂ့ၤကအိၣ်အါအါဘၣ်. အဝဲမ့ၢ်အိၣ်ဒီး မဲာ်ချံအတၢ်ထံၣ်အဂံၢ်ဘါစၢ်, ဒီးနီၢ်ခိတၢ်ဂံၢ်စၢ်ဘါစၢ်ဒၣ်လဲာ်, ဖဲအတူၢ်ဘၣ် တၢ်ဆါတၢ်ကွဲဒီးမံဝဲတန့ၢ် တဘျီလၢ်လၢ်န့ၣ် ဟ့ၣ်လီၤအသး, ဒီးဃ့ထုကဖၣ်တၢ်မုၢ်နၤအါမး လၢအပှၤသဝီၤဖိတဖၣ်အဂီၢ် လၢကီၢ်နီဝ့ၣ်အပူၤန့ၣ်လီၤ. လၢအတၢ်ထုကဖၣ်အပူၤန့ၣ်, ဃ့ထုကဖၣ်ဝဲဟံၣ်တဖျၢၣ်ဘၣ်တဖျၢၣ်, ယၢၤထီၣ်ဝဲဟံၣ်ဖိ ဃီဖိတဂၤစုာ်စုာ်အမံၤ, တုၤဒၣ်လဲာ် ဖိဒံဖိသၣ်လၢ အတထံၣ်လိာ်သးဒံးဘၣ်ဒီးအီၤတဖၣ်အဂီၢ်န့ၣ်လီၤ. ပှၤအါဒံအါဂၤ, အဲၣ်ဘၣ် အတၢ်ပာ်သူၣ်ပာ်သး ကပုာ်လူးဖိ, ဒီးဃုထံၣ်န့ၢ် အတၢ်ကူၣ်သ့, ဒီးတၢ်ဟ့ၣ်ကူၣ်န့ၣ်လီၤ. ဖဲအမၤစၢၤပှၤဂၤ မ့ၢ်တသ့လ့တုၤလ့တီၤဘၣ်ဆၣ်, ဖဲပှၤသဝီတဖၣ်က့ၤဝဲဒၣ်န့ၣ်ဒီး, အဝဲသ့ၣ် ဒိးန့ၢ်ဘၣ် ယီ(န်) အတၢ်အဲၣ်တၢ်ကွံအဃိဒီး, အသးကလၢၢ်ဘၣ်တၢ်ဆိၣ်ဂ့ၤန့ၣ်လီၤ. ဒီးဖဲ ယီ(န) အသးသမူ ဟးထီၣ်ဝံၤန့ၣ်, အဟံၣ်ဖိဃီဖိတအိၣ်နီတဂၤဒၣ်လဲာ်, တၢ်ခူၣ်လီၤအီၤအတၢ်ရဲၣ်တၢ်ကျဲၤန့ၣ် ဘၣ်တၢ်မၤအီၤအဒိၣ် ကတၢၢ် လၢပှၤတဝၢအပူၤန့ၣ်လီၤ. ယီ(န) အတၢ်ထုကဖၣ် ဖီထီၣ်ဖးထီၣ် သူထီၣ်သၣ်ထီၣ် ဒီးဒိးန့ၢ်တၢ်စံးဆၢအါအါဂီၢ်ဂီၢ် တုၤဒၣ်လဲာ် အလဲၤတလၢကွံာ် တၢ်လၢအဆိကမိၣ်တ့ၢ်ဝဲန့ၣ်လီၤ.
ပှၤလၢအဆီၣ်လီၤသးတဂၤအံၤ အိၣ်မူပိာ်ထွဲ ပှၤတၢ်မၢဖိ စီၤပီလူး အဒိဂ့ၤတဲာ်ဘၣ်, လၢအအဲၣ်ဘၣ်, ပှၤတဖၣ်လၢအမၤဝဲတၢ်ခ့တၢ်ပှၤအတၢ်မၤ, ဒီးတုၤဒၣ်လဲာ် လီၤဘၣ်ဃိာ်အဆၢကတီၢ်န့ၣ် ဃ့ထုကဖၣ်တၢ်လၢအဝဲသ့ၣ်အဂီၢ်န့ၣ်လီၤ. အ့းဖ့း ၁:၁၇-၁၈ ပာ်ဖျါဝဲ, ဖဲအဘၣ်တၢ်ဒုးဃာ်လၢ ဝ့ၢ်ရိမ့ၤအဃိာ်သ့ၣ်သ့ၣ်န့ၣ်, အဝဲကွဲးလီၤ လံာ်ပရၢဆူ အ့းဖ့းစူးပှၤစူၢ်က့ၤနာ်က့ၤတၢ်တဖၣ်, ဒီးဃ့ထုကဖၣ်ဝဲလၢ ကစၢ်ယွၤကဟ့ၣ်လီၤ “သးဘၣ်ဃးဒီး တၢ်ကူၣ်သ့ကူၣ်ဘၣ်, ဒီးတၢ်လီၣ်ဖျါလၢ တၢ်သ့ၣ်ညါထံ” ဆူအဝဲသ့ၣ်, ဒီးအဝဲသ့ၣ် သးအမဲာ်ချံ ကအိၣ်ဒီး “တၢ်သ့ၣ်ညါနၢ်ပၢၢ်” အဂီၢ်န့ၣ်လီၤ. စီၤပီလူးဆၢမုၢ်လၢ်ဝဲလၢ အဝဲသ့ၣ် ကသ့ၣ်ညါ ကစၢ်ယ့ၣ်ရှူး, ဒီးခီဖျိသးစီဆှံအစိကမီၤန့ၣ် ကအိၣ်မူအိၣ်ဂဲၤ လၢတၢ်အဲၣ်တၢ်ကွံ, ဒီးလၢတၢ်ဃူတၢ်ဖိး, လၢတၢ်သးတဖျၢၣ်ဃီအပူၤန့ၣ်လီၤ.
ယီ(န်) ဒီး ပှၤတၢ်မၢဖိ စီၤပီလူး ဂၢ်လီၤအသးဆူ ကစၢ်ယွၤအအိၣ်, ဟ့ၣ်လီၤအသး, ခီဖျိဃ့ထုကဖၣ်တၢ်လၢ ပှၤလၢအအဲၣ်ဘၣ်ဝဲတဖၣ်အဂီၢ် ဒီးမၤတၢ်ခ့တၢ်ပှၤ အတၢ်မၤ, ဆူကစၢ်ယွၤအအိၣ်န့ၣ်လီၤ.တနံၤအံၤ, မ့ၢ်ပကအဲၣ်တၢ်ကွံတၢ်ဒ်လဲၣ်, ဒီးပှၤဂုၤပှၤဂၤအဂီၢ် မ့ၢ်ပကမၤတၢ်ခ့တၢ်ပှၤအတၢ်မၤဒ်လဲၣ်န့ၣ်, မ်ပကဆိကမိၣ်ထီၣ် အဝဲသ့ၣ်အတၢ်ဟ့ၣ်ဒိတဲာ်ဂ့ၤတဖၣ်န့ၣ်တက့ၢ်.
