ဖဲယသိးထီၣ်သီ ယမဲာ်ဒိးအသီလၢတၢ်အဆိကတၢၢ်တဘျီန့ၣ် ယသူၣ်ဟူးသးဂဲၤယဲဒိၣ်မးဘၣ်ဆၣ်, လၢတၢ်ဆၢကတီၢ်စှၤနၣ်ရံၣ်ဝံၤအလီၢ်ခံ, ယအဲၣ်ဒိး စူးကွံာ်အီၤန့ၣ်လီၤ. ယမဲာ်ချံ ဒီးယခိၣ်ဆါထီၣ် ဖဲယသိးမဲာ်ဒိးအံၤန့ၣ်လီၤ. ယနၢ်ခံခီ ညိးထီၣ် မ့ၢ်လၢမဲာ်ဒိးအံၤ တညီနုၢ်ဒီးယၤအဃိန့ၣ်လီၤ. လၢခံတနံၤ, ဖဲယသ့ၣ်နီၣ်လၢ ယဘၣ်သိးထီၣ်မဲာ်ဒိးအံၤန့ၣ်ဒီး ယကအုကစွါယဲဒၣ်န့ၣ်လီၤ. တနံၤဘၣ်တနံၤ, ယဘၣ်ဃုထၢစူးကါမဲာ်ဒိး, ဒ်သိးယနီၢ်ကစၢ် ကဘၣ်လိာ်ဘၣ်စးဒီးမဲာ်ဒိးကသ့အဂီၢ်န့ၣ်လီၤ. ဘၣ်ဆၣ် တဘျုးနွံဝံၤအလီၢ်ခံန့ၣ်, ယသိးဃာ်မဲာ်ဒိးဒၣ်လဲာ် ယတပာ်သူၣ်ပာ်သးလၢၤဘၣ်န့ၣ်လီၤ.
လၢတၢ်သိးထီၣ် တၢ်အသီတမံၤမံၤန့ၣ် လိၣ်ဘၣ်တၢ်မၤဘၣ်လိာ်ဘၣ်စးက့ၤ တၢ်ဘၣ်ဆၣ်, ယံာ်ထီၣ်န့ၣ်ဒီး ကဲထီၣ်တၢ်ညီနုၢ်အဃိ, ဘၣ်ဘျိးဘၣ်ဒါဂ့ၤဒိၣ်ထီၣ်လၢပဂီၢ်န့ၣ်လီၤ. တၢ်လၢအပူၤကွံာ် ပတထံၣ်အီၤတဖၣ်ဒၣ်လဲာ် ပကထံၣ်ဘၣ်တၢ်တမံၤမံၤ, န့ၣ်လီၤ. လၢလံာ်ရိမ့ၤ ၁၃ :၁၂ န့ၣ် ပှၤတၢ်မၢဖိစီၤပီလူး မၤလိာ် ပှၤလၢအပိာ်ကစၢ်ခရံာ်အခံတဖၣ်, က“ဟံးထီၣ်သကိး တၢ်ကပီၤအစုကဝဲၤ,” ဒီးကအိၣ်မူအိၣ်ဂဲၤ တၢ်အိၣ်မူအဂ့ၤအဝါန့ၣ်လီၤ. အဆၢဖိ ၁၁-၁၃ စံးဘၣ်ပှၤ, အဝဲသ့ၣ် မ့ၢ်ပှၤစူၢ်က့ၤနာ်က့ၤတ့ၢ်လံ ကစၢ်ယ့ၣ်ရှူးဘၣ်ဆၣ်, ဖျါလၢ အဝဲသ့ၣ် “မံခ့မံသပ့ၤ”, ဒီးအသးမံဒၣ်အတၢ်ဒၣ်ဝဲအဃိ, အဝဲသ့ၣ် လိၣ်ဘၣ်တၢ် “ကဖုသံနီၣ်” ဒီးဟံးန့ၢ်မူဒါ, ပာ်သူၣ်ပာ်သးအတီအလိၤ, ဒီးစူးကွံာ်ညိကွံာ် တၢ်ဒဲးဘး, တၢ်ခံးအတၢ်မၤကိးမံၤန့ၣ်လီၤ. အဆၢဖိ ၁၄ န့ၣ် စီၤပီလူး ဟ့ၣ်သဆၣ်ထီၣ် အဝဲသ့ၣ်လၢ ကကူထီၣ်သိးထီၣ်ကစၢ်ယ့ၣ်ရှူး, ဒီးလၢတၢ်ဆိကမိၣ် ကလီၤဂာ်ဒီးလၢတၢ်ဖံးတၢ်မၤတဖၣ်အပူၤ, ဒ်သိးလီၤဂာ်အါထီၣ်ဒီးကစၢ်ယ့ၣ်ရှူးအဂီၢ်န့ၣ်လီၤ.
ကစၢ်ယ့ၣ်ရှူး အတၢ်အဲၣ်တၢ်ကွံ, အတၢ်သးစူၤ, အတၢ်သးကညီၤ, အတၢ်ဘျုးတၢ်ဖှိၣ်, ဒီးအတၢ်တီတၢ်လိၤကျိၤကျဲတဖၣ်န့ၣ် ပစးထီၣ် ဆဲးကပီၤကဒါက့ၤ လၢတၢ် တနၤဃီအတီၢ်ပူၤ တန့ၢ်တသ့ဘၣ်. တၢ်အံၤမ့ၢ်တဆီဘၣ်တဆီ တၢ်လဲၤကျဲလၢအယံၤ, လၢတၢ်ဃုထၢ “ဟံးထီၣ်သကိး တၢ်ကပီၤအစုကဝဲၤ” ကိးမုၢ်နံၤဒဲး, ဒီးမ့ၢ်လၢတၢ်မၤအံၤ တမုာ်တပၢၤဝဲအဃိ တုၤဒၣ်လဲာ် ပတသးအိၣ်မၤအီၤလၢၤဘၣ်န့ၣ်လီၤ. တၢ်ဆၢကတီၢ်ဒ်ယံာ်ထီၣ်န့ၣ်, ဒ်သိးပကဂ့ၤအါထီၣ်အဂီၢ် အဝဲဆီတလဲက့ၤပှၤန့ၣ်လီၤ.
