ပတၢ်လဲၤဆူ ပဖါတံၢ် အတၢ်သံအမူးန့ၣ် ယဒ့မုၣ်, ယဝဲၢ်ပိာ်ခွါ, ဒီးယၤ ပအိၣ်ဒိးထီၣ် ကဘီယူၤလၢ ပအိၣ်ဆိးတၢ်အလီၢ်ဒၣ်ဝဲ, ဒီးလၢကျဲန့ၣ် ပအိၣ်ကတီၢ်, နုာ်လီၤထံၣ် ပဖံလၢ အသးအိၣ်ခွံဆံလံန့ၣ်လီၤ. အဝဲဘၣ်ကလံၤ, ဒီးကတိၤတၢ်တသ့ဘၣ်ဆၣ်, အစုထွဲတခီ မၤဟူးဝးဝဲန့ၢ်ဝဲဒၣ်န့ၣ်လီၤ. ဖဲပဆၢထၢၣ်အိၣ်ဝးတရံးအီၤန့ၣ်ဒီး အဝဲယူာ်ထီၣ်အစု, ဒီးဟံးပစုတဖၣ်ဒီး ပာ်ဖှိၣ်ထီၣ်ဝဲ ဖဲအသးနါပှၢ်လိၤဒီးဒဲဝဲကဖီလီဖိန့ၣ်လီၤ.ခီဖျိလၢအတၢ်ဟူးဂဲၤအံၤ
ပဖံစံးကတိၤတၢ် အိၣ်ဒီးအခီပညီလၢ ပဒီပုၢ်ဝဲၢ်တဖၣ် ပအိၣ်ယံၤ, အိၣ်လီၤဖးလိာ်သးတဖၣ် အတၢ်ရ့လိာ်ဘၣ်ထွဲ ကဘၣ်အိၣ်ဝဲ, မ့ၢ်မးလၢ “ဒူၣ်ဖိထၢဖိန့ၣ် မ့ၢ်တၢ်လၢအကါဒိၣ်” အဃိန့ၣ်လီၤ.

လၢယွၤအဒူၣ်ဖိထၢဖိအပူၤ, လၢတၢ်အိၣ်ဖှိၣ်အပူၤ ပဒိၣ်ထီၣ်တဂၤတပူၤ သ့ဝဲစ့ၢ်ကီးန့ၣ်လီၤ. ဘၣ်သ့ၣ်သ့ၣ် ပကပျဲတၢ်သးဆါသးခၣ် လၢကမၤလီၤဖးပှၤတဂၤဒီးတဂၤန့ၣ်လီၤ. ဧ့ၤဘြံၤ ၁၂:၁၆ န့ၣ် ပှၤကွဲးလံာ်ကွဲးဘၣ်ထွဲ တၢ်သးဆါသးခၣ်အဂ့ၢ်လၢမၤလီၤဖး စီၤဧ့ရှီဒီး အဒီပုၢ်ဝဲၢ်, ဒီးမ့ၢ်တၢ်တၤပှၤလၢ ပကဟံးဃာ်လိာ်ပသးလၢ ယွၤအဒူၣ်ဖိထၢဖိအပူၤ ဒ်ဒီပုၢ်ဝဲၢ်မုၣ်, ဒီးဒီပုၢ်ဝဲၢ်ခွါအသိးန့ၣ်လီၤ. အဆၢဖိ ၁၄ န့ၣ်ပာ်ဖျါဝဲလၢ “လူၤတၢ်မုာ်တၢ်ဖိးဒီးပှၤခဲလၢာ်တက့ၢ်” န့ၣ်လီၤ. ဖဲအံၤ တၢ်ကတိၤ “လူၤ” လၢအဲကလံးကျိာ်ပာ်ဖျါ “ကျဲးစၢးထုးဂံၢ်ထုးဘါမၤတၢ်” (Make every effort) ပာ်ဖျါန့ၢ်ပှၤလၢ ပကဘၣ် ဘျၢလီၤသူၣ်လီၤ တၢ်အမိၢ်ပှၢ်ခီၣ်ထံး အိၣ်ဒီး တၢ်ပာ်လီၤသးကျၢၤကျၢၤ လၢတၢ်သူၣ်ထီၣ် တၢ်ဃူတၢ်ဖိးအတၢ်မၤလၢ ယွၤအဒူၣ်ဖိထၢဖိ, ဒီပုၢ်ဝဲၢ်မုၣ်, ခွါတဖၣ်အကျါန့ၣ်လီၤ.
တၢ်ဂဲၤပျုာ်ဂဲၤဆှးတမံၤစုာ်စုာ်ဒ်သိးအံၤ ကဘၣ်တၢ်မၤအီၤလၢ ပှၤကိးဂၤ, ပှၤတဂၤစုာ်စုာ်န့ၣ်လီၤ.

ဒုၣ်ဖိထၢဖိမ့ၢ် တၢ်လၢအကါဒိၣ်န့ၣ်လီၤ. ဟီၣ်ခိၣ်ဒူၣ်ဖိထၢဖိဂ့ၤ, ယွၤအဒူၣ်ဖိထၢဖိလၢအမ့ၢ် ပှၤစူၢ်က့ၤနာ်က့ၤတၢ်တဖၣ်ဂ့ၤ မ့ၢ်တၢ်လၢအကါဒိၣ်န့ၣ်လီၤ. မ့ၢ်ပကသူၣ်လီၤဘျၢလီၤ တၢ်ဂုာ်ကျဲးစၢးလၢအလိၣ်တဖၣ် လၢတၢ်ဟံးဃာ်ဂၢၢ်ကျၢၤလိာ်သး တဂၤဘၣ်တဂၤအဂီၢ်န့ၣ်ဧၣ်.