တၢ်အိၣ်ဖှိၣ်သရၣ်သးစၢ်တဂၤ, ဃ့ထုကဖၣ်ဝဲကိးမုၢ်ဂီၤ, လၢတနံၤအံၤ ကစၢ်ယွၤကစူးကါအီၤဒ်သိး ကမ့ၢ်ဝဲတၢ်ဆိၣ်ဂ့ၤလၢပှၤတဂၤဂၤအဂီၢ်န့ၣ်လီၤ. ဒ်ဃ့ထုကဖၣ်ဝဲအသိး ကကဲထီၣ်တၢ်ဆိၣ်ဂ့ၤလၢ ပှၤတဂၤဂၤအဂီၢ်န့ၣ် တၢ်ဂ့ၢ်အိၣ်ထီၣ်ဝဲတလီၢ်လီၢ်အဃိ, ကဲထီၣ်တၢ်သးခုလၢအဂီၢ်န့ၣ်လီၤ. ဘၣ်ဖဲ မုၢ်တနံၤ, လၢအတၢ်မၤခံခါတခါဝံၤန့ၣ်, ဆ့ၣ်နီၤအိၣ်ဘှံးဝဲတစိၢ်တလီၢ် လၢမုၢ်တၢ်ကပီၤအဖီလာ်, ဃုာ်ဒီးပှၤမၤသကိးတၢ်ဒီးအီၤတဂၤ, ဒီးပှၤတဂၤအံၤ သံကွၢ်အီၤ ကစၢ်ယ့ၣ်ရှူးအဂ့ၢ်န့ၣ်လီၤ. တၢ်ဂ့ၢ်လၢပှၤသံကွၢ်အီၤန့ၣ် တၢ်အိၣ်ဖှိၣ်သရၣ် စံးဆၢက့ၤယိယိဖိန့ၣ်လီၤ. တစံးဆၢဝဲဆူၣ်ဆူၣ် ကိၢ်ကိၢ် ဒီး တမ့ၢ်လၢ တၢ်ဂ့ၢ်လိာ်ဘှီလိာ်အပူၤန့ၣ်ဘၣ်. တၢ်အိၣ်ဖှိၣ်သရၣ် ပာ်ဖျါထီၣ်ဝဲ ခီဖျိလၢ သးမုၢ်စီဆှံ နဲၣ်ဆှၢအီၤအဃိဒီး အသးပူၤကလၢၢ်ဘၣ်ဝဲလၢ တၢ်စံးကတိၤလိာ်သးအံၤ တမ့ၢ် တၢ်လၢအလီၤတိၢ်လီၤဆီဘၣ်ဆၣ် ဖျါလၢကဲဘျုး, ဒီးမုာ်လၤသးခုဝဲဒၣ်န့ၣ်လီၤ. အဝဲဒုးအိၣ်ထီၣ် တံၤသကိးသီသံၣ်ဘှဲတဂၤ- ပှၤလၢအဲၣ်ဒိးမၤလိသ့ၣ်ညါအါထီၣ် ကစၢ်ယွၤအဂ့ၢ်န့ၣ်လီၤ.
ကျဲအဂ့ၤကတၢၢ်လၢ တၢ်စံးကတိၤ ကစၢ်ယ့ၣ်ရှူးအဂ့ၢ်ဆူပှၤဂုၤပှၤဂၤမ့ၢ်ဝဲ တၢ်ပျဲသးစီဆှံ နဲၣ်ဆှၢပှၤန့ၣ်လီၤ. မၤတၢ် ၁:၈ အပူၤ ကစၢ်ယ့ၣ်ရှူးစံးဘၣ် အပျဲၢ်အဘီၣ်တဖၣ်လၢ “သုကဒိးန့ၢ် တၢ်အစိကမီၤ ဒီးသုကကဲထီၣ်ယပှၤအုၣ်အသးတဖၣ်….ပၢၢ်လၢဟီၣ်ခိၣ်အကတၢၢ်လီၤ” န့ၣ်လီၤ.
ကလၤ ၅:၂၂-၂၃ ပာ်ဖျါဝဲ သးစီဆှံအတၤသၣ်အဂ့ၢ် “မ့မ့ၢ်သးအတၤသၣ်န့ၣ် မ့ၢ်တၢ်အဲၣ် တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ် တၢ်နာ်, တၢ်ဆီၣ်လီၤပသး, တၢ်ကီၤသူၣ်ကီၤသးတဖၣ်” န့ၣ်လီၤ. တၢ်အိၣ်ဖှိၣ်သရၣ်သးစၢ်အံၤ အိၣ်မူအိၣ်ဂဲၤ လၢသးစီဆှံအတၢ်ပၢတၢ်ဆှၢအဖီလာ်, ဒီးအိၣ်မူထွဲမၤထွဲ ဒ်စီၤပ့းတရူးသိၣ်လိ သီလိဝဲဖဲ ၁ ပ့း ၃:၁၅ အပူၤအသိး “ကယဲၢ်ပှၤလၢ အသံကွၢ်သုလၢ တၢ်မုၢ်လၢ်အိၣ်လၢသုပူၤ အဂ့ၢ်အကျိၤ ကိးဂၤဒဲးန့ၣ်, အိၣ်ကတီၤသူသးထီဘိလၢတၢ်စံးဆၢ, မ့မ့ၢ်လၢတၢ်သူၣ်စူၤသးစူၤ ဒီးတၢ်ပျံၤတၢ်ဖုး တက့ၢ်” န့ၣ်လီၤ.
ပစူၢ်က့ၤနာ်က့ၤကစၢ်ခရံာ်အဃိ ပမ့ၢ်ဘၣ်ကွၢ်ဆၢၣ်မဲာ်တၢ်နးတၢ်ဖှီၣ်ဒၣ်လဲာ်, ပတၢ်ကတိၤ ကနဲၣ်ဖျါထီၣ်ဟီၣ်ခိၣ်လၢ သးမုာ်စီဆှံ အတၢ်နဲၣ်ဆှၢပှၤန့ၣ်လီၤ. ဝံၤဒီး, ပလဲၤတၢ်လၢ တၢ်ဒိကနၣ်အပူၤန့ၣ် ကထုးန့ၢ်ပှၤဂုၤပှၤဂၤ ဆူကစၢ်ယွၤအအိၣ်န့ၣ်လီၤ.
