စဲး(သ်) (Seth) ဟံးန့ၢ်အီလီၤ ကသံၣ်ကသီတဖၣ်ခဲလၢာ်လၢ အထံၣ်န့ၢ်ဝဲ ဖဲတၢ်ပာ် ကသံၣ်ဖီၣ်အလီၢ်န့ၣ်လီၤ. စဲး(သ်) ဒိၣ်ထီၣ်ဘၣ်ဝဲဟံၣ်ဃီလၢ တၢ်မုာ်တၢ်ပၢၤတအိၣ်, ဒီးလၢတၢ်တလိၤတဃီၤအပူၤအဃိ, အတၢ်အိၣ်မူန့ၣ် သဘံၣ်ဘုၣ်ဝဲဒၣ်န့ၣ်လီၤ. အပၢ်န့ၣ်မၤဘၣ်ဒိဆါ အမိၢ်လၢ တၢ်စုဆူၣ်ခီၣ်တကးထီဘိ တုၤလီၤလၢ အမၤသံလီၤက့ၤအသးတစုန့ၣ်လီၤ. ခဲအံၤ စဲး(သ်) အဲၣ်ဒိး “မၤကတၢၢ်ကွံာ်” အသးသမူ န့ၣ်လီၤ. ဘၣ်ဆၣ်တၢ်ဆိကမိၣ် “ယမ့ၢ်သံယကလဲၤဆူလဲၣ်” ဟဲနုာ်လီၤလၢအသးပူၤန့ၣ်လီၤ. လၢယွၤအဘျုးအဃိ တသံဝဲဒၣ် ဖဲမုၢ်နံၤအံၤန့ၣ်ဘၣ်. လၢတၢ်ဘၣ်ဆၢဘၣ်ကတီၢ်အပူၤ, အဝဲမၤလိသကိးလံာ်စီဆှံဒီးအတံၤသကိး ဝံၤအလီၢ်ခံ, တူၢ်လိာ် ကစၢ်ယ့ၣ်ရှူး ဒ်ပှၤအုၣ်က့ၤခီၣ်က့ၤအီၤန့ၣ်လီၤ. တၢ်လၢအထုးန့ၢ်က့ၤအီၤဆူ ယွၤ အအိၣ်အကျါတမံၤန့ၣ် မ့ၢ်လၢအထံၣ်ဘၣ် တၢ်ဃံတၢ်လၤ, ဒီးတၢ်အဂ့ၢ်အဝီအိၣ်လၢတၢ်ဘၣ်တ့အပူၤအဃိန့ၣ်လီၤ. စဲး(သ်) စံးဝဲလၢ, “ယထံၣ်ဘၣ် တၢ်လၢအဃံဝဲလၤဝဲတဖၣ်န့ၣ်လီၤ. ပှၤတဂၤဂၤတ့လီၤ တၢ်တဖၣ်အံၤခဲလၢာ်န့ၣ်လီၤ.”

၁ မိၤရှ့ ၁ န့ၣ် ပဖးဘၣ်လၢ ယွၤမ့ၢ်ပှၤနီၢ်နီၢ်လၢအတ့လီၤတၢ်ခဲလၢာ်န့ၣ်လီၤ. ဒီးအဆၢဖိ ၂ စံးဝဲဒၣ် ဟီၣ်ခိၣ်အံၤ အိၣ်သယုၢ်အိၣ်ကလီ (သဘံၣ်ဘူၣ်ဆးဃၢ), ဘၣ်ဆၣ် ယွၤဒုးအိၣ်ထီၣ် တၢ်ကိးမံၤလၢ အလီၢ်အလီၢ်ဒၣ်ဝဲ လၢတၢ်သဘံၣ်ဘုၣ်ဆးဃၢအပူၤ, ဒီးအဆၢဖိ ၄ စံးဘၣ်ပှၤလၢ “နီၤဖးတၢ်ကပီၤဒီးတၢ်ခံး,” ဒီးအဆၢဖိ ၁၀ ပာ်ဖျါဝဲ ခိအိၣ်ဖျါထီၣ်လၢ ထံဂီၢ်မုၢ်အပူၤ, ဒီးအဆၢဖိ ၁၁-၁၂,၂၁,၂၄-၂၅ န့ၣ်ယွၤဒုးအိၣ်ထီၣ် ဘုဟု, သ့ၣ်ဝၣ် ဒ်အကလုာ်ဒၣ်ဝဲအသိးန့ၣ်လီၤ. ယရှါ ၄၅:၁၈ ပာ်ဖျါထီၣ် ပှၤလၢ “အတ့လီၤမူခိၣ်ဒီးဟီၣ်ခိၣ် ဒီးပာ်တၢ်ခဲလၢာ်လၢအလီၢ်ဒၣ်ဝဲ” တဂၤအံၤ, ဒ်စဲး(သ်) ဃုထံၣ်ဝဲအသိး, ဟဲစိာ်နုာ်တၢ်ဃူတၢ်ဖိး ဒီးတၢ်လၢအဂ့ၢ်အဝီဒၣ်ဝဲဆူ ပှၤလၢအဟ့ၣ်လီၤအးလီၤအသးဆူ ကစၢ်ခရံာ်အစုပူၤတဖၣ်အဂီၢ်န့ၣ်လီၤ.

တၢ်အိၣ်မူအပူၤ တၢ်သဘံၣ်, ဒီးလၢပဂီၢ်န့ၣ်ကဲထီၣ် တၢ်တၤတၢ်သ့ဝဲဒၣ်လီၤ. ၁ကရံၣ် ၁၄:၃၃ စံးဘၣ်ပှၤလၢ အဝဲတမ့ၢ်ပှၤလၢအမၤ “တၢ်တၢထီၣ်တၢလီၤဘၣ်. မ့ၢ်အဘၣ်ဃးဒီး တၢ်ဃူတၢ်ဖိး” အဃိ စံးထီၣ်ပတြၢၤယွၤတက့ၢ်န့ၣ်လီၤ. တနံၤအံၤ မ်ပကိးထီၣ်ယွၤ, ဒီးဃ့အီၤ ဒ်သိးအကမၤစၢၤပှၤ လၢပကဃုထံၣ်န့ၢ် တၢ်ဃံတၢ်လၤ ဒီးတၢ်ဘၣ်လီၢ်ဘၣ်စး, ထဲဒၣ်လၢယွၤတဂၤဧိၤ ဟ့ၣ်ပှၤသ့န့ၣ်တက့ၢ်.