ဖဲလါမၢ်ရှး, ၁၉၄၅ နံၣ်န့ၣ်, “တၢ်တဃၣ် အသုးမုၢ်” (Ghost Army) မၤစၢၤ အမဲရကၤ ပှၤသုးဖိ တဖၣ်လၢကလဲၤခီဂာ် ရဲ(န)ထံကျိ Rhine River အဂီၢ်- ဒီးဟ့ၣ်ထီၣ်ဝဲ ထံကီၢ်လၢဒုးသကိးတၢ် တဖၣ်အဂီၢ်, တၢ်လီၢ်တၢ်ကျဲအဂံၢ်ခီၣ်ထံးလၢအကါဒိၣ်, ဖဲလၢဟီၣ်ခိၣ်ဒီဘ့ၣ်တၢ်ဒုးခံဘျီတဘျီ, ကီၢ်ယူရပၤမုၢ်နုာ် တၢ်ဒုးပျီအဂီၢ်န့ၣ်လီၤ. ပှၤသုးဖိတဖၣ်အံၤ မ့ၢ်ဒၣ်ပှၤကညီနီၢ်နီၢ်, ဒီးတမ့ၢ်တၢ်ကဒု ကလၤ, တၢ်တဃၣ်ဘၣ်. အဝဲသ့ၣ်ခဲလၢာ်န့ၣ် ဘၣ်ထွဲဒီး သုးလီၢ်ခၢၣ်သး ၂၃ဖုတဖု အပှၤသုးဖိ စဲၣ်နီၤတဖၣ်န့ၣ်လီၤ. ဖဲတၢ်ဒုးတဘျီအံၤ, ပှၤကညီအိၣ်နီၢ်ဂံၢ် ၁,၁၀၀ တဖုအံၤ ဘၣ်မၤလီၤဂာ်အသး ဒ်ပှၤအိၣ်အဂၤ ၃၀,၀၀၀ အသိး, ခီဖျိ တၢ်စူးကါ ဂာ်သဝံ သိလ့ၣ်ထး အဂီၤတဖၣ်, သုးတဖုလၢ အမၤပိာ်ဖးတၢ်, ဒီးသိလ့ၣ်ကဟၣ်အသီၣ်ဖးဒိၣ်န့ၣ် မၤသီၣ်ဒိၣ်ထီၣ်လၢ သီၣ်ဒိၣ်ဒၢတဖၣ်, ဒီးတၢ်ဂုၤဂၤ အါမးန့ၣ်လီၤ. “Ghost Army” သုးဖိလၢအနီၢ်ဂံၢ်စှၤမးအံၤ ပၢဆှၢ ဒုၣ်ဒါသုးမုၢ် ဒ်သိးကပျံၤ တၢ်လၢအဖျါမၤသးဒ် သုးမုၢ်ဖးဒိၣ်ဖးသွါန့ၣ်လီၤ.

စံၣ်ညီၣ် ၇:၈-၂၂ ပာ်ဖျါဝဲ ပှၤမံးဒယာ်ဖိ ဒီးပှၤလၢပာ်ဖှိၣ်ဒုးသကိးတၢ်တဖၣ်စ့ၢ်ကီး ပျံၤတၢ်ကနိး ကစုာ် လၢသုးမုၢ်ဆံးဆံးဖိ အိၣ်ဟဲဖျါထီၣ်ဖဲမုၢ်နၤကတီၢ် ဖျါဒိၣ်န့ၢ်အကြၢးအိၣ်ဝဲ အမဲာ်ညါန့ၣ်လီၤ. စီၤကံဒဧိၣ် လၢအမ့ၢ် စံၣ်ညီၣ်ကွီၢ်, ဒီးပှၤအံၣ်စရ့လးဖိ အသုးခိၣ်တဂၤ, ဘၣ်တၢ်သူအီၤလၢကစၢ်ယွၤ, လၢအဒုးကဲထီၣ် သုးမုၢ်ဆံးဆံးဖိဆူ တၢ်လီၤပျံၤလီၤဖုးအဂံၢ်ထံးလၢ ဒုၣ်ဒါအဂီၢ်န့ၣ်လီၤ. အဝဲသ့ၣ် စ့ၢ်ကီး စူးကါတၢ်ကလုၢ်သီၣ်သဲ, (အူကွဲၤတဖၣ်, မၤသ့ၣ်ဖးသပၢၤ, တၢ်ကိးပသူအသီၣ်), ဒီးပီးလီ လၢပထံၣ်အီၤသ့လၢပမဲာ် (တၢ်ဒွဲၣ်ကပီၤဆှီ), ဒ်အဆၢဖိ ၁၂ ပာ်ဖျါဝဲအသိး, ပှၤအံၣ်စရ့လးဖိတဖၣ် ဘၣ်မၤဝဲ “ဒ်ဒွဲၣ်ဧိၤသကံၤဧိၤတဖၣ်,” ဒ်သိးဒုၣ်ဒါလၢအအါန့ၢ်အဝဲသ့ၣ်တဖၣ် ကနာ်ဝဲလၢအဘၣ် ကွၢ်ဆၢၣ်မဲာ်ဒီး ဒုၣ်ဒါလီၤဘီလီၤမုၢ်အဂီၢ်န့ၣ်လီၤ. မုၢ်နၤအကတီၢ်ဖဲန့ၣ် အဆၢဖိ ၂-၈ စံးဘၣ်ပှၤလၢ ပှၤအံၣ်စရ့လးဖိ မၤနၢၤအဒုၣ်အဒါ ခီဖျိသုးဖိတဖုလၢ အဘၣ်တၢ်ဂံၢ်စှၤလီၤ ပှၤအဂၤ ၃၂၀၀၀ ဆူ ပှၤ ၃၀၀ ဧိၤ ဒ်ကစၢ်ယွၤမၤလိာ်ဝဲအသိးန့ၣ်လီၤ. ဘၣ်မနုၤအဃိလဲၣ်. မ့ၢ်လၢတၢ်မၤအသးတဖၣ်အံၤ မၤဖျါထီၣ်တၢ်ဆှဲဆှဲဖိ လၢပှၤမၤနၢၤတၢ်ဒုးတၢ်ယၤနီၢ်နီၢ်န့ၣ် မ့ၢ်မတၤလဲၣ်န့ၣ်လီၤ. အဆၢဖိ ၉ န့ၣ် ပကထံၣ်ဘၣ် ကစၢ်ယွၤစံးဘၣ် စီၤကံးဒဧိၣ် “အဂ့ၢ်ဒ်အံၤ, ယဟ့ၣ်လီၤလံအီၤလၢနစုပူၤလံ” န့ၣ်လီၤ.

ဖဲလၢပသးကလၢၢ်ဘၣ် ပဂံၢ်ဘါစၢ်, ဒီးပဆံးပစှၤအကတီၢ်, မ်ပကဃုယွၤ ဒီးသန့ၤလီၤပသး ထဲလၢကစၢ်အဂံၢ်အဘါအပူၤန့ၣ်တက့ၢ်. ၂ ကရံၣ် ၁၂:၉ စံးဘၣ်ပှၤလၢ ယွၤ “အစိအကမီၤ လၢထီၣ် ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ” န့ၣ်လီၤ.