ဖဲလၢဟီၣ်ခိၣ်ဒီဘ့ၣ် တၢ်ဒုးခံဘျီတဘျီန့ၣ်, တၢ်တ့ၢ်လီၤမ့ၣ်ပိၢ်ဆူ ဘရံးတ့ၣ် ဘျီၣ်ဒိၣ်လာ်, ဒီးကိတိာ်ခိၣ်ကျၢၢ် ဝ့စတၢၣ် ခၠၢးခၠ့ၣ် ကတိၤလီၤတၢ်ဆူ ကမျၢၢ်ဘျီၣ်ဒိၣ်လၢ တၢ်သူၣ်ထီၣ်န့ၣ်ကဘၣ်တၢ်သူၣ်ထီၣ်က့ၤအီၤ ဒ်က့ၢ်ဂီၤလၢပှၤတ့တ့ၢ်ဝဲ ဒ်အခီၣ်ထံးလၢသီအသိးန့ၣ်လီၤ. တၢ်ကတိၤဂ့ၢ်လိာ်ဘှီလိာ် လၢမဲာ်သကိးမဲာ်ကသ့အဂီၢ် တၢ်သူၣ်ထီၣ်န့ၣ် ကဘၣ်ဆံးဝဲဒၣ်န့ၣ်လီၤ. ဒ်သိးပှၤမၤထံဂ့ၢ်ကီၢ်ဂ့ၢ်တဖၣ် “ကဟူးဂဲၤ, သူးအသး လၢတၢ်ခၢၣ်သးအဂီၢ်” န့ၣ်ဒၢးအက့ၢ်အဂီၤအထီ ကဘၣ်ထီန့ၢ်အလဲၢ်, ဒီးတဘၣ်မ့ၢ်ဝဲ က့ၢ်ဂီၤကဝီၤကျီၤဘၣ်န့ၣ်လီၤ. ဘျီၣ်ဒိၣ်ဒၢးက့ၢ်ဂီၤအံၤ ပၢၤဃာ် ဘရံးတ့ၣ် ပၣ်တံၣ်အသနိ, ဖဲပှၤအိၣ်လၢစုစ့ၣ်ဒီးစုထွဲကွၢ်ဆၢၣ်မဲာ်လိာ်အသး, ဒီးတချုးဆီတလဲအလီၢ်ဆူအတကပၤန့ၣ်ဒီး, လိၣ်ဘၣ်ဝဲ တၢ်ဆိကမိၣ်ထံလီၤတံၢ်လီၤဆဲးန့ၣ်လီၤ. ခၠၢးခၠ့ၣ် မၤကတၢၢ်အတၢ်ကတိၤလၢ, “ပတ့ထီၣ် ပတၢ်သူၣ်ထီၣ်တဖၣ်အက့ၢ်ဂီၤ, ဒီးလၢခံန့ၣ် ပတၢ်သူၣ်ထီၣ် ကတ့ပာ်ဖျါထီၣ်ပက့ၢ်ပဂီၤန့ၣ်လီၤ.”

ဖျါလၢ ကစၢ်ယွၤ ဘၣ်သူၣ်ဘၣ်သးဝဲန့ၣ်လီၤ. ၂ မိၤရှ့ အပူၤ အဆၢဒိၣ် နွံဆၢဒိၣ် (အဆၢဒိၣ် ၂၅-၃၁) ဟ့ၣ်ထီၣ် တၢ်နဲၣ်ကျဲ ဘၣ်ထွဲဒီး တၢ်သူၣ်ထီၣ်ဒဲစီဆှံ, ဒီးအဆၢဒိၣ်အဂၤ ဃုဆၢဒိၣ် (အဆၢဒိၣ် ၃၅-၄၀) ပာ်ဖျါဝဲ ပှၤအံၣ်စရ့လးဖိတဖၣ် တ့ထီၣ်ဝဲဒ်လဲၣ်န့ၣ်လီၤ. အဝဲသ့ၣ် ဘူၣ်ထီၣ်ဘါထီၣ်တၢ်န့ၣ် ယွၤအသးအိၣ်ပာ်သူၣ်ပာ်သးဝဲဒၣ်န့ၣ်လီၤ. ၂မိၤ ၂၆:၁, ၃၁-၃၇ ပာ်ဖျါဝဲ, ဖဲပှၤဂီၢ်မုၢ် နုာ်လီၤဆူ တၢ်သူၣ်ထီၣ်ဒဲ အလီၢ်ကဝီၤပူၤန့ၣ်ဒီး, ထူအလွဲၢ်ကပြုၢ်ကပြီၤ, ဒီးဘူၣ်ဒဲ အယၣ်ဘျးသဒၢအလွဲၢ်ကလုာ်ကလုာ်တဖၣ်န့ၣ် ဆဲးကပြုၢ်အဝဲသ့ၣ်အမဲာ်န့ၣ်လီၤ. တၢ်လုၢ်မ့ၣ်အူ အတၢ်လုၢ်လီၢ် (၂၇:၁-၁၈), ဒီး သရာ်တိၢ် (၃၀:၁၇-၂၁) မ့ၢ်မၤသ့ၣ်နီၣ်က့ၤ တၢ်ပှ့ၤတၢ်ကလံၤလၢ တၢ်ပျၢ်အဝဲသ့ၣ်အတၢ်ဒဲးဘးအဂီၢ်န့ၣ်လီၤ. ဒဲစီဆှံအိၣ်ဒီး မ့ၣ်အူဒၢ မိၢ်ပှၢ်တဖျၢၣ် (၂၅:၃၁-၄၀), စီၢ်နီၤခိၣ်လၢ တၢ်ပာ်ထီၣ်ကိၣ် (၂၅:၂၃-၃၀), တၢ်လုၢ်လီၢ်လၢ တၢ်ဆိၣ်ကဲၤတၢ်နၢမူ (၃၀:၁-၆), ဒီးတလါစီဆှံ (၂၅:၁၀-၂၂) န့ၣ်လီၤ. ပိးလီတမံၤစုာ်စုာ် အိၣ်ဒီးတၢ်လီၤဆီလၢအကါဒိၣ်တဖၣ်န့ၣ်လီၤ.

ဒ်ပှၤအံၣ်စရ့လးဖိအသိး ကစၢ်ယွၤ တမၤလိာ်ဝဲ တၢ်ဘူၣ်တၢ်ဘါအလီၢ်အကျဲလီၤတံၢ်လီၤဆဲးလၢပဂီၢ်ဘၣ်ဆၣ်, ပဘူၣ်ထီၣ်ဘါထီၣ်အီၤန့ၣ် မ့ၢ်တၢ်လၢအကံၢ်အစီဆံးစှၤဝဲအဃိဘၣ်. ပနီၢ်ခိနီၢ်ကစၢ်ဒၣ်ဝဲန့ၣ် မ့ၢ်ဒဲစီဆှံတဖျၢၣ်, ဒ်သိးယွၤကအိၣ်ဆိးလၢပပူၤအဂီၢ် ဘၣ်တၢ်ပာ်လီၤဆီအီၤန့ၣ်လီၤ. ကယဲၢ်တၢ်လၢပမၤအီၤကိးမံၤန့ၣ် မ်အကဒုးသ့ၣ်နီၣ်က့ၤပှၤလၢ အဝဲမ့ၢ်မတၤတဂၤ, ဒီးမၤတၢ်မနုၤလဲၣ်န့ၣ်တက့ၢ်.