သၢနံၣ်အတီၢ်ပူၤ, မ့တမ့ၢ်လၢဟံၣ်ဃီအတၢ်လိၣ်န့ၣ်ဒီး, စူစၣ် (Susan) တၦ့ၤတၢ်လိၣ် တဖၣ်လၢအဂီၢ်နီတမံၤဘၣ်. ကိၣ်ဘ့း-၁၉ (Covid-19) တၢ်ဆါသံသတြိာ်အကတီၢ် မၤဘၣ်ဒိ ယတံၤသကိး အစ့ဟဲနုာ်အဃိ, အိၣ်မူအိၣ်ဂဲၤဝဲယိယိဖိန့ၣ်လီၤ. အဝဲဒုးသ့ၣ်ညါယၤလၢ, “ဘၣ်တနံၤ, ဖဲယမၤကဆှဲကဆှီယအိၣ်ဆိးတၢ်အလီၢ်န့ၣ်, ယပာ်သူၣ်ပာ်သးလၢ ယတၢ်ပိးတၢ်လီတဖၣ် လီၤလံၤဖီဃး, အလွဲၢ်တအိၣ်လၢၤဘၣ်န့ၣ်လီၤ. ဖဲန့ၣ် ယစးထီၣ် သးသယုၢ်က့ၤ သးလၢအဆၢမၤန့ၢ် တၢ်ပိးတၢ်လီအသီတဖၣ်- သးလၢအဆၢမၤန့ၢ်တၢ်မၤသီထီၣ်တၢ်, ဒီးတၢ်သူၣ်ပိၢ်သးဝးန့ၣ်လီၤ. တၢ်အိၣ်လၢယဃၢၤဝးဝးတဖၣ် ဖျါလီၤဘှံး, ဒီးတလီၤသူၣ်ပိၢ်သးဝးလၢၤဘၣ်. ယသးကလၢၢ်ဘၣ်လၢ ယကမုၢ်လၢ်တၢ်အဂီၢ် တၢ်တအိၣ်နီတမံၤလၢၤဘၣ်န့ၣ်လီၤ.”
လၢတၢ်တဆိကမိၣ်အပူၤ, စူစၣ် ထံၣ်န့ၢ်ဝဲ တၢ်န့ၢ်ဂံၢ်န့ၢ်ဘါအလံာ်တဘ့ၣ် လၢလံာ်စီဆှံအပူၤန့ၣ်လီၤ. ဝ့ၢ်ယရူၤၡလ့ၣ် ဘၣ်တၢ်မၤနၢၤလၢဘၤဘူလိၣ်ဝံၤအလီၢ်ခံႇ လံာ်သးသယုၢ်တၢ်တဘ့ၣ်အံၤ ဘၣ်တၢ်ကွဲးအီၤလၢ ဝံယံးရမံယၤ, ဒီးပာ်ဖျါထီၣ် တၢ်သူၣ်အုးသးအုးအပူၤလီၢ်လၢအိးထီၣ်အသး, တၢ်လၢဝံဒီးၦၤဂီၢ်မုၢ်တဖၣ် တူၢ်ဘၣ်ခီၣ်ဘၣ်ဝဲန့ၣ်လီၤ. လၢတၢ်သူၣ်အုးသးအုး, ဒီးတၢ်မုၢ်လၢ်လီၤမၢ် အပူၤဒၣ်လဲာ်, အိၣ်ဒံးဝဲဒီးတၢ်မုၢ်လၢ်လီၤတံၢ်လီၤဆဲး လၢအမ့ၢ် ယွၤအတၢ်အဲၣ်န့ၣ်လီၤ. သးသယုၢ် ၃:၂၂-၂၃ အပူၤန့ၣ် ဝံယံးရမံယၤကွဲးဝဲ, “ယွၤအဘျုးအဖှိၣ် မ့ၢ်အသးတတူာ်ဘၣ်သတးဒီး,… အဘျုးအဖှိၣ်အသီအိၣ်ဝဲကိးဂီၤဒဲးလီၤ” န့ၣ်လီၤ.
စူစၣ် ဘၣ်တၢ်ဒုးသ့ၣ်နီၣ်အီၤလၢ ယွၤအတၢ်အဲၣ်အဒိၣ်အယိာ် လၢအကတၢၢ်တအိၣ်တမံၤန့ၣ် ဟဲအိၣ်ထီၣ်ဝဲ လၢမုၢ်နံၤအသီ ကိးမုၢ်နံၤဒဲးအဂ့ၢ်န့ၣ်လီၤ. တၢ်အိၣ်အသးတဖၣ်အဃိ, ဖဲပသးကလၢၢ်ဘၣ်လၢ ခါဆူညါအဂီၢ် ပတၢ်မုၢ်လၢ်တအိၣ်နီတမံၤလၢၤဘၣ်န့ၣ်ဒီးႇ အလီၢ်အိၣ်လၢ ပကသ့ၣ်နီၣ်ထီၣ်က့ၤ, ယွၤလၢအကလုၢ်တီ, ဒီးမုၢ်လၢ်ကွၢ်စိ တၢ်လၢကစၢ်ယွၤကတဲာ်ကတီၤ, ကဟ့ၣ်မၤစၢၤၦၤဒ်လဲၣ်န့ၣ်လီၤ. အဆၢဖိ ၂၄-၂၅ ပာ်ဖျါဝဲ ပမုၢ်လၢ်တၢ်လၢယွၤ, လၢတၢ်နာ်န့ၢ်လီၤသးအပူၤသ့ဝဲ, ပကအိၣ်ဒီးတၢ်သ့ၣ်ညါလၢ ပတၢ်မုၢ်လၢ်အံၤ တလီၤမၢ်, တမ့ၢ်တၢ်ကလီကလီနီတဘျီဘၣ်န့ၣ်လီၤ. မ့ၢ်လၢ ပမုၢ်လၢ်တၢ်လၢယွၤန့ၣ် မ့ၢ်တၢ်အိၣ်ဘံၣ် အိၣ်ဘၢလၢ ကစၢ်ယွၤအတၢ်အဲၣ် အဂၢၢ်အကျၢၤ, ဒီးအတၢ်သးကညီၤအပူၤအဃိန့ၣ်လီၤ.
စူစၣ် စံးဝဲ, “ကိးမုၢ်နံၤဒဲးန့ၣ်, ယွၤအတၢ်အဲၣ် မ့ၢ် ‘တၢ်အသီတမံၤလၢယဂီၢ်’ ယကွၢ်စိတၢ်ဆူညါလၢတၢ်မုၢ်လၢ်အပူၤသ့ဝဲ” န့ၣ်လီၤ.
