ဒီရသံၣ်(Dorothy)စံးဝဲ, “တၢ်လီၢ်ဒ်သိးဟံၣ်တအိၣ်နီတပူၤဘၣ်,”ဒီး ဆဲးထူလီၤအခီၣ်ဖံးဂီၤဂီၤအခံလီၤ. ဖဲတၢ်တဲပူ “The Wizard of Oz” (တၢ်သမူပယၢ်လၢအီး(ဇ) )အပူၤ, တၢ်အံၤ မ့ၢ်ကျဲလၢအလီၤလးဒိၣ်မး လၢအကဆှၢကဒါက့ၤ ဒီရသံၣ် ဒီးထိထိၣ် (Toto)ခံဂၤ လၢ အီး(ဇ) (Oz) ဆူအဟံၣ်လၢ ဝ့ၢ်ခဲ(န)စၢးန့ၣ်လီၤ.
လၢတၢ်ဟဲဝံတဂ့ၤဘၣ်အပူၤ, ပှၤကိးဂၤအဂီၢ် ခီၣ်ဖံးဂီၤဖိ တအိၣ်ဝဲလၢလၢ လီၢ်လီၢ်ဘၣ်. ပှၤအါဂၤအသးကလၢၢ်ဘၣ်ဝဲ ဒ်သိး ဒီရသံၣ် အတၢ်ဆၢက့ၤဆူအဟံၣ် ဘၣ်ဆၣ်, ပထံၣ်ဘၣ်လၢ ဟံၣ်-တၢ်လီၢ်အဘၣ်ထွဲဒီးပှၤအံၤ, ဘၣ်တဘျီဘျီန့ၣ် ပကစံးကတိၤအီၤ ညီန့ၢ်ဒံး ပကမၤအီၤအဂီၢ်န့ၣ်လီၤ.
ဟီၣ်ခိၣ်လၢ အဆီတလဲသးညီ ဒီးလၢအမ့ၢ်တၢ်တစိၢ်တလီၢ်အပူၤ တၢ်အိၣ်မူ အိၣ်ဂဲၤန့ၣ်, တၢ်အစၢပိာ်ထွဲထီၣ်အခံတဖၣ်ကျါ တမံၤမ့ၢ်ဝဲ ပသးကလၢၢ်ဘၣ်လၢ တၢ်တဘၣ်ထွဲဒီးပှၤ – ပဆိကမိၣ်ထီၣ်လၢ မ့ၢ်ပကထံၣ်န့ၢ် တၢ်လီၢ်လၢအဘၣ်ထွဲဒီးပှၤနီၢ်နီၢ် ဘၣ်ကသ့ကစီဒီဧၣ်န့ၣ်လီၤ. တၢ်သးပလၢၢ်ဘၣ်အံၤ ပာ်ဖျါထီၣ်က့ၤ တၢ်မ့ၢ်တၢ်တီနီၢ်နီၢ် ဒ်စံၣ် အဲး(စ) လူဝ့း(စ) ပာ်ဖျါဝဲ, “ယမ့ၢ်ထံၣ်လီၤက့ၤယသးလၢ ယတၢ်ဆၢမိၣ်န့ၢ်ဘၣ်လၢဟီၣ်ခိၣ်အတၢ်လဲၤခီဖျိတဖၣ် မၤမံသူၣ်မံသးယၤမ့ၢ်တသ့န့ၣ်, ဘၣ်သ့ၣ်သ့ၣ် တၢ်တဲနၢ်ပၢၢ်အဂ့ၤကတၢၢ် လၢယဂီၢ်ကမ့ၢ်ဝဲ ယဘၣ်တၢ်တ့န့ၢ်ယၤလၢ ဟီၣ်ခိၣ်အဂၤတဘ့ၣ်အဂီၢ်န့ၣ်လီၤ.”
တချုးဖဲကစၢ်ယ့ၣ်ရှူး ဘၣ်တၢ်ပျၤထီအီၤအနၤန့ၣ်, တဲလီၤတံၢ် အတံၤသကိးတဖၣ်လၢ ဟံၣ်အံၤန့ၣ်အဂ့ၢ်, ဒီး ယိၤ ၁၄:၂ အပူၤစံးဝဲ, “တၢ်အိၣ်အလီၢ်လၢ ယပၢ်အဟံၣ်ပူၤန့ၣ် အိၣ်အါပူၤလီၤ. မ့တမ့ၢ်ဘၣ်ဒီး ယကစံးဘၣ်တဲဘၣ်သုလီၤ. ယလဲၤကတဲာ်ကတီၤ သုလီၢ်တပူၤလီၤ” န့ၣ်လီၤ. ဟံၣ်တဖျၢၣ်လၢ ပကဘၣ်တူၢ်လိာ်မုာ်ပှၤ, ဒီးပဘၣ်တၢ်အဲၣ်ပှၤန့ၣ်လီၤ.
ခဲကနံၣ်အံၤစ့ၢ်ကီး ပအိၣ်လၢဟံၣ်သ့ဝဲဒၣ်န့ၣ်လီၤ. ပမ့ၢ်ယွၤအတၢ်အိၣ်ဖှိၣ် အဒူၣ်ဖိထၢဖိ, ဒီးပအိၣ်ဆိး ဖဲလၢပဒီပုၢ်ဝဲၢ်မုၣ်, ပဒီပုၢ်ဝဲၢ်ခွါလၢခရံာ်အပူၤတဖၣ် အပှၤတဝၢပူၤန့ၣ်လီၤ. တုၤကစၢ်ယ့ၣ်ရှူးက့ၤစိာ်ပှၤဆူဟံၣ်လၢ ပသးဆၢတုၤအိၣ်ဝဲ တစုန့ၣ်, ပအိၣ်မူလၢ အတၢ်ဃူတၢ်ဖိး ဒီးအတၢ်သးခုအပူၤသ့ဝဲန့ၣ်လီၤ. ပအိၣ်ဒီးကစၢ်ယ့ၣ်ရှူးလၢဟံၣ်ပူၤထီဘိန့ၣ်လီၤ.
