လၢတၢ်ဖံးတၢ်မၤအဂီၢ် ဟီၣ်လံၣ် ခီး (Holly Cooke) ဘၣ်သုးလီၢ်သုးကျဲဆူ ဝ့ၢ်လိဒိၣ် (London) အကတီၢ်န့ၣ် အတံၤသကိးတအိၣ်နီတဂၤဘၣ်. နွံကတၢၢ်အသီတဖၣ်န့ၣ် မ့ၢ်တၢ်လီၤသးအုးလၢအဂီၢ်န့ၣ်လီၤ. ဒ်ဟီၣ်ခိၣ်ဒီဘ့ၣ် တၢ်ဃုထံၣ်သ့ၣ်ညါ အတၢ်ဃုထိၣ်သတြီၤဒီး ၦၤအိၣ်ဆိး မျးကယၤ တဆံ, ဖဲပီၣ်တူၣ်ဂဲလ် (Portugal) ထံကီၢ်လၢအဃၢၤ, အဝ့ၢ် လ့စ်ဘီၣ် (Lisbon) အပူၤန့ၣ်ဒီး, ဝ့ၢ်လိဒိၣ် အနီၢ်ကစၢ်ဒၣ်ဝဲ မ့ၢ်တၢ်အိၣ်သယုၢ်သညိ အဝ့ၢ်, ဒီးၦၤဝ့ၢ်ဖိ ၅၅ မျးကယၤ စံးဝဲလၢ အဝဲသ့ၣ်ဘၣ် အိၣ်ဆိးလၢတၢ်သယုၢ်သညိန့ၣ်လီၤ.
လၢတၢ်ရ့လိာ် မၤဘၣ်ထွဲလိာ်သးအဂီၢ်, ဟီၣ်လံၣ် ကွၢ်ကပာ် အတၢ်ပျံၤတၢ်ဖုးဒီး ဒုးအိၣ်ထီၣ် တၢ်ရ့လိာ်မုာ်လိာ် တၢ်ဆဲးကျိးကရၢလၢ လၢအမ့ၢ် ဝ့ၢ်လိၣ်ဒိၣ်ပိာ်မုာ် အိၣ်သယုၢ်သညိကရၢ (London Lonely Girls Club), ဒီးၦၤသၢကလးယဲၢ်ကထိဃာ်ဃာ်နုာ်လီၤပာ်ဖှိၣ်ထီၣ်အသးန့ၣ်လီၤ. ဘၣ်တနွံနွံန့ၣ် ကရူၢ်ဆံးဖိတဖၣ်ထံၣ်လိၣ်အသး, ဒီးတၢ်ဟးလိာ်ကွဲ အီၣ်သကိးတၢ် လၢပှၤဟးအိၣ်ကသူၣ် အလီၢ်အကျဲ, မၤလိသကိးတၢ်သ့စိးပျၤဒွဲလၤႇ မၤလိသကိးတၢ်ကယၢကယဲလၢၢ်လ့တၢ်မျၢ်, တၢ်အီၣ်သကိးဟါတၢ်အီၣ်, ဒီးလၢဟံၣ်ချၢ နီၢ်ခိတၢ်ဟူးတၢ်ဂဲၤဒီးထွံၣ်ဖိတဖၣ်ဒၣ်လဲာ်အိၣ်ဝဲန့ၣ်လီၤ.
တၢ်သယုၢ်သညိ လၢအတၤပှၤန့ၣ် တမ့ၢ်ဝဲတၢ်အသီ, ဒီးတမ့ၢ်စ့ၢ်ကီး တၢ်မၤဘျါက့ၤတၢ်တူၢ်ဘၣ်ခီၣ်ဘၣ် တၢ်အိၣ်လီၤဖးဒီးၦၤဂၤန့ၣ်ဘၣ်. ပကစၢ်အထူအယိာ်တဂၤန့ၣ် စီၤဒၤဝံး ကွဲးဝဲလၢ စံး ၆၈:၆ အပူၤ, “ၦၤလၢအအိၣ်သယုၢ်တဂၤဧိၤန့ၣ် ယွၤပာ်ဝဲလၢဟံၣ်ပူၤလီၤ. ဒုးဟဲထီၣ်ၦၤလၢ အဘၣ်စၢဃာ်လၢထးသွဲလီၤ” န့ၣ်လီၤ. တၢ်ဃ့ကစၢ်ယွၤလၢ ကနဲၣ်ဆှၢပကျဲဆူ တံၤသကိးလၢအလီၤဂာ်ဒီးခရံာ်န့ၣ် မ့ၢ်တၢ်ခွဲးတၢ်ယာ်စီဆှံအဃိ, မ့ၢ်တၢ်သကွံာ်ကညးလၢ ပဃ့ထီၣ်ယွၤသ့ဝဲန့ၣ်လီၤ. အဆၢဖိ ၅ န့ၣ် စီၤဒၤဝံး စံးကဒီး, “ယွၤလၢ အအိၣ်လၢအလီၢ်စီဆှံအပူၤန့ၣ် မ့ၢ်ၦၤဖိၣ်ဃဲအပၢ်, ဒီးၦၤလၢအစံၣ်ညီၣ်န့ၢ် ၦၤမုၣ်ကမဲအကွီၢ်လီၤ” န့ၣ်လီၤ. အဆၢဖိ ၁၉ ပာ်ဖျါဝဲ, “မ်ယွၤလၢအဝံ ပတၢ်ဝံတၢ်ယိးတနံၤဘၣ်တနံၤန့ၣ် ဘၣ်တၢ်စံးထီၣ်ပတြၢၤအီၤတက့ၢ်. တၢ်အုၣ်က့ၤခီၣ်က့ၤၦၤန့ၣ် မ့ၢ်ယွၤလီၤ” န့ၣ်လီၤ.
တံၤသကိးသးဘိမ့ၢ်ယ့ၣ်ၡူးန့ၣ်လီၤ. ကိးဆၢကိးကတီၢ်ဒဲးန့ၣ် ဟ့ၣ်လီၤၦၤလၢ တံၤသကိးအထူအယိာ်တဖၣ်, စးထီၣ် လၢအတၢ်အိၣ်ဆိးဒီးၦၤ အတၢ်လၤတၢ်ကပီၤပူၤန့ၣ်လီၤ. ဒ် ဟီၣ်လံၣ် စံးဝဲအသိး, “တၢ်ရ့တံၤရ့သကိးအဆၢကတီၢ်န့ၣ် မ့ၢ်တၢ်ဂ့ၤလၢ သးအဂီၢ်” န့ၣ်လီၤ.
