ဘၣ်တဘျီ ယတၢ်လဲၤတၢ်လၢကဘီယူၤအကတီၢ်, ပိာ်မုၣ်ဆ့ၣ်နီၤလၢယကပၤတဂၤန့ၣ် တဲယၤလၢ အဝဲမ့ၢ် ပှၤလၢအတၢ်ဘူၣ်တၢ်ဘါတအိၣ်နီတမံၤဘၣ်န့ၣ်လီၤ. ဒီးအဝဲသုးလီၢ်သုးကျဲဟဲအိၣ်ဆိး လၢဝ့ၢ်ဖိတဝ့ၢ် လၢပှၤခရံာ်ဖိတဖၣ် အိၣ်ဆိးဝဲအါမးအလီၢ်န့ၣ်လီၤ. ဖဲအဝဲတဲဖျါထီၣ် ပှၤအိၣ်လၢ အဟံၣ်ဃၢၤအါဂၤ လဲၤထီၣ်သရိာ်န့ၣ်ဒီး, ယသံကွၢ် အသးကလၢၢ်ဘၣ်တၢ်ဒ်လဲၣ်အဂ့ၢ်န့ၣ်လီၤ. ပိာ်မုၣ်အံၤစံးဝဲဒၣ်လၢ ပှၤသ့ၣ်တဖၣ် အတၢ်သူၣ်အိၣ်သးအိၣ်ဟ့ၣ်မၤစၢၤတၢ်အဂီၢ်, အဝဲကဟ့ၣ်ဆၢက့ၤတၢ် တန့ၢ်နီတဘျီ လၢၤဘၣ်န့ၣ်လီၤ. ဖဲအဝဲဟဲက့ၤကိးအပၢ်လၢ အဟးထီၣ်က့ၤလီၤ တသ့ဘၣ်တဂၤ ဆူထံကီၢ်အသီ တဘ့ၣ်အံၤအဆၢကတီၢ်န့ၣ်, ပှၤအိၣ်ဆိးလၢအဟံၣ်အဃၢၤတဖၣ် ဘှီန့ၢ် တၢ်လီၤတစွၤလၢ တၢ်လဲၤခီထီၣ်ခီလီၤ ဆူအဟံၣ်ကညီဒီးကမုာ်ဝဲလၢအပၢ်အဂီၢ်, ဒီးဟ့ၣ်မၤဘူၣ် တၢ်ဆါဟံၣ်လီၢ်မံခးတဖျၢၣ်, ဒီးကသံၣ်ကသီတဖၣ်န့ၣ်လီၤ. အဝဲစံးဝဲဒၣ်, “တၢ်ကဲခရံာ်ဖိတဂၤ မ့မ့ၢ်ပှၤသူၣ်ဂ့ၤသးဝါ ဒ်သိးအံၤန့ၣ်ဒီး, ပှၤကိးဂၤဒဲး ကြၢးကဲဝဲဒၣ်ပှၤခရံာ်ဖိန့ၣ်လီၤ.”
ကစၢ်ယ့ၣ်ရှူး မုၢ်လၢ်တၢ်တမံၤဃီ ဒ်ပိာ်မုၣ်တဂၤအံၤ စံးဝဲအသိးန့ၣ်လီၤ. ဖဲလံာ်မးသဲ ၅:၁၆ န့ၣ်, ကစၢ်ယ့ၣ်ရှူး စံးဘၣ်အပျဲၢ်အဘီၣ်တဖၣ်လၢ “သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါ ဒ်သိးအကထံၣ်ဘၣ်သုမၤတၢ်ဂ့ၤ, ဒီးစံးထီၣ်ပတြၢၤ သုပၢ်အိၣ်လၢမူခိၣ်န့ၣ်တက့ၢ်” န့ၣ်လီၤ. စီၤပ့းတရူးနၢ်ဟူ ခရံာ်အတၢ်မၤလိာ်အံၤ ဒီးဟ့ၣ်ခီဟ့ၣ်နီၤလီၤ ဖဲ ၁ ပ့းတရူး ၂:၁၂ အပူၤ “မ်သုအိၣ်ဒီးသုတကဲာ်ပဝးဂ့ၤ လၢပှၤကလုာ်တဖၣ်အကျါ, ဒ်သိးပှၤလၢအစံးအၢသု ဒ်ပှၤမၤတၢ်အၢတၢ်သီန့ၣ်, တုၤအကွၢ်သုမၤတၢ်ဂ့ၤဒီး, ကစံးထီၣ်ပတြၢၤယွၤ, ဖဲတၢ်အိၣ်သကိးအမုၢ်နံၤန့ၣ်တက့ၢ်” န့ၣ်လီၤ.
ပှၤအိၣ်ဆိးလၢပခိၣ်ပဃၢၤ လၢအတစူၢ်က့ၤနာ်က့ၤကစၢ်ယ့ၣ်ရှူးတဖၣ်န့ၣ် တမ့ၢ်လၢကနၢ်ပၢၢ် တၢ်လၢပနာ် ဒီးဘၣ်မနုၤအဃိ ပနာ်တၢ်လဲၣ်န့ၣ်ဘၣ်. တၢ်အိၣ်ဒံးဆူညါတမံၤလၢ အဝဲသ့ၣ်နၢ်ပၢၢ် တသ့ဘၣ်န့ၣ် မ့ၢ်ဝဲပတၢ်အဲၣ်လၢ အလဲၤတလၢကွံာ်တၢ်အဃိ တဘၣ်ကိၢ်ဘၣ်ဂီၤတဂ့ၤ. ပိာ်မုၣ် အဆ့ၣ်နီၤလၢ ယကပၤတဂၤအံၤန့ၣ် ကမၢကမၣ်ဝဲဒၣ်လၢ ပှၤခရံာ်ဖိလၢအဟံၣ်ဃၢၤတဖၣ်န့ၣ်, ဖဲအဝဲတမ့ၢ်ပှၤခရံာ်ဖိတဂၤ ဒ်အဝဲသ့ၣ်အသိးဒၣ်လဲာ်န့ၣ်, သူၣ်အိၣ်သးအိၣ်အီၤထီဘိအဃိန့ၣ်လီၤ. မ့ၢ်လၢကစၢ်ယ့ၣ်ရှူးအဃိ အဝဲဘၣ်တၢ်အဲၣ်အီၤန့ၣ်, သ့ၣ်ညါဝဲဒၣ်, ဒီးစံးဘျုးစံးဖှိၣ်ကစၢ်ယွၤ န့ၣ်လီၤ. အဝဲတမ့ၢ်ဒံးဘၣ် ပှၤလၢအစူၢ်က့ၤနာ်က့ၤကစၢ်ယ့ၣ်ရှူးဘၣ်ဆၣ်, မ့ၢ်လၢပှၤဂုၤပှၤဂၤတဖၣ် စူၢ်က့ၤနာ်က့ၤကစၢ်ယ့ၣ်ရှူးအဃိ, အဝဲစံးဘျုးစံးဖှိၣ်ဝဲဒၣ်န့ၣ်လီၤ.
