ကၠ့(မ) မီရံး(စ) န့ၣ် တဘျီဘၣ်တၢ်ပာ်ဖျါအီၤ ဒ်အမ့ၢ်ပှၤ “တသ့လံာ်, မ့မ့ၢ်တခီ ပှၤပတီၢ်မုၢ်လၢအအဲၣ်တၢ်ကွံတၢ်,” ဘၣ်ဆၣ်, ကစၢ်ယွၤ စူးကါအီၤလၢ ကမိၤက့ၤ အီကၢးစတၢး(စ) ထီးလ့ၣ်ဒံၢ် ဒ်သိးကစူၢ်က့ၤနာ်က့ၤ ကစၢ်ယ့ၣ်ရှူးခရံာ်န့ၣ်လီၤ. ထီးလ့ၣ်ဒံၢ်, မ့ၢ်နံၣ်ကယၤ တဆံဃိး ပှၤကွဲးထါ တၢ်သးဝံၣ်ကစၢ်ယွၤ, ဒီးကွဲးဝဲထါသးဝံၣ် လၢအအိၣ်ကၢအိၣ်ခိး “လ့လၢအသ့ၣ်ဖး လၢပဃိ,” အံၤန့ၣ်, တဲဖျါထီၣ်ဝဲလၢ အဒိကနၣ်ဘၣ် မီရံး(စ) စံၣ်တဲၤတဲလီၤ တၢ်ကစီၣ်အဂ့ၢ်န့ၣ်လီၤ. “တၢ်လၢအလီၤဆီဝဲန့ၣ် ယ…ယကဘၣ် တၢ်ဟဲစိာ်ယၤဆူကစၢ်ယွၤအအိၣ်… ခီဖျိလၢယွၤအပှၤဂီၢ်မုၢ်စှၤဂၤအကျါ, လၢအထံၣ်လိာ်သး ဖဲဘုဖီစိၣ် တဖျၢၣ်အပူၤ, ပှၤမၤတၢ်သးခုကစီၣ်တဂၤလၢ အဖးအမံၤဒၣ်လဲာ်တဘၣ်တဂၤန့ၣ်လီၤ. တၢ်အံၤ မ့ၢ်ကစၢ်ယွၤမၤတၢ်နီၢ်နီၢ်, ဒီးမ့ၢ်တၢ်လၢအလီၤကမၢကမၣ်တမံၤန့ၣ်လီၤ.”
နီၢ်နီၢ်န့ၣ်, ကစၢ်ယွၤမၤ တၢ်လၢအလီၤကမၢကမၣ်တဖၣ်, ဖဲတၢ်လီၢ်အါတီၤဖျါလၢ မၤအသးတသ့, ဒီးစူးကါဝဲပှၤအါဂၤ, ပှၤတဖၣ်လၢပပာ်အီၤအပတီၢ် ဒ် “ကံၢ်စီတလၢပှဲၤ,” မ့တမ့ၢ် ပှၤပတီၢ်မုၢ်သ့ၣ်တဖၣ်န့ၣ်လီၤ. ၁ ကရံၣ်သူး ၁ အပူၤန့ၣ်, စီၤပီလူး ဒုးသ့ၣ်နီၣ်ထီၣ် ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်လၢ, အဝဲသ့ၣ်န့ၣ် တမ့ၢ်ပှၤအလီၤတိၢ်လီၤဆီကဲာ်ဆိးတဖၣ်န့ၣ်ဘၣ်. အဆၢဖိ ၂၆ န့ၣ်ပာ်ဖျါဝဲ “လၢတၢ်ကိးန့ၢ်သုန့ၣ် သုထံၣ်လၢပှၤကူၣ်တၢ်သ့, ဒ်တၢ်ဖံးတၢ်ညၣ်အသိးန့ၣ်တအါဘၣ်. ပှၤအိၣ်ဒီးအစိကမီၤတအါဘၣ်. ပဒိၣ်အစၢၤ အသွဲၣ်တအါဘၣ်” န့ၣ်လီၤ. ပှၤကရံၣ်သူးဖိ လၢအစူၢ်က့ၤနာ်က့ၤတၢ်တဖၣ် မ့ၢ်ဝဲပှၤပတီၢ်မုၢ်ဘၣ်ဆၣ်, ခီဖျိကစၢ်ယွၤအဘျုးအဖှိၣ်အဃိ, လၢတၢ်သ့တၤလၣ်တကပၤန့ၣ် တလီၤတူာ်လီၤကာ်နီတဂၤ, တၢ်စူးကါအဝဲသ့ၣ်သ့ (ကွၢ် :၇) န့ၣ်လီၤ. ဒီးအဆၢဖိ ၂၇-၂၉ စံးဘၣ်ပှၤ, ကစၢ်ယွၤ သ့ၣ်ညါဝဲလၢ ကဘၣ်ပာ် ပှၤပာ်အသးကဖၢလၢတဖၣ်လၢ အလီၢ်အကျဲဒၣ်ဝဲ, ယွၤမၤတၢ်လၢ အဝဲသ့ၣ်အကျါ, ဒီးခီဖျိလၢအဝဲသ့ၣ်န့ၣ်လီၤ.
မ့ၢ်နထံၣ်လီၤက့ၤနသး ဒ်အမ့ၢ်ပှၤလၢ “တၢ်လီၤဆီတအိၣ်,” “ပှၤပတီၢ်မုၢ်,” မ့တမ့ၢ် “ပှၤလီၤတုာ်လီၤကာ်” အသိးဒၣ်လဲာ်န့ၣ်ဧါ. သူၣ်ကိၢ်သးဂီၤတၢ်အဂီၢ်အလီၢ်တအိၣ်ဘၣ်. ကစၢ်ယ့ၣ်ရှူး မ့ၢ်အိၣ်ဒီးနၤ, ဒီးနမ့ၢ်သးအိၣ်စူးကါလီၤနသး လၢအဂီၢ်န့ၣ်ဒီး, တၢ်အိၣ်ဒီးနၤ မ့ၢ်တၢ်လၢတၢ်ပှဲၤလၢနဂီၢ်လံန့ၣ်လီၤ. လၢနသးပူၤ မ်နကဃ့ထုကဖၣ်ထဲလၢ “ကစၢ်ယွၤဧၢ, စူးကါလၢ်ဘၣ်ယၤတက့ၢ်” န့ၣ်လီၤ.
ဖဲနဆိကမိၣ်ထီၣ် ကစၢ်ယွၤစူးကါ ပှၤတဂၤဂၤ လၢတၢ်ဘှ့ၣ်တၢ်ဘှီၣ်အပူၤဘၣ်ဆၣ်, ဘၣ်တၢ်စူးကါအီၤ တုၤလီၤတီၤလီၤတဂၤန့ၣ်ဒီး, မ့ၢ်မတၤတဂၤ ဟဲဖျါထီၣ် လၢနသးကံၢ်ပူၤန့ၣ်လဲၣ်. ဒ်သိးကကဲထိၣ်တၢ်မၤစၢၤလၢ, နကသုးကွံာ် နတၢ်သးစၢၢ်ဆၢတဖၣ်, လၢအမ့ၢ် တၢ်လၢအအိၣ်ဒီးနၤ မ့တမ့ၢ် တၢ်လၢတအိၣ်ဒီးနၤ ဆူကစၢ်ယွၤမၤတၢ် ခီဖျိလၢနၤ မနုၤတမံၤကသ့လဲၣ်အဂီၢ်, မ့ၢ်နမၤတၢ်မနုၤကသ့လဲၣ်.
ပၢ်အိၣ်လၢမူခိၣ်ဧၢ, ယပညိၣ်ကွၢ်ဒၣ်ထဲ ယနီၢ်ကစၢ်အဂီၢ်, ဒီးယတပညိၣ်ကွၢ်တၢ်ဆူနအိၣ်အဃိ, ပျၢ်ကပာ်ဘၣ်ယၤန့ၣ်တက့ၢ်. လၢနတၢ်ဖံးတၢ်မၤစီဆှံအပူၤ, ဖဲယအိၣ်တၢ်လီၢ်တတီၤတီၤန့ၣ် စူးကါလၢ်ဘၣ်ယၤန့ၣ်တက့ၢ်.
တၢ်အိၣ်ဖှိၣ်လၢကရံၣ်သူးအပူၤ ဘၣ်တၢ်သူၣ်ထီၣ်အီၤလၢ စီၤပီလူး လၢအတၢ်သးခုကစီၣ်အတၢ်လဲၤခံဘျီတဘျီန့ၣ်လီၤ (အ့ၣ်ဒံၢ် ၅၀ ကပိာ်ကပၤ). လွံၢ်နံၣ်ဝံၤအလီၢ်ခံ, ဖဲအတၢ်သးခုကစီၣ်အတၢ်လဲၤသၢဘျီတဘျီအကတၢၢ်န့ၣ်, အဝဲကွဲးန့ၢ် တၢ်အိၣ်ဖှိၣ်လၢ အဘၣ်ကီဘၣ်ခဲ အိၣ်ဒီးတၢ်ပနီၣ်လီၤဆီဒၣ်တၢ်လၢ တၢ်ထီဒါလိာ်သးလၢတၢ်အိၣ်ဖှိၣ်ဖိတဖၣ်အကျါ, တၢ်စူးကါကမၣ် တၢ်သဘျ့, တၢ်ဆီၣ်လီၤသးတအိၣ်, တၢ်သကဲာ်ပဝးတဂ့ၤ, ဒီးတၢ်တဃူတဖိးန့ၣ်လီၤ. စီၤပီလူး ဘၣ်ကွၢ်ဆၢၣ်မဲာ်ဒီး အဝဲသ့ၣ်အတၢ်ကီ တၢ်ခဲ တဖၣ် အဂံၢ်ထံး လၢအမ့ၢ် အဝဲသ့ၣ်အတၢ်ပာ်ထီၣ်ထီသးန့ၣ်လီၤ (၁ ကရံၣ်သူး ၁:၂၆-၃၂). အဝဲ ဟ့ၣ်ပလီၢ်အဝဲသ့ၣ်လၢ အဝဲသ့ၣ် တမ့ၢ်ဘၣ် ပှၤအိၣ်ဒီးတၢ်လုၣ်ဘၢစိကမီၤဒိၣ်မုၢ်, ပှၤတူၢ်ဒိၣ်ကီၤဒိၣ် အိၣ်ဒီး စိကမီၤ ဒ်အဆိကမိၣ်ဝဲအသိး - ဒ်အမ့ၢ် ပှၤကူၣ်ဘၣ် ကူၣ်သ့လၢသးဂ့ၢ်ပီညါ, ပှၤစိကမီၤဒိၣ်လၢထံဂ့ၢ်ကီၢ်ဂ့ၢ် (မ့တမ့ၢ်) ပှၤထူးပှၤတီၤ သ့ၣ်တဖၣ် န့ၣ်ဘၣ်. အဝဲသ့ၣ်မ့ၢ်ဒၣ် တၢ်အိၣ် ဆၢညါလိာ်သးလီၤ - ပှၤသးတဆး, ပှၤဂံၢ်စၢ်ဘါစၢ်, ပှၤလီၢ်လၤဖုၣ်, သးဟ့ ပှၤတူၢ်ဒိၣ်ကီၤဒိၣ်သ့ၣ်တဖၣ်န့ၣ်လီၤ (:၂၇-၂၈). ဘၣ်ဆၣ် ကစၢ်ယွၤ ဃုထၢထီၣ်အဝဲသ့ၣ် လၢကကဲထီၣ် အဖိသ့ၣ်တဖၣ် သူၣ်ထီၣ်အခီၣ်ထံးခီၣ်ဘိလဲလဲဒၣ်လၢ အဘျုးအဖှိၣ် အဖီခိၣ်, တမ့ၢ်လၢအဝဲသ့ၣ်အတၢ်မၤအဂ့ၤအဝါအဃိဘၣ်. အန့ၣ်သတးဒီး, “ဒ်သိးပှၤကညီ သုတပာ်အသးကဖၢလၢယွၤအမဲာ် ညါ နီတဂၤတဂ့ၤလီၤ” (:၂၉, ကွၢ် :၄-၅). လၢလီၢ်အဂၤတပူၤန့ၣ်, စီၤပီလူး ဟ့ၣ်ပလီၢ်ပှၤ, “အဂ့ၢ်ဒ်အံၤ, သုတုၤလၢတၢ်အုၣ်က့ၤ ခီၣ်က့ၤသုလၢ တၢ်ဘျုးတၢ်ဖှိၣ်လၢတၢ်နာ်အဃိလီၤ. ဒီးအဝဲန့ၣ်, တမ့ၢ်ဘၣ်လၢသုဃိဒၣ်သုဝဲဘၣ်, မ့ၢ်လၢယွၤအတၢ်ဟ့ၣ်လီၤ. ဒ်သိး ပှၤသုတပာ်အသးကဖၢလၢနီတဂၤတဂ့ၤဒီး, တမ့ၢ်ဘၣ်လၢတၢ်မၤအဃိဘၣ်” (အ့းဖ့းစူး ၂း၈-၉).
Sim Kay Tee
