အီးစံၣ်အိလၣ် မဲးကၣ်ထံၣ် (Oseola McCarty) မ့ၢ်ပိာ်မုၣ်လၢ အဆှုၣ်တၢ်တဂၤ ကျဲးစၢးဂဲၤလိာ်မၤဝဲပှၤဆှုၣ်တၢ်အတၢ်မၤ ဒ်အမ့ၢ်, တၢ်ဒံးဒူး, တၢ်မၤဃ့ထီက့ၤ, ဒီးတၢ်ထူးဘျ့ဆ့ကူဆ့ကၤ, ယၣ်တၢ်ကံးညာ်တဖၣ်, ဘၣ်မၤဝဲလၢအစု အနံၣ်နွံဆံအတီၢ်ပူၤ, ဒီးအကတၢၢ်န့ၣ်, ဖဲအသးအိၣ် ၈၆ နံၣ်န့ၣ် ကအိၣ်ဘှံးလၢတၢ်မၤအဂီၢ် အကတီၢ်ဘၣ်လံန့ၣ်လီၤ. အဝဲမၤတၢ်နံၣ်တဖၣ်အံၤအပူၤ, ကျိၣ်စ့လၢအမၤန့ၢ်တဖၣ်အကျါ တၢ်လၢအပာ်ဖှိၣ်ဝဲတနီၤန့ၣ်, ဟ့ၣ်လီၤမၤဘူၣ်ဝဲဆူ ကၠိဖိလၢအလိၣ်ဘၣ်တဖၣ်အဂီၢ်, လၢတၢ်ကဒုးအိၣ်ထီၣ် တၢ်မၤစၢၤစ့ပာ်ကီၤ (scholarship) န့ၣ်လီၤ. အဝဲဟ့ၣ်မၤဘူၣ် စ့ဒီလၣ် ၁၅၀,၀၀၀ ဆူဖၠၣ်စိမိၤလၢ အိၣ်ဘူးဒီးအီၤတဖျၢၣ်အဃိ, ကဲထီၣ်တၢ်ကမၢကမၣ်လၢအပှၤတဝၢအပူၤန့ၣ်လီၤ. အဝဲတၢ်စူးကွံာ်ညိကွံာ်သး တၢ်ဟ့ၣ်အံၤ ထုးန့ၢ်သူၣ်န့ၢ်သး ကမျၢၢ်လၢအကယၤတဖၣ်အကယၤ လၢကဟ့ၣ်မၤဘူၣ်စ့ၢ်ကီးတၢ်အဃိ, စ့ပာ်ကီၤန့ၣ် ထီၣ်ဘးဝဲတုၤ သၢစးန့ၣ်လီၤ.

အီးစံၣ်အိလၣ် သ့ၣ်ညါနၢ်ပၢၢ်ဝဲ အတၢ်စုလီၢ်ခီၣ်ခိၣ် အလုၢ်အပှ့ၤနီၢ်နီၢ်န့ၣ် တမ့ၢ်လၢတၢ်ကဘၣ်စူးကါအီၤလၢ အနီၢ်တဂၤအတၢ်ဘၣ်ဘျုးအဂီၢ်န့ၣ်ဘၣ်. မ့မ့ၢ်ကဘၣ်ကဲထီၣ် တၢ်ဆိၣ်ဂ့ၤလၢ ပှၤဂၤအဂီၢ်န့ၣ်လီၤ. ၁ တံၤ ၆:၁၈ အပူၤန့ၣ် ပှၤတၢ်မၢဖိ စီၤပီလူး ကွဲးဟ့ၣ်သဆၣ်ထီၣ် စီၤတံၤမသ့းလၢ, ကဟ့ၣ်ဂံၢ်ဟ့ၣ်ဘါ ပှၤထူးပှၤတီၤ ဒ်သိးက “ထူးထီၣ် တီၤထီၣ်လၢ တၢ်မၤဂ့ၤတဖၣ်” အဂီၢ်န့ၣ်လီၤ. ပဝဲတဂၤစုာ်စုာ်, ယွၤဟ့ၣ်လီၤပှၤ တၢ်ထူး တၢ်တီၤ, ကျိၣ်စ့ မ့ၢ်ဂ့ၤ တၢ်စုလီၢ်ခီၣ်ခိၣ်ဂုၤဂၤမ့ၢ်ဂ့ၤ ဒ်သိးပကပၢၤဃာ်အီၤအဂီၢ်န့ၣ်လီၤ. အဆၢဖိ ၁၇ ပာ်ဖျါဝဲ, လၢတၢ်နာ်န့ၢ် ပစုလီၢ်ခီၣ်ခိၣ်တဖၣ်အလီၢ်န့ၣ်, စီၤပီလူး ဟ့ၣ်ပလီၢ်ပှၤလၢ ပကဘၣ်အိၣ်ဒီးတၢ်မုၢ်လၢ် ထဲဒၣ်လၢ ကစၢ်ယွၤတဂၤဧိၤ, ဒီးအဆၢဖိ ၁၈ န့ၣ်စံးဝဲ, ခီဖျိလၢ “တၢ်ဟ့ၣ်ခီဟ့ၣ်နီၤတၢ်လၢ သးလၢဟ့ၣ်တၢ်ညီ” အပူၤအဃိ, တၢ်ကပာ်ဖှိၣ် တၢ်ထူးတၢ်တီၤလၢမူခိၣ်န့ၣ်လီၤ.

လၢကစၢ်ယွၤအမုၢ်ကျိၤဝဲၤကွာ်အပူၤ, တၢ်ပၢၤဃာ်စှီၤဃာ်တၢ်, ဒီးသးလၢအတအိၣ်ဒီးတၢ်ဟ့ၣ်ညီတၢ်န့ၣ်, ဆှၢပှၤဆူတၢ်လီၤဖျဲၣ်လီၤဟိန့ၣ်လီၤ. တၢ်ဟ့ၣ်ပှၤဂၤတဖၣ် လၢတၢ်အဲၣ်န့ၣ်ဒီး မ့ၢ်ဝဲကျဲဆူတၢ်မၤလၢမၤပှဲၤတၢ်န့ၣ်လီၤ.အဆၢဖိ ၆ ပာ်ဖျါဝဲလၢ, တၢ်ကျဲးစၢးဟူးဂဲၤသပှၢ်ပှၢ် လၢပဂီၢ်အလီၢ်န့ၣ်, တၢ်မ့ၢ်အိၣ်ဒီးတၢ်အဲၣ်ထူအဲၣ်ယွၤ, ဃုာ်ဒီးတၢ်သးမံလၢ တၢ်အိၣ်ဒီးပှၤန့ၣ်, မ့ၢ်တၢ်ဒိးန့ၢ်တၢ် အါအါကလဲာ်န့ၣ်လီၤ. ပကသးအိၣ်ဟ့ၣ်ညီ ပစုလီၢ် ခီၣ်ခိၣ်တဖၣ် ဒ်အီးစံၣ်အိလၣ်အသိးအဂီၢ်န့ၣ်, မ့ၢ်တၢ်မနုၤတမံၤ လူၤဃုပှၤန့ၣ်လဲၣ်. တနံၤအံၤ, ဒ်ကစၢ်ယွၤနဲၣ်ဆှၢပှၤအသိး မ်ပကထူးတီၤထီၣ်လၢတၢ်မၤဂ့ၤတဖၣ်န့ၣ်တက့ၢ်.