ပသ့ၣ်ညါ ခၣ် (Kha) လၢတၢ်ဆၢကတီၢ် အါန့ၢ်တနံၣ်ဘျဲၣ်လံန့ၣ်လီၤ. တၢ်အိၣ်ဖှိၣ်အပူၤ အဝဲမ့ၢ် ပကရူၢ်ဖိတဂၤ, ဖဲပထံၣ်လိာ်သးကိးနွံဒဲး လၢတၢ်စံးကတိၤသကိး ကစၢ်ယွၤအဂ့ၢ် လၢပမၤလိန့ၢ် တဖၣ်န့ၣ်လီၤ. ဘၣ်တဟါ ဒ်ညီနုၢ်ပထံၣ်လိာ်သးအကတီၢ်န့ၣ်, အဝဲပာ်ဖျါယၢၤထီၣ် တၢ်ဂ့ၢ်လၢ အဘၣ်လဲၤလိာ်ကွဲသတြီၤဝဲ အိၣ်လါပ့း အဂ့ၢ်န့ၣ်လီၤ. အတၢ်ယၢၤထီၣ်ပာ်ဖျါ တပျံာ်တပျာ်အံၤ တၢ်တလီၤတံၢ်အဃိ, ဘူးတ့ၢ်မးလၢ ယတပာ်သူၣ်ပာ်သးဘၣ်န့ၣ်လီၤ. ဘူးတ့ၢ်မးလီၤ. ကွၢ်ကွၢ်, ယသ့ၣ်ညါလိာ်သးဒီး ပှၤလိာ်ကွဲသတြီၤတၢ်ဖိလၢအိၣ်လါပ့း, ဒီးမၤန့ၢ်ဝဲတိၢ်ဘီတၢ်လၤကပီၤန့ၣ် မ့ၢ်တၢ်လီၤကမၢကမၣ်လၢယဂီၢ်န့ၣ်လီၤ. အပူၤကွံာ်န့ၣ် ဘၣ်မနုၤအဃိ တယၢၤထီၣ်ဝဲ တၢ်ဂ့ၢ်တၢ်ကျိၤအံၤလဲၣ်န့ၣ် ယတနၢ်ပၢၢ်အီၤဘၣ်. ခၣ်အဂီၢ် အတၢ်မၤနၢၤတၢ်အဂ့ၢ်အံၤ မ့ၢ်က့ၢ်ဂီၤလီၤဆီတမံၤလၢ အတၢ်ဂ့ၢ်တၢ်ကျိၤအပူၤဘၣ်ဆၣ်, တၢ်လၢအကါဒိၣ်န့ၢ် အတၢ်မၤနၢၤတၢ်အံၤ, မ့ၢ်အဟံၣ်ဖိဃီဖိ, အပှၤတဝၢ, ဒီးအတၢ်စူၢ်တၢ်နာ်သ့ၣ်တဖၣ် လၢအမ့ၢ် အတၢ်မ့ၢ်တၢ် အခိၣ်သ့ၣ်န့ၣ်လီၤ.
လံာ်လူၤကၣ် ၁၀:၁-၂၃ ပာ်ဖျါထီၣ်ဝဲ, ပတၢ်မ့ၢ်တၢ်အခိၣ်သ့ၣ် ကြၢးမ့ၢ်တၢ်မနုၤလဲၣ်အဂ့ၢ်န့ၣ်လီၤ. ကစၢ်ယ့ၣ်ရှူး မၢလီၤ အပျဲၢ်နွံဆံခံဂၤ ဒ်သိးကလဲၤစံၣ်တဲၤတဲလီၤ ကစၢ်ယွၤအဘီအမုၢ် အဂ့ၢ်ဝံၤ, အဝဲသ့ၣ်ဟဲက့ၤပာ်ဖျါထီၣ်တၢ် ဆူအအိၣ်အဂ့ၢ်န့ၣ်, ဖျါဖဲ အဆၢဖိ ၁၇ အပူၤ “ကစၢ်ဧၢ, မ့ၢ်နမံၤသတးဒီး တၢ်နါတဖၣ်ဒၣ်လဲာ် အိၣ်လၢပဖီလာ်လီၤ” န့ၣ်လီၤ. ဖဲကစၢ်ယ့ၣ်ရှူးအၢၣ်လီၤ တူၢ်လိာ်ဝဲလၢ အဒုးကူသိးထီၣ် အပျဲၢ်အဘီၣ်တဖၣ်လၢတၢ်စိကမီၤ, ဒီးတၢ်ဒီတဒၢ ဒိၣ်ဒိၣ်မုၢ်မုၢ်တဖၣ်, ဒီးတကတီၢ်ဃီန့ၣ်, ကစၢ်ယ့ၣ်ရှူးစံးဘၣ် အပျဲၢ်အဘီၣ်တဖၣ်လၢ အတၢ်ပညိၣ်အခိၣ်သ့ၣ် မ့ၢ်တၢ်လၢအကမၣ်န့ၣ်လီၤ. အဆၢဖိ ၂၀ အပူၤ ကစၢ်ယ့ၣ်ရှူးစံးဘၣ်အပျဲၢ်အဘီၣ်တဖၣ်, မ့ၢ်လၢ “အမံၤတဖၣ် ဆဲးလီၤကွဲးလီၤအသးလၢမူခိၣ်” အဃိ အဝဲသ့ၣ်ကြၢးသးခုဝဲဒၣ်န့ၣ်လီၤ.
တၢ်မၤန့ၢ်မၤနၢၤ (မ့) ပတၢ်သ့တၢ်ဘၣ်တဖၣ် လၢကစၢ်ယွၤဟ့ၣ်လီၤပှၤန့ၣ် ကမ့ၢ်ဝဲ ဒ်လဲၣ်ဂ့ၤ ဒ်လဲၣ်ဂ့ၤ, တၢ်ကဲထီၣ်ပတၢ်သးခုအဒိၣ်ကတၢၢ်မ့ၢ်ဝဲ, ဖဲပဟ့ၣ်လီၤအးလီၤပသးဆူ ကစၢ်ယ့ၣ်ရှူးအအိၣ်, ဒီးပမံၤတဖၣ် ကဘၣ်တၢ်ကွဲးနီၣ်အီၤလၢမူခိၣ်, ဒီးပမုာ်လၤသးခုဘၣ်လၢ ကစၢ်ယ့ၣ်ရှူး အိၣ်ဒီးပှၤကိးမုၢ်နံၤ လၢပတၢ်အိၣ်မူအပူၤအဃိန့ၣ်လီၤ.
