ဖဲခီပနံၣ်ဖးဒိၣ် အမူဒါခိၣ်ကျၢၢ် (CEO) တဂၤ ဆိကမိၣ်တယာ်ကွၢ်ဝဲ တၢ်အဂ့ၤကတၢၢ်လၢအဟံၣ်ဖိ ဃီဖိအဂီၢ်န့ၣ် ကမ့ၢ်တၢ်မနုၤတမံၤလဲၣ်အကတီၢ်န့ၣ် သံကွၢ်လီၤက့ၤအသးလၢ “ယမ့ၢ်ကစၢ်ဧါ, ပှၤပၢၤတၢ်တဂၤဧါ” န့ၣ်လီၤ. ဘၣ်ယိၣ်တၢ်လၢ တၢ်လ့ပစီတဖၣ် ဟဲနုာ်လီၤသ့ဝဲ ခီဖျိတၢ်စုလီၢ်ခီၣ်ခိၣ် အါအါဂီၢ်ဂီၢ်အဃိ, အဝဲတအဲၣ်ဒိးလၢ တၢ်တၤတၢ်တမံၤအံၤ ကကဲထီၣ်တၢ်ဝံတၢ်ယိးလၢ ပှၤကန့ၢ်သါ အတၢ်တဖၣ်အဂီၢ်န့ၣ်ဘၣ်. လၢတၢ်န့ၣ်အဃိ, စူးကွံာ်ညိကွံာ် အတၢ်ကဲဘၣ် ခီပနံၣ်အံၤအကစၢ်, ဒီးပာ်လီၤ ခီပနံၣ် အစ့မိၢ်ပှၢ် မျးကယၤ ၁၀၀ လၢစ့ပာ်ကီၤအပူၤန့ၣ်လီၤ. တၢ်သ့ၣ်ညါပာ်ပနီၣ် ကယဲၢ် တၢ်လၢအဘၣ်ထွဲဒီးအီၤခဲလၢာ် မ့ၢ်ကစၢ်ယွၤအတၢ်လီၤန့ၣ် မၤစၢၤအီၤ ဒ်သိးကပာ်လီၤသး, ဒီးကပျဲ အဟံၣ်ဖိဃီဖိတဖၣ် ကဃုဖံးအီၣ်မၤအီၣ်, ဒီးလုၢ်အီၣ်သးသမူ, ဒီးတဘျီဃီန့ၣ် စူးကါစ့ၢ်ကီးဝဲ ခါဆူညါ ကျိၣ်စ့အတၢ်န့ၢ်ဘျုးတဖၣ်လၢ ကဟ့ၣ်မၤစၢၤ ခရံာ်တၢ်သးခုကစီၣ်အတၢ်မၤအဂီၢ်န့ၣ်လီၤ.

ဖဲထါစံးထီၣ်ပတြၢၤ ၁၀:၁၀ အပူၤ ကစၢ်ယွၤစံးဘၣ် အပှၤဂီၢ်မုၢ်တဖၣ်လၢ “ဆၣ်ဖိကီၢ်ဖိအမံၤ လၢပှၢ်လၢ်ကျါန့ၣ် မ့ၢ်ယတၢ်ကိးဒုဒဲး, ဒီးဆၣ်ဖိကီၢ်ဖိအဒၢလၢ ကစၢၢ်တဖၣ်အလိၤ ဖဲအအိၣ်အကထိ ကထိန့ၣ်လီၤ.” ဒ်အမ့ၢ်တၢ်ဘၣ်တ့ခဲလၢာ်အကစၢ်တဂၤအသိး, ကစၢ်ယွၤ အဒ့ၣ်ကမၢ်တအိၣ်ဒီးပှၤ နီတမံၤ, ဒီးတလိၣ်ဘၣ်တၢ်လၢပအိၣ်နီတမံၤဘၣ်န့ၣ်လီၤ. အဆၢဖိ ၉ အပူၤ ကစၢ်ယွၤစံးဝဲ, “ယတဟံးန့ၢ် ဘၣ်ဂီၤဖံးဖါလၢ နဟံၣ်ပူၤ, မဲာ်တဲးလဲးဖါလၢ နကရၢၢ်ပူၤဘၣ်” န့ၣ်လီၤ. တၢ်သူၣ်အိၣ် သးအိၣ်အပူၤ ကစၢ်ယွၤဟ့ၣ်လီၤပှၤတၢ်ကိးမံၤဒဲး ကယဲၢ်တၢ်လၢအအိၣ်ဒီးပှၤ, တၢ်လၢပစူးကါအီၤ, ပဂံၢ်ပဘါ, ဒီးပတၢ်သ့တၢ်ဘၣ်တဖၣ် ဒ်သိးပကလုၢ်အီၣ်သးသမူအဂီၢ်န့ၣ်လီၤ. မ့ၢ်လၢကစၢ်ယွၤ ဟ့ၣ်ပှၤတၢ်ခဲလၢာ်အဃိ, ဒ်ထါစံးထီၣ်ပတြၢၤ ပာ်ဖျါန့ၢ်ပှၤအသိး, ကစၢ်ယွၤန့ၣ် ဂ့ၤလၢပဘူၣ်ထီၣ် ဘါထီၣ်အီၤ လၢသူၣ်ဒီဖျၢၣ်သးဒီဖျၢၣ်န့ၣ်လီၤ.

တၢ်ခဲလၢာ် မ့ၢ်ကစၢ်ယွၤအတၢ်လီၤ. ဘၣ်ဆၣ်, မ့ၢ်လၢကစၢ်ယွၤအတၢ်ဂ့ၤတၢ်ဝါအဃိ, ကဟ့ၣ်လီၤအသးသမူအဂီၢ်ဒၣ်လဲာ်ဃုထၢဝဲ, ဒ်သိးကရ့လိာ်သးဒီးကယဲၢ်ပှၤလၢ အဟဲက့ၤဆူ အအိၣ်န့ၣ်လီၤ. မၢ်ကူး ၁၀:၄၅ စံးဘၣ်ပှၤလၢ ကစၢ်ယ့ၣ်ရှူးန့ၣ် “တဟဲဘၣ်ဝဲဒ်သိး ပှၤကမၤအီၤလၢ အခ့အပှၤအတၢ်ဘၣ်. မ့ၢ်ဒ်သိးအကမၤအခ့အပှၤအတၢ်မၤ, ဒီးဟ့ၣ်လီၤအသး လၢပှၤကညီအါဂၤ အပှ့ၤလီၤ” န့ၣ်လီၤ. ဖဲလၢပပာ်လုၢ်ပာ်ပှ့ၤ ကစၢ်လၢအဟ့ၣ်တၢ်တဂၤ အါန့ၢ် အတၢ်ဟ့ၣ်တဖၣ်န့ၣ်, ဒီးမၤတၢ်ခ့တၢ်ပှၤအတၢ်မၤလၢအဂီၢ် ခီဖျိ အတၢ်ဟ့ၣ်တဖၣ်န့ၣ်ဒီး, ပကဘၣ်ဆိၣ်ဂ့ၤ, ဒီးမုာ်လၤသးခု ဘၣ်လၢအပူၤလီၤစိၤန့ၣ်လီၤ.