ၦၤအပျိၢ်ဃံဘၣ်ဒိ, ဒီးဟူးတသ့လၢၤတဖၣ်အဂီၢ် တၢ်မၤအသးအသီဟဲအိၣ်ထီၣ်ဝဲန့ၣ်လီၤ. ၦၤကၠၢမနံၣ်ဖိ လၢအဃုသ့ၣ်ညါတၢ်တဖၣ် ဃုထံၣ်န့ၢ်ကျဲလၢ ကဒုးထိၣ်ဟူးထိၣ်ဂဲၤထီၣ် ထူၣ်ပျၢ်နၢာ်(nerve )ကဒိၣ်ထီၣ်ထီထီၣ် ဒ်သိးဒီးကဘျးစဲက့ၤ ခိၣ်နူာ်ထူၣ်ပျၢ်အကျိၤ လၢပညၣ်ထူၣ်တဖၣ်, ဒီးခိၣ်နူာ်အဘၢၣ်စၢၤန့ၣ်လီၤ. တၢ်ဒုးဒိၣ်ထီၣ်က့ၤတၢ်အံၤန့ၣ် မၤကွၢ်ဝဲယုၢ်လၢဟူးဂဲၤ တသ့တဖၣ်န့ၣ်ဒီး ယုၢ်န့ၣ်ဟူးဂဲၤက့ၤဝဲသ့အဃိ, ဒ်သိးကဆၢတဲာ်ဝဲလၢ တၢ်ကူစါယါဘျါအကျဲအံၤ ကပူၤဖျဲးဒီးတၢ်ဘၣ်ယိာ်, ဒီးကကဲဘျုး တုၤလီၤတီၤလီၤလၢ ၦၤကညီတဖၣ်အဂီၢ်ဧါန့ၣ် တၢ်မၤကွၢ်အံၤ ကဘၣ်တၢ်ဃုသ့ၣ်ညါအါထီၣ်ဒံးဆူညါန့ၣ်လီၤ.

ၦၤဟူးဂဲၤတသ့တန့ၢ်တဖၣ်အဂီၢ်, စဲအ့ၣ်ဃုထံၣ်သ့ၣ်ညါတၢ်တမံၤအံၤန့ၣ် ကစၢ်ယ့ၣ်ၡူးမၤဝဲ ခီဖျိလၢတၢ်လီၤလးတဖၣ်န့ၣ်လီၤ. ယိၤ ၅:၅ ပာ်ဖျါဝဲ, ဖဲကစၢ်ယ့ၣ်ရှူးလဲၤဆူ နိၣ်ဘ့ၤသ့းစဒါ, တၢ်လီၢ်လၢ ၦၤအါဂၤအိၣ်ခိးဝဲ, အိၣ်ဒီးတၢ်မုၢ်လၢ်လၢ အတၢ်ဆူးတၢ်ဆါကဘျါက့ၤအဂီၢ်န့ၣ်လီၤ. ဖဲန့ၣ်ကစၢ်ယ့ၣ်ၡူး ထံၣ်ၦၤလၢ “တၢ်ဆါတ့ၢ်အီၤ သၢဆံဃိးနံၣ်” တဂၤန့ၣ်လီၤ. ဖဲကစၢ်ယ့ၣ်ၡူးသ့ၣ်ညါဝဲလၢ ၦၤတဂၤအံၤ အဲၣ်ဒိးဘျါက့ၤနီၢ်နီၢ်အဃိ, ကစၢ်ခရံာ်နဲၣ်အီၤလၢ ကဂဲၤဆၢထၢၣ်, ဒီးဟးန့ၣ်လီၤ. ပကထံၣ်ဘၣ် အဆၢဖိ ၉ ပာ်ဖျါဝဲ, “ဒီးဘျါက့ၤဝဲတကီၢ်ခါ, ဒီးဟံးန့ၢ်အလီၢ်မံ, ဒီးဟးထီၣ်ဝဲလီၤ” န့ၣ်လီၤ.

ကစၢ်ယွၤတအၢၣ်လီၤၦၤလၢ ကမၤဘျါက့ၤ ပနီၢ်ခိအတၢ်ဂံၢ်စၢ်ဘါစၢ်တဖၣ်န့ၣ်ဘၣ်. ၦၤအိၣ်လၢနိၣ်အကပၤ အဂုၤအဂၤတဖၣ်န့ၣ် ကစၢ်ယ့ၣ်ၡူး တမၤဘျါဝဲလၢ မုၢ်နံၤအံၤန့ၣ်ဘၣ်. ဘၣ်ဆၣ် ၦၤလၢအနာ်အီၤတဖၣ် ကလဲၤခီဖျိပလၢၤဘၣ်ဝဲတၢ်မၤဘျါက့ၤလၢ အဟဲစိာ်န့ၢ်ဝဲ- လၢတၢ်သးဟးဂီၤ ဆူတၢ်မုၢ်လၢ်, တၢ်သူၣ်ဆါသးဆါ ဆူတၢ်ဘျူးတၢ်ဖှိၣ်, တၢ်သူၣ်ဟ့သးဟ့ ဆူတၢ်အဲၣ်တၢ်ကွံ, တၢ်ပာ်ဒ့ၣ်ပာ်ကမၣ် ဆူတၢ်သးအိၣ်ပျၢ်ကပာ်ကွံာ်တၢ်ကမၣ်တဖၣ်န့ၣ်လီၤ. စဲအ့ၣ်အတၢ်ဃုထံၣ်သ့ၣ်ညါ (မ့တမ့ၢ် ထံနိၣ်ကမါ) ကဟ့ၣ်ၦၤ တၢ်မၤဘျါမၤဂ့ၤက့ၤတၢ်ဒ်ကစၢ်ယ့ၣ်ရှူးအသိးန့ၣ်တသ့ဘၣ်. တၢ်ယါဘျါမၤဂ့ၤထီၣ်က့ၤတၢ်န့ၣ် ဟဲခီဖျိသ့ဒၣ်ထဲ တၢ်စူၢ်တၢ်နာ်တမံၤဧိၤန့ၣ်လီၤ.