လၢတၢ်ခူၣ်ထုးထီၣ် ရ့ၣ်နီၣ်သိ, ဖဲထံကီၢ်လၢတၢ်ကိၢ်ဆါဒိၣ်မး, ဒီးဃ့ထီကတၢၢ်တဘ့ၣ် လၢဟီၣ်ခိၣ်ဖျၢၣ်အံၤအကတီၢ်, ပှၤမၤတၢ်ဖိတဖၣ်ထံၣ်ဝဲ ထံအဒ့ဖးဒိၣ်တပူၤအိၣ်လၢ ဟီၣ်လာ်အံၤ အဃိ ဖုးသံပျီာ်သံဘၣ်အသးန့ၣ်လီၤ. လၢတၢ်န့ၣ်အဃိ, “ပှၤကညီတ့ဒုးအိၣ်ထီၣ် ထံကျိမိၢ်ပှၢ် ဖးဒိၣ်” တၢ်တိာ်ကျဲၤ, စးထီၣ်ဖဲ ၁၉၈၃ နံၣ်, ဒီးတ့ၢ်နုာ်ထံပီၤတဖၣ် ဒ်သိးတၢ်ကဆှၢ ပတီၢ်ထီ ထံအကဆှီတဖၣ် ဆူဝ့ၢ်ဒိၣ်ဝ့ၢ်သွါတဖၣ် လၢအလိၣ်ဘၣ်ဝဲထံဝံၣ်နီၢ်နီၢ်န့ၣ်လီၤ. ဖဲတၢ်တိာ်ကျဲၤ အတၢ်မၤ စးထီၣ်တၢ် အလီၢ်အကျဲန့ၣ်အိၣ်ဒီးလၢၢ်ဘ့ၣ်ဘၣ် လၢအဘၣ်တၢ်ကွဲးအီၤ “တၢ်လီၢ်အံၤ သးသမူအသွံၣ်ကျိၤ စးထီၣ်ယွၤလီၤဝဲအလီၢ်” န့ၣ်လီၤ.
ယရှါယၤ ၃၂ အပူၤန့ၣ် ဒ်သိးကပာ်ဖျါထီၣ်ဝဲ ခါဆူညါ စီၤပၤအတီအလိၤတဂၤကပၢတၢ် အဂ့ၢ်န့ၣ် ဝံယရှါယၤ စူးကါထံလၢပှၢ်မုၢ်ကနၢအက့ၢ်ဂီၤဒိန့ၣ်လီၤ. စီၤပၤတဖၣ် ဒီးပှၤပၢတၢ်တဖၣ် မ့ၢ်ပၢတၢ်လၢ တၢ်တီတၢ်လိၤ, ဒီးလၢတၢ်မ့ၢ်တၢ်တီအပူၤန့ၣ်, အဆၢဖိ ၂ အပူၤပာ်ဖျါဝဲ, အဝဲသ့ၣ် ကလီၤဂာ်ဒီး “ထံကျိၤလၢအလီၢ်ဃ့အသိး, ဒ်လၢၢ်ဒိၣ်အကဒု လၢတၢ်ဘှံးသးအကီၢ်ပူၤအသိး” န့ၣ်လီၤ. ပှၤပၢတၢ်တနီၤ ဖဲလၢကဘၣ်ဟ့ၣ်ခီဟ့ၣ်နီၤတၢ်အလီၢ်န့ၣ် ဃုထၢတၢ်ကဟံးန့ၢ်တၢ်လၢ ကမျၢၢ်အအိၣ်န့ၣ်လီၤ. မ့မ့ၢ်, ခိၣ်နၢ်လၢအယူးယီၣ်ပးကဲယွၤအတၢ်ပနီၣ်န့ၣ် မ့ၢ်ပှၤလၢအဟဲစိာ် တၢ်အိၣ်ကဒု, တၢ်အိၣ်တဒၢ, တၢ်မၤဂ့ၤမၤသီထီၣ်သူၣ်သး, ဒီးတၢ်ဒီတဒၢတၢ်တဖၣ်န့ၣ်လီၤ. အဆၢဖိ ၁၇ န့ၣ် ဝံယရှါယၤ စံးဝဲလၢ “တၢ်တီတၢ်လိၤအမၤတၢ်န့ၣ် ကမ့ၢ်တၢ်မုၢ်တၢ်ဖိး, ဒီးတၢ်တီ တၢ်လိၤအတၢ်ကဲထီၣ်န့ၣ် ကမ့ၢ်တၢ်အိၣ်ဘှံး, ဒီးတၢ်သူၣ်မံသးမံလီၤထူလီၤယိာ်လီၤ” န့ၣ်လီၤ.
ဝံယရှါယၤ စံးကတိၤဟ့ၣ်ထီၣ်တၢ်မုၢ်လၢ်အံၤ, အကတၢၢ်န့ၣ်, ဒ် ၁ သ့း ၄:၁၆-၁၇ ပာ်ဖျါဝဲ “ကစၢ်အကစၢ်ဒၣ်ဝဲ ကဟဲလီၤလၢမူခိၣ်… ဒီးပကအိၣ်ဒီးကစၢ်အစိၤစိၤအဃၣ်ဃၣ်ဒ်န့ၣ်လီၤ” အသိး, အခီပညီလၢထီၣ်ပှဲၤထီၣ်ဝဲလၢ ကစၢ်ယ့ၣ်ရှူးအပူၤန့ၣ်လီၤ. “ပှၤကညီတ့ဒုးအိၣ်ထီၣ် ထံကျိမိၢ်ပှၢ်ဖးဒိၣ်”အံၤ မ့ၢ်တၢ်ဘၣ်မၤအီၤလၢပှၤဟီၣ်ခိၣ်ဖိအစုတဖၣ်န့ၣ်လီၤ. မုၢ်တနံၤန့ၣ် ထံပာ်ကီၤတမၢၣ်ဖးဒိၣ်တဖၣ်အပူၤ ထံကလၢာ်ကွံာ်ဝဲဒၣ်န့ၣ်လီၤ. ဘၣ်ဆၣ်, ပစီၤပၤအတီအလိၤ ကဟဲစိာ် တၢ်မၤဂ့ၤမၤသီထီၣ်ပသူၣ်ပသး, ဒီး ထံမူလၢ အတဃ့ထီ, တလီၤသံးနီတစုဘၣ်န့ၣ်လီၤ.
