ၦၤလၢအဘၣ်ကဲကုၢ်တဖၣ်အဂီၢ် ကီၢ်အမဲရကၤကီၢ်ခိၣ် အၣ်ဘြၤဟၣ် လ့ကၢၣ် ဟ့ၣ်လီၤဆိဝဲတၢ်သဘျ့ခံနံၣ်တခီ, ဒီးကလံၤထံးၦၤသိၣ်မှံၤအသုးဖိတဖၣ် ပာ်လီၤစုကဝဲၤဘၣ်ဆၣ်, ထဲကီၢ်စဲၣ်တဲးကစဲး (Texas) တဘ့ၣ်န့ၣ် တအၢၣ်လီၤတူၢ်လိာ်ဝဲ ကုၢ်တဖၣ်အတၢ်သဘျ့အဂီၢ်န့ၣ်ဘၣ်. ဘၣ်ဆၣ်, ဖဲ ၁၈၆၅ နံၣ်, လါယူၤ ၁၉ သီန့ၣ်, ကီၢ်စဲၣ်စၢဖှိၣ်သုးမုၢ် သုးခိၣ်ဒိၣ် ခိၣ်ကျၢၢ် ကီၤဒၢၣ် ဂရဲၣ်ကၠၢၣ် (Gordon Granger) နုာ်လီၤဝဲဆူ ဝ့ၢ်ကၤဘၤစတၢၣ် (Galveston), လၢကီၢ်စဲၣ်တဲးကစဲးအပူၤ, ဒီးဟ့ၣ်လီၤအကလုၢ်လၢ ပှၤကဲကုၢ်တဖၣ် ခဲလၢာ်ကဘၣ်တၢ်ပျၢ်ကွံာ်အီၤအဂီၢ်န့ၣ်လီၤ. ဖဲလၢၦၤအဘၣ်တၢ်စၢဃာ်တဖၣ် အထးကျီၤလီၤဘ့ၣ်, ဒီးနၢ်ဟူဝဲ တၢ်ဘိးဘၣ်ရၤလီၤ တၢ်ကစီၣ်လၢအဟ့ၣ်ကုၢ်တဖၣ်တၢ်သဘျ့အံၤ, ကကဲထီၣ်တၢ်ကမၢကမၣ်, ဒီးတၢ်သူၣ်ခုသးခု ထဲလဲၣ်န့ၣ် ထံၣ်မှံဆိကမိၣ်ကွၢ်တက့ၢ်.

ကစၢ်ယွၤထံၣ်ဝဲ ၦၤဘၣ်နးဘၣ်ဖှီၣ်တဖၣ်, ဒီးအကတၢၢ်န့ၣ် ကဘိးဘၣ်ရၤလီၤဝဲ တၢ်သဘျ့ဆူ ၦၤဘၣ်အိၣ်လၢ တၢ်တတီတလိၤ အတၢ်ဃၢတၢ်စုာ်အဖီလာ်အဂီၢ်န့ၣ်လီၤ. တၢ်မၤအသးအံၤ, ဘၣ်ဝဲတီဝဲ ဒ် စီၤမိၤရှ့ အစိၤဆၢကတီၢ်အသိး, ဘၣ်ဝဲတီဝဲတုၤလၢ ခ့ခါအကတီၢ်စ့ၢ်ကီးန့ၣ်လီၤ. ၂ မိၤရှ့ ၃:၇ န့ၣ် ပကထံၣ်ဘၣ် ကစၢ်ယွၤ လီၤဖျါထီၣ်အသး ခီဖျိလၢသ့ၣ်တၤဆှုၣ်မ့ၣ်အူဃုာ်ဒီး တၢ်ကစီၣ်လၢအကါဒိၣ်, “ယထံၣ်တ့ၢ်ယၦၤဂီၢ်မုၢ်လၢ အအိၣ်လၢအဲၤကူပတူးအပူၤတဖၣ် အတၢ်နးတၢ်ဖှီၣ်သၦၢ်တၢၢ်….” န့ၣ်လီၤ. တမ့ၢ်လၢ ကစၢ်ယွၤထံၣ်ဝဲထဲ ၦၤအဲၤကူပတူးဖိ မၤအၢမၤနး ၦၤအံၣ်စရ့လးဖိတဖၣ်န့ၣ်ဘၣ်, ကစၢ်ယွၤရဲၣ်ကျဲၤစ့ၢ်ကီး ကမၤတၢ်တမံၤမံၤလၢတၢ်ဂ့ၢ်အံၤအဂီၢ်န့ၣ်လီၤ. အဆၢဖိ ၈ န့ၣ် ယွၤစံးဝဲ, “ဒီးယဟဲလီၤ ဒ်သိးယကမၤပူၤမၤဖျဲးအီၤ လၢၦၤအဲၤကူပတူးဖိအစုပူၤ, ဒီးဒုးဟးထီၣ်ကွံာ်အီၤလၢကီၢ်အဝဲန့ၣ် ဆူကီၢ်တဘ့ၣ်လၢအဂ့ၤဒီးလၢအလဲၢ်” န့ၣ်လီၤ. ယွၤပညိၣ်ဝဲလၢ ကဘိးဘၣ်ရၤလီၤ တၢ်သဘျ့ လၢၦၤအံၣ်စရ့လးဖိအဂီၢ်, ဒီးစီၤမိၤရှ့ ကမ့ၢ် ၦၤကတိၤတၢ်လၢယွၤအခၢၣ်စးန့ၣ်လီၤ. အဆၢဖိ ၁၀ န့ၣ် ယွၤစံးဘၣ်အခ့အပှၤလၢ, “ယကမၢလီၤနၤဆူဖၤရိၤအအိၣ် ဒ်သိးနကဒုးဟးထီၣ် ယၦၤဂီၢ်မုၢ်ၦၤအံၣ်စရ့လးဖိႇ လၢအဲၤကူပတူး အပူၤန့ၣ်လီၤ.”

ကစၢ်ယွၤအဆၢကတီၢ်န့ၣ် ဒ်ပမုၢ်လၢ်ဝဲအသိး တဟဲကဲထီၣ်ဝဲချ့ချ့ဘၣ်ဆၣ်, မုၢ်တနံၤန့ၣ် ယွၤကမၤပူၤမၤဖျဲးၦၤ လၢတၢ်စၢဃာ်ခဲလၢာ်, ဒီးတၢ်တတီတလိၤခဲလၢာ်အပူၤန့ၣ်လီၤ. ကစၢ်ယွၤဟ့ၣ်လီၤဝဲ တၢ်မုၢ်လၢ်, ဒီးတၢ်အုၣ်က့ၤခီၣ်က့ၤ ဆူၦၤဘၣ်တၢ်ဆီၣ်သနံး, ဘၣ်တၢ်မၤအၢမၤနးကိးဂၤဒဲးအဂီၢ်န့ၣ်လီၤ.