ဖဲမုၢ်ဘူၣ်နံၤဂီၤ တၢ်မၤလိသကိးလံာ်စီဆှံအကတီၢ်, ပှၤဟဲထီၣ်မၤလိတၢ်အကျါ, ပာ်တဂၤန့ၣ် မ့ၢ်လၢ အဖိမုၣ်လၢအအဲၣ်ဝဲ, ဒီးလူၤဖဲအသးတဂၤ ဟဲက့ၤတုၤဆူဝ့ၢ်အဃိဒီး, ပၢ်တဂၤအံၤ အသးတမုာ်ဝဲဘၣ်, ခီဖျိလၢအဖိမုၣ်အတၢ်အိၣ်မူသကဲာ်ပဝးတဂ့ၤအဃိ, အဖိမုၣ်အိၣ်ဆိး လၢအဟံၣ်န့ၣ် အသးဘၣ်တံာ်တာ်ဝဲဒၣ်န့ၣ်လီၤ. ပိာ်မုၣ်ဟဲထီၣ်မၤလိတၢ်အကျါတဂၤန့ၣ် မ့ၢ်လၢဆါဆိးက့ ဖးယံာ်ဖးထၢ, ဒီးအတၢ်သးၦၢ်ထီၣ်န့ၣ် မၤဘၣ်ဒိအနီၢ်ခိအဃိ, အနီၢ်ကစၢ် တၢ်ဘၣ်အီၤတမုာ်တလၤန့ၣ်လီၤ. တဘျီဘၣ် တဘျီ အတၢ်လဲၤဒုးနဲၣ်ကူစါအသး လၢကသံၣ်သရၣ်တဘျုးဂၤအအိၣ်န့ၣ် အတၢ်ဆါဘျါဂ့ၤထီၣ်ဝဲန့ၣ် မ့ၢ်တၢ်အဆံးအစှၤအဃိ, အနီၢ်သးဂံၢ်ဘါ လီၤစၢ်ဝဲဒၣ်န့ၣ်လီၤ. ခီဖျိတၢ်ဟဲလၢ ယွၤအတၢ်ကူၣ်အပူၤန့ၣ်, လံာ်စီဆှံတတီၤလၢ မုၢ်တနံၤအံၤ ပှၤမၤလိသကိး မ့ၢ်ဝဲ လံာ်မၢ်ကူး အဆၢဒိၣ် ၅ န့ၣ်လီၤ. ဒီးဖဲတၢ်မၤလိကတၢၢ် န့ၣ်ဒီးႇ တၢ်မုၢ်လၢ်ဒီးတၢ်သူၣ်ခုသးခု အိၣ်ဖျါထီၣ်ဝဲဂ့ၤဂ့ၤန့ၣ်လီၤ.
ဖဲ မၢ်ကူး ၅:၂၃ အပူၤန့ၣ်, စီၤယၤအ့ၤရူးႇ မ့ၢ်ပၢ်လၢအအိၣ်ဒီး ဖိလၢအဆါတဂၤ ပာ်ဖျါထီၣ်ဝဲႇ “ယဖိမုၣ်လၢ အနီၢ်ဆံးတဂၤ ကသံတ့ၢ်လီၤ.” ကစၢ်ယ့ၣ်ၡူး အတၢ်လဲၢကျဲဆူပိာ်မုၣ်ဖိသၣ်အအိၣ်န့ၣ်, မၤဘျါဝဲ ပိာ်မုၣ် လၢအဆါဆိးက့ယံာ်တ့ၢ်လံ, ဒီးအမံၤတၢ်တပာ်ဖျါထီၣ်အီၤတဂၤအဂ့ၢ်န့ၣ် ပကထံၣ်ဘၣ်ဖဲ အဆၢဖိ ၃၄ အပူၤ ဒီးစံးဝဲလၢ, “ဖိမုၣ်ဧၢ, နတၢ်နာ် မၤဘျါက့ၤလံ နၤလံ” န့ၣ်လီၤ. စီၤယၤအ့ၤရူးဒီးပိာ်မုၣ်တဂၤအံၤ အတၢ်စူၢ်တၢ်နာ် လၢကစၢ်ယ့ၣ်ၡူးအပူၤန့ၣ် မၤဆူၣ်ထီၣ်အဝဲသ့ၣ်အသးအဃိဒီး ဃုဝဲကစၢ်ယ့ၣ်ရှူး, ဒီးအဝဲသ့ၣ် အသးတဟးဂီၤဘၣ်ဝဲဘၣ်. ဘၣ်ဆၣ် လၢတၢ်ဂ့ၢ်ခံမံၤလိာ်အပူၤန့ၣ်, တချုးလၢအထံၣ်ကစၢ်ယ့ၣ်ၡူး, ဒီးတချုးလၢတၢ်ဟဲဂ့ၤထီၣ်အကတီၢ်န့ၣ် တၢ်အိၣ်အသးတဖၣ် ကဲထီၣ် “တၢ်အတဂ့ၤ, ဒီးတၢ်အတဂ့ၤ နးအါထီၣ်” န့ၣ်လီၤ.
သးသမူ တၢ်အိၣ်သးအကီအခဲတဖၣ်န့ၣ် တကွၢ်မဲာ်တၢ်ဘၣ်. ပိာ်မုၣ်ဂ့ၤပိာ်ခွါဂ့ၤ မ့တမ့ၢ် သးအနံၣ်အလါစၢ်ဂ့ၤပှၢ်ဂ့ၤ, ၦၤကလုာ်ဂ့ၤ, အတီၤအပတီၢ် ဒ်လဲၣ်ဂ့ၤ, ဒ်လဲၣ်ဂ့ၤ, ပဝဲကိးဂၤ ပဘၣ်ကွၢ်ဆၢၣ်မဲာ် တၢ်အိၣ်သးတဖၣ်လၢ အမၤကဒံကဒါပသး, ဒ်သိးဒီး ပကဃုန့ၢ်တၢ်စံးဆၢတဖၣ်အဂီၢ် ဆီၣ်ဆှၢၦၤန့ၣ်လီၤ. ပကပျဲတၢ်တၤတၢ်သ့ၣ်တဖၣ်အံၤ ကမၤယံၤထီၣ်ၦၤဒီးကစၢ်ယ့ၣ်ၡူးအလီၢ်န့ၣ်, မ်ပကဂဲၤပျုၢ်ဂဲၤဆှး ဒီးပျဲတၢ်သ့ၣ်တဖၣ် ကဆီၣ်ဆှၢမၤယိာ်ထီၣ် ပတၢ်စူၢ်တၢ်နာ်ဆူၦၤတဂၤ, ဒ်သိးအဆၢဖိ ၃၀ ပာ်ဖျါဝဲ, ပှၤလၢ အသ့ၣ်ညါ ပှၤဟဲထိးဘၣ်အီၤ, ဒီးမၤဂ့ၤမၤဘျါက့ၤပှၤသ့တဂၤအအိၣ်န့ၣ်တက့ၢ်.
