ယသူၣ်လီၤ တၢ်ချံတစဲးလၢ ပှၤသူၣ်တၢ်အတလါပူၤဝံၤ, ယအိၣ်ခိးကွၢ်တၢ်အစၢန့ၣ်လီၤ. ယဖးဘၣ်လၢ တၢ်ချံတဖၣ် ကမဲထီၣ်ဝဲ ဖဲအသီ (၁၀) ဆူ (၁၄) သီ အတီၢ်ပူၤအဃိ, ဖဲယလူထံအကတီၢ် ယကွၢ်ထံန့ၣ်လီၤ. တယံာ်ဘၣ်န့ၣ်, ယထံၣ်လၢ အလၣ်လါဟ့ဖိတဖၣ် ဟဲမဲထီၣ်လၢဟီၣ်ခိၣ်န့ၣ်လီၤ. ဘၣ်ဆၣ် ဖဲယဝၤစံးဘၣ်ယၤလၢ တၢ်မုၢ်တဖၣ်န့ၣ်မ့ၢ်ဒၣ်နီၣ်ဧိၤတပံၢ်န့ၣ်ဒီး, ယတၢ်သးခုတၢ်သးမုာ်တဖၣ် လီၤမၢ်ကွံာ်ချ့သဒံးန့ၣ်လီၤ. အဝဲတဲဘၣ် ယၤလၢ ပဘၣ်ပဲာ်ပျီကွံာ် နီၣ်တဖၣ်ချ့ချ့ ဒ်သိး အသုတလုာ်ဘၢကွံာ် တၢ်မုၢ်တၢ်ဘိလၢ ယအဲၣ်ဒိးသူၣ်အီၤအဂီၢ်န့ၣ်လီၤ.
ကစၢ်ယ့ၣ်ရှူးစ့ၢ်ကီး စံးဘၣ်ပှၤလၢ တၢ်ဘှါဆှဲ တၢ်လၢအဆွံနုာ်ဆူၣ်အသးလၢ အသ့မၤဟးဂီၤ ပနီၢ်သးအတၢ်ဒိၣ်ထီၣ်ထီထီၣ်တၢ်န့ၣ် မ့ၢ်တၢ်အကါဒိၣ်တမံၤန့ၣ်လီၤ. မး ၁၃:၇ အပူၤန့ၣ် အဝဲဒုးနဲၣ် အတၢ်ကတိၤဒိ, ပှၤလၢအဖှံတၢ်တဂၤ လဲၤဖှံလီၤတၢ်, ဒီးတၢ်ချံတနီၤ “လီၤဘၣ် လၢတၤဆှုၣ်တၤမဲ… ဒီးခဲဘၢကွံာ်အီၤလီၤ” န့ၣ်လီၤ. အဆၢဖိ ၂၂ ပာ်ဖျါဝဲ တၤဆှုၣ်တၤမဲ, မ့တမ့ၢ် နီၣ်တဖၣ်န့ၣ်, ဒ်သိးကတြီမၤတံာ်တာ် တၢ်မုၢ်တၢ်ဘိ အတၢ်ဒိၣ်ထီၣ်အဂီၢ် ကမၤတၢ်ဒ်န့ၢ်အသိးန့ၣ်လီၤ. ဒီးတၢ်ဘၣ်ယိၣ်ဘၣ်ဘီ မ့ၢ်တၢ်လၢ အမၤကီမၤခဲ ပနီၢ်သးအတၢ်ဒိၣ်ထီၣ်န့ၣ်လီၤ. တၢ်ဖးလံာ်စီဆှံ, ဒီးတၢ်ဃ့ထုကဖၣ် မ့ၢ်ကျဲအဂ့ၤ လၢတၢ်ဒုးဒိၣ်ထီၣ် ပတၢ်စူၢ်တၢ်နာ်ဘၣ်ဆၣ်, အလီၢ်အိၣ်လၢ ယကဘၣ် ပလီၢ်သူၣ်ပလီၢ်သးလၢတၤဆှုၣ်တၤမဲ, လၢအမ့ၢ်တၢ်ဘၣ်ယိၣ်ဘၣ်ဘီန့ၣ် ယသ့ၣ်ညါဝဲဒၣ်န့ၣ်လီၤ. တၢ်ဘၣ်ယိၣ်ဘၣ်ဘီတဖၣ်အံၤ ကခဲဘၢဝဲ ယွၤအကလုၢ်ကထါအိၣ်သူၣ်လီၤအသးလၢယပူၤ, ဒီးကမၢယထံၣ်တၢ်ထဲ တၢ်ကမူၤကမၣ်, လၢအကဟဲအိၣ်ထီၣ်တဖၣ်န့ၣ်လီၤ.
သးအတၤသၣ်, လၢကလၤ ၅:၂၂ အပူၤ, အိၣ်ဃုာ်ဒီး တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိးန့ၣ်လီၤ. ဘၣ်ဆၣ် ဒ်သိးပကသၣ်ထီၣ်တၤသၣ်တဖၣ်အံၤအဂီၢ်, ခီဖျိလၢကစၢ်ယွၤအဂံၢ်အဘါအပူၤ ပကဘၣ်ပဲာ်ပျီဆှဲကွံာ် တၢ်သးဒ့ဒီအနီၣ်, မ့တမ့ၢ် တၢ်ဘၣ်ယိၣ်ဘၣ်ဘီအနီၣ်တဖၣ် လၢအထုးယံၤကွံာ်ပသးဆူတၢ်အဂၤ ဒ်သိး ပသုတကွၢ်တၢ်ထဲဆူ ကစၢ်ခရံာ်အအိၣ်န့ၣ်လီၤ.
