ဖဲးထရ့း (PatricK) တညီနုၢ်စိာ်ကျိာ်စ့ဘၣ်ဆၣ်, တချုးဟးထီၣ်လၢဟံၣ်န့ၣ် အသးကလၢၢ်ဘၣ်လၢ ယွၤမၢအထၢနုာ်စ့ “ယဲၢ်ဒီလၣ်”တဘ့ၣ် လၢအဆ့ကၤထၢၣ်ပူၤန့ၣ်လီၤ. ကၠိလၢအဝဲမၤတၢ်အလီၢ် ဖဲမုၢ်ဆါခီတၢ်အီၣ်အကတီၢ်န့ၣ်, အဝဲနၢ်ပၢၢ်ဝဲလၢ ကစၢ်ယွၤကတဲာ်ကတီၤအီၤ လၢကမၤစၢၤဘၣ် တၢ်လိၣ်သတူၢ်ကလာ်အဂီၢ်န့ၣ်လီၤ. လၢမုၢ်ဆါခီတၢ်အီၣ်အကတီၢ်န့ၣ်, နၢ်ဟူဝဲတၢ်ကတိၤတဖၣ် လၢအမ့ၢ် “စကီးထံၣ် (ဖိသၣ်လၢအလိၣ်ဘၣ်တၢ်မၤစၢၤတဂၤ) လိၣ်ဘၣ်စ့ ယဲၢ်ဒီလၣ် လၢအကမၤပှဲၤ အစ့စရီ, ဒ်သိးကအီၣ်ဘၣ်မုၢ်ဆါတၢ်အီၣ်လၢဒီနွံအတီၢ်ပူၤအဂီၢ်လီၤ” န့ၣ်လီၤ. ဒ်သိးကမၤစၢၤဘၣ် စကီးထံၣ်ဖိအဂီၢ် ဖဲအဟ့ၣ်လီၤဘၣ်စ့အကတီၢ်, ဆိကမိၣ်ကွၢ် ဖဲးထရ့း အတၢ်သးဟူးဂဲၤန့ၣ်တက့ၢ်.
ဖဲလံာ်တံတူး ၃:၅ အပူၤ, စီၤပီလူး မၤသ့ၣ်နီၣ် ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်လၢ အဝဲသ့ၣ် ဒိးန့ၢ်ဘၣ်တၢ်အုၣ်က့ၤခီၣ်က့ၤန့ၣ် “လၢပတၢ်မၤလၢတၢ်တီတၢ်လိၤလၢပမၤပဝဲအဃိတမ့ၢ်ဘၣ်,” မ့မ့ၢ် အဆၢဖိ ၈ ပာ်ဖျါဝဲ “ဒ်သိးပှၤလၢအစူၢ်က့ၤနာ်က့ၤယွၤတဖၣ်, ကပလီၢ်သးလၢ အကမၤတၢ်ဂ့ၤ တဘိယူၢ်ဃီန့ၣ်လီၤ” (ကွၢ် အဆၢဖိ ၁၄). သးသမူအိၣ်ပှဲၤသ့ဝဲဒၣ်ဒီး, ပဘၣ်ဖံးဘၣ်မၤဘၣ်တၢ် တဖၣ်အိၣ်အါတလၢ, ဘၣ်ဟူးဝးဂဲၤလိာ်ထီဘိန့ၣ်လီၤ. တၢ်သးဆူၣ်မၤနီၢ်ကစၢ် အတၢ်အိၣ်မူတၢ်ဂ့ၤ တၢ်ဝါအဂီၢ် ဒိၣ်စိလုၢ်ဘၢပှၤသ့ဝဲဒၣ်န့ၣ်လီၤ. ဘၣ်ဆၣ်, ဒ်ပမ့ၢ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် အသိးန့ၣ်, ပကဘၣ် “အိၣ်ကတဲာ်ကတီၤပာ်လၢ တၢ်မၤဂ့ၤတၢ်” အဂီၢ်န့ၣ်လီၤ. တၢ်တအိၣ်ဒီးပှၤဘၣ်, ဒီးပမၤတသ့ဘၣ်တဖၣ်န့ၣ် ကပှဲၤလုၣ်ကွံာ်ဝဲ လၢပသးပူၤဘၣ်ဆၣ်, လၢတၢ်အံၤအလီၢ်န့ၣ်, ဒ်ကစၢ် ယွၤမၤစၢၤပှၤအသိး မ်ပကဆိကမိၣ် တၢ်လၢအအိၣ်ဒီးပှၤ, ဒီးတၢ်လၢပမၤသ့န့ၣ်တက့ၢ်. ပမ့ၢ်မၤ ဒ်သိးအံၤန့ၣ်ဒီး, မ့ၢ်ဒၣ်ပမၤစၢၤ ပှၤဂုၤပှၤဂၤတဖၣ် ဒ်အတၢ်လိၣ်အိၣ်ဝဲအသိး, ဒီးကမ့ၢ်တၢ်မၤလၤကပီၤ ယွၤန့ၣ်လီၤ. မး ၅:၁၆ စံးဘၣ်ပှၤ “ဒ်န့ၣ်အသိး သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီ အမဲာ်ညါ ဒ်သိးကထံၣ်ဘၣ် သုမၤတၢ်ဂ့ၤဒီးကစံးထီၣ်ပတြၢၤ သုပၢ်အိၣ်လၢမူခိၣ်န့ၣ်တက့ၢ်” န့ၣ်လီၤ.