ခီလ့ၣ်ကၠိတၢ်ကွဲးအတီၤဒၢးလၢယသိၣ်လိဘၣ်အဂီၢ် ယဘၣ်ကွၢ်ဒီးဟ့ၣ် ကၠိဖိတဖၣ်အတၢ်ကွဲး အပတီၢ်အဆၢကတီၢ်, ယဘၣ်သူၣ်ဘၣ်သး ယပျဲၢ်တဂၤအတၢ်ကွဲးဝဲဒၣ်န့ၣ်လီၤ. အတၢ်ကွဲးန့ၣ် ဂ့ၤဒိၣ်မးန့ၣ်လီၤ. တယံာ်ဘၣ်, ယသ့ၣ်ညါဘၣ်လၢ အတၢ်ကွဲးဂ့ၤမုာ်ဒိၣ်မးအဃိ, ဖဲယဃုကွၢ်ထံ တဆံးတက့ၢ်ဝံၤ, ယသ့ၣ်ညါလီၤတံၢ်လၢ တၢ်ကွဲးအံၤ ဘၣ်တၢ်ဟုၣ်ဟံးန့ၢ်လၢ အီၣ်လဲ (online) တၢ်ကွဲးအပူၤန့ၣ်လီၤ.
ယကွဲးဆှၢလီၤလီလံာ်ပရၢ ဆူယပျဲၢ်မုၣ်အံၤ ဒီးဒုးသ့ၣ်ညါအီၤလၢ အတၢ်လီတၢ်ဝ့ၤအံၤ ဘၣ်တၢ်ထံၣ်သ့ၣ်ညါအီၤလံန့ၣ်လီၤ. အတၢ်ကွဲးအဂီၢ် ဒိးန့ၢ်ဝဲ တၢ်မၤနီၣ်အပတီၢ် (၀), ဘၣ်ဆၣ်, လၢတၢ်မၤနီၣ်အပတီၢ်အဂီၢ် ကွဲးဆှၢထီၣ် တၢ်ကွဲးအသီသ့ဝဲဒၣ်န့ၣ်လီၤ. အဝဲစံးဆၢက့ၤဝဲဒၣ်, “ယမဲာ်ဆှးဒိၣ်မး, ဒီးယဃ့ကညးဘၣ်နၤန့ၣ်လီၤ. နပာ်ဖျါထီၣ်တၢ်ဘျုးတၢ်ဖှိၣ်လၢယဂီၢ်အဃိ ယစံးဘျုးနၤလီၤ. ယတကြၢးဒီးနတၢ်ဟ့ၣ်ဘျုးအံၤဘၣ်” န့ၣ်လီၤ. ယစံးဆၢက့ၤအီၤ, ခီဖျိလၢ ပဝဲးကိးဂၤ ပဒိးန့ၢ် ကစၢ်ယ့ၣ်ရှူးအဘျုးအဖှိၣ် ကိးနံၤဒဲးအဃိ, တၢ်ပာ်ဖျါထီၣ် တၢ်ဟ့ၣ်ဘျုး လၢနဂီၢ်န့ၣ် ယလဲၤကပာ်ကသ့ဝဲဒ်လဲၣ်” န့ၣ်လီၤ.
ယွၤအဘျုးအဖှိၣ် ကမၤဂ့ၤထီၣ်ပတၢ်အိၣ်မူအိၣ်ဂဲၤ, ဒီးကပှ့ၤက့ၤပှၤလၢပမၤကမၣ်တၢ် တဖၣ်အပူၤအဂီၢ်, ကျဲအိၣ်ဝဲအါဘိန့ၣ်လီၤ. မၤတၢ် ၁၅:၁၁ အပူၤ စီၤပ့းတရူးစံးဝဲ “ပနာ်လၢ ပကတုၤလၢတၢ်အုၣ်က့ၤခီၣ်က့ၤ, လၢကစၢ်ယ့ၣ်ရှူးအဘျုးအဖှိၣ်အဃိ ဒ်အဝဲသ့ၣ်အသိး စ့ၢ်ကီးလီၤ” န့ၣ်လီၤ. ဒ်သိးတၢ်ဒဲးဘး အသုတမၤနၢၤပှၤအဂီၢ် တၢ်ဘျုးတၢ်ဖှိၣ်မၤစၢၤပှၤအဂ့ၢ်န့ၣ်, စီၤပီလူးစံးဝဲလၢ ရိမ့ၤ ၆:၁၄ အပူၤ “တၢ်ဒဲးဘးတကဲလၢၤဘၣ်ကစၢ်ဘၣ်. အဂ့ၢ်ဒ်အံၤ သုတအိၣ် ဘၣ်လၢ တၢ်သိၣ်တၢ်သီအဖီလာ်ဘၣ်. မ့ၢ်သုအိၣ်လၢ တၢ်ဘျုးတၢ်ဖှိၣ် အဖီလာ်လီၤ” န့ၣ်လီၤ. တကးဒံးဘၣ်န့ၣ်, ယွၤအဘျုးအဖှိၣ် ပျဲပကမၤတၢ်ခ့တၢ်ပှၤအတၢ်မၤအဂ့ၢ်န့ၣ်, စီၤပ့းတရူး ပာ်ဖျါ ဝဲလၢ ၁ ပ့း ၄:၁၀ အပူၤ “ဒ်ပှၤဂ့ၤကွၢ်ယွၤအဘျုးအဖှိၣ် အကလုာ်ကလုာ်အသိးန့ၣ် အံးက့ၤ ကွၢ်က့ၤလိာ်သုသး ဒ်သုန့ၢ်တၢ်ဘျုးတၢ်ဖှိၣ်တဂၤဒီးတဂၤအသိးန့ၣ်တက့ၢ်” န့ၣ်လီၤ.
အ့ဖ့း ၄:၇ စံးဘၣ်ပှၤ တၢ်ဘျုးတၢ်ဖှိၣ် မ့ၢ်တၢ်ဟ့ၣ်ကလီ, ဒီးအိၣ်ဟဲလၢ ကစၢ်ယွၤန့ၣ်လီၤ. ဒ်သိးပကအဲၣ်, ဒီးစံးကတိၤဟ့ၣ်ဂံၢ်ဟ့ၣ်ဘါလိာ်သးဒီးပှၤဂုၤပှၤဂၤအဂီၢ် မ်ပကစူးကါသကိး တၢ်ဟ့ၣ်အံၤန့ၣ်တက့ၢ်.
