စိရၢၣ် စီလ်ခၢၣ် (Søren Solkær) စူးကါတ့ၢ်ဝဲ နံၣ်သ့ၣ်တဖၣ် လၢတၢ်ဒိတၢ်ဂီၤလၢ ထိၣ်ဆါရးအလွဲၢ်သူ တကလုာ် အတၢ်အိၣ်မူ လၢအလီၤကမၢကမၣ်, အကလုၢ်လၢကသွံဒံဖိသ့ၣ်တဖၣ်, ဒီးထိၣ်ဖိတဖၣ်အံၤ အဖုအကရၢ, အနီၢ်ဂံၢ်အိၣ်လၢ အကကွဲၢ်န့ၣ်, ဟူးဂဲၤ, ယူၤခီဂာ်ဝဲလၢမူခိၣ် လီၤဂာ်ဒ်ထံယွၤလီၤအသိးန့ၣ်လီၤ. တၢ်ခိးကွၢ်တၢ်လီၤကမၢကမၣ်အံၤ လီၤဂာ်ဒ်သိး ပဆ့ၣ်နီၤဖဲ ထံသဝံး အလပီ မ့တမ့ၢ် ပှၤတ့တၢ်ဂီၤတဂၤ အကသံၣ်ကျိၤလၢ အလွဲၢ်ခံး, တီၢ်, ဒီးဖျါဃံလၤ, နုာ်လီၤ ဆူယွၤခၣ်စိးအကျိဘိ, လၢအအိၣ်ဒီးက့ၢ်ဂီၤတဖၣ် လၢအဘၣ်တၢ်သုးကျဲၤလီၤဆီအဖီလာ်န့ၣ်လီၤ. တၢ်လဲၤခီဖျိထံၣ်ဘၣ် ထိၣ်ဖိသ့ၣ်တဖၣ် အတၢ်အိၣ်အသးအံၤ ဘၣ်တၢ်ကိးအီၤလၢ မုၢ်အလွဲၢ်သူ (Black Sun) လၢကီၢ်ဒဲမး (Denmark) န့ၣ်လီၤ. (စိရၢၣ်အတၢ်ဂီၤအလံာ် လၢအလီၤသးကတုၤ အခိၣ်တီစ့ၢ်ကီး မ့ၢ်ဝဲ မုၢ်အလွဲၢ်သူန့ၣ်လီၤ). တၢ်လၢအလီၤပာ်သူၣ်ပာ်သး အဒိၣ်ကတၢၢ် မ့ၢ်ဝဲထိၣ်သ့ၣ်တဖၣ်အံၤ ယူၤပိာ်အတံၤသကိး အအိၣ်ဘူးကတၢၢ်ဒီးအဝဲသ့ၣ် ဒ်အတၢ်သ့ၣ်ညါဒၣ်ဝဲ ဒီးယူၤဝဲ ဘူးဘူးတံၢ်တံၢ်, တုၤဒၣ်လဲာ် ထိၣ်တဘ့ၣ်ဘ့ၣ် ယူၤပိာ်ဝဲမ့ၢ်ကမၣ်န့ၣ်ဒီး ထိၣ်အါဘ့ၣ် ကဘၣ်ဒိဘၣ်ထံးဒိၣ်ဒိၣ်မုၢ်မုၢ် န့ၣ်လီၤ. တၢ်မၤအသးသ့ဒ်န့ၣ်ဘၣ်ဆၣ်, လၢတၢ်ဒီသဒၢလိာ်သး တဘ့ၣ်ဒီးတဘ့ၣ်အဂီၢ်ထိၣ်ဆါရးအသူဖိတဖၣ် စူးကါဝဲ တၢ်မၤသီၣ်ကလုၢ်ကသွံဒံဖိန့ၣ်လီၤ. ဖဲထိၣ်လံာ်ဃး ဟဲယူၤလီၤဆူ အဝဲသ့ၣ်အအိၣ်န့ၣ်ဒီး ထိၣ်ဆံးဖိသ့ၣ်တဖၣ်အံၤ ပာ်ဖှိၣ် ဃံးတံာ်အသးဒီး ယူၤဝဲတပူၤဃီ ဒီးတြီဆၢမၤနၢၤက့ၤ ထိၣ်ဖးဒိၣ်လၢ အကဂုာ်ဆူၣ်ပျိဆူၣ်အဝဲသ့ၣ်, ဖဲလၢအအိၣ်ဒၣ် အကစၢ် ထဲတဘ့ၣ်အဆၢကတီၢ်န့ၣ်လီၤ.
ပအိၣ်တပူၤဃီ ဂ့ၤအါန့ၢ်ဒံး ပအိၣ်ထဲတဂၤဧိၤန့ၣ်လီၤ. လံာ်ပှၤစံၣ်တဲၤတဲလီၤတၢ် ၄:၉-၁၁ ပာ်ဖျါဝဲ, “ပှၤခံဂၤ ဂ့ၤန့ၢ် ပှၤတဂၤတက့ၢ်လီၤ. ဒီးပှၤခံဂၤ မ့ၢ်မံဃုာ်ဒီး, လၢၤဝဲလီၤ”. ထဲတဂၤဧိၤန့ၣ်, ပကလီၤဖးဒီးပှၤဂၤ ဒီးပကဘၣ်တၢ်ဂုာ်ဆူၣ်ပျိဆူၣ် ညီကဒၣ်န့ၣ်လီၤ. ပှၤဂၤ အတၢ်မၤမုာ်ထီၣ်က့ၤပသး, မ့တမ့ၢ် တၢ်ဒီတဒၢပှၤ မ့ၢ်တအိၣ်ဘၣ်အဃိန့ၣ်ဒီး ပကအိၣ်ဖျါလၢခိ ဒီးကဘၣ်ဒိဘၣ်ထံးညီကဒၣ်န့ၣ်လီၤ.
ဘၣ်ဆၣ် ပမ့ၢ်အိၣ်ဒီးတံၤသကိးတဖၣ်န့ၣ်, ဒ်ပဟ့ၣ်တၢ်မၤစၢၤအသိး, ပကဒိးန့ၢ်တၢ်မၤစၢၤန့ၣ်လီၤ. စံၣ်တဲၤတဲ ၄:၁၂ အပူၤန့ၣ် ပှၤကွဲးလံာ်စံးဝဲ, “ဒီးတၢ်မ့ၢ်မၤဃၣ်ပှၤတဂၤဒီး, ခံဂၤကတြီအီၤလီၤ. ဒီးပျံၤပိၤအသး သၢပလွံတဘိန့ၣ် ပှၤတမၤတဲာ် ဘၣ်ချ့သဒံးဘၣ်” န့ၣ်လီၤ. မ့ၢ်လၢကစၢ်ယွၤနဲၣ်ဆှၢပှၤအဃိ ပမ့ၢ်အိၣ်တပူၤဃီန့ၣ် တၢ်ဂ့ၤကဒိၣ်အါလၢပဂီၢ်န့ၣ်လီၤ.
