ယမါ, မံးကၣ်(Miska) အိၣ်ဒီး ဖဲတဘိ ဒီးနၢ်ဒံးလၢအလီၤစဲၤလၢ အဟဲလၢ ကီၢ်အံၣ်သံၣ်ယိပံယါန့ၣ်လီၤ. အဝဲသ့ၣ် အတၢ်ဃံတၢ်လၤ ကဆှီဒီဖိန့ၣ် ပာ်ဖျါထီၣ် စုသ့အတၢ်မၤအမ့ၢ်အတီန့ၣ်လီၤ. တၢ်လီၤကမၢကမၣ် အဒိၣ်ကတၢၢ် မ့ၢ်ဝဲ တၢ်ယၢကယဲပီးလီဖိတဖၣ်အံၤ အဂ့ၢ်အကျိၤန့ၣ်လီၤ. နံၣ်လၢအဆံတဖၣ်အဆံအတီၢ်ပူၤ ထံကီၢ်ဘၣ်ကွၢ်ဆၢၣ်မဲာ်ဒီး တၢ်သဘံၣ်ဘုၣ်နးနးကျံးကျံး လၢထံလီၢ်ကီၢ်ပူၤ တၢ်ဒုးတၢ်ယၤအဃိ ကီၢ်အံၣ်သံၣ်ယိပံယါန့ၣ် အိၣ်ပှဲၤဒီး တၢ်ကမှံၤတဖၣ် ဒ်အမ့ၢ် မျိာ်သၣ်ဒၢ, ကျိချံတဖၣ် ဒီးညီပီၤအဒၢတဖၣ်န့ၣ်လီၤ. ဒ်တၢ်မုၢ်လၢ် အတၢ်ဟူးတၢ်ဂဲၤတမံၤအဂီၢ် ပှၤအံၣ်သံၣ်ယိပံယါဖိတဖၣ် ဃုခွဲးခွး မၤကဆှဲကဆှီ စုကဝဲၤအက့အခီ တဖၣ်န့ၣ်လီၤ. ပှၤစုသ့တဖၣ် တ့ဒုးအိၣ်ထီၣ် တၢ်ကယၢကယဲပီးလီ လၢကျိချံဒီးညီပီၤအဒၢတဖၣ် န့ၣ်လီၤ.

ဖဲယနၣ်ဟူဘၣ် တၢ်ဂ့ၢ်တၢ်ကျိၤအံၤန့ၣ်ဒီး, တၢ်လၢအသီၣ်ထီၣ်က့ၤလၢ ယနၢ်ပူၤ မ့ၢ်ဝဲ ဝံမံကၤစံးကတိၤ ပာ်ဖျါထီၣ်ဝဲဒူဒူ ကစၢ်ယွၤအတၢ်အၢၣ်လီၤအဂ့ၢ်န့ၣ်လီၤ. မံကၤ ၄:၃ အပူၤန့ၣ် ဝံ ဘိးဘၣ်ညါဝဲလၢ မုၢ်တနံၤန့ၣ် ပှၤဂီၢ်မုၢ်တဖၣ် က“ပိာ်က့ၤ အနးလၢ ထဲၣ်အကနၣ် ဒီးအဘီလၢ ဒီပဲာ်ဃိတၢ်”န့ၣ်လီၤ. ပီးလီတဖၣ်အံၤ မ့ၢ်တၢ်လၢအဘၣ်တၢ်စူးကါအီၤလၢ တၢ်ကမၤသံမၤဝီတၢ် ဒီးမၤဘၣ်ဒိဆါတၢ် နးနးကျံးကျံး, ဘၣ်ဆၣ် ခီဖျိလၢကစၢ်ယွၤအစိကမီၤ အတၢ်မၤအဃိ, ပီးလီတဖၣ်အံၤ ဘၣ်တၢ်စူးကါ က့ၤအီၤဆူ တၢ်ဒုးဒိၣ်ထီၣ်က့ၤတၢ်အိၣ်မူန့ၣ်လီၤ. အဆၢဖိ ၃ အပူၤန့ၣ်, ဝံပာ်ဖျါလီၤတံၢ်လီၤဆဲး ဖဲလၢကစၢ်ယွၤအမုၢ်နံၤန့ၣ် “ပှၤတကလုာ် တယၤထီၣ်လၢၤဘၣ်နးလၢ ပှၤတကလုာ် အဖီခိၣ်ဘၣ်”န့ၣ်လီၤ.

တၢ်ထံၣ်မှံက့ၤ ဝံမံကၤ ကိးသတြီပာ်ဖျါ တၢ်အံၤန့ၣ် တမ့ၢ်တၢ်ဂ့ၢ်ကီလၢ ပစိၤဆၢကတီၢ်
အကီခဲဒိၣ်ဝဲဆူ တၢ်ကထံၣ်မှံအီၤ အါန့ၢ်ဒံး ပစိၤပဆၢကတီၢ် တၢ်အိၣ်သးဘၣ်န့ၣ်လီၤ. ဒ်ပှၤအံၣ်စရ့လးဖိလၢပျၢၤတဖၣ်အသိး, ပကွၢ်ဆၢၣ်မဲာ်ဒီး တၢ်စုဆူၣ်ခီၣ်တကး တၢ်မၤ ဒီးတၢ်ဒုးတၢ်ယၤ, ဒီးတၢ်ဖျါဒ် ဟီၣ်ခိၣ်အံၤ ကဆီတလဲသးအဂီၢ် ကဲထီၣ်ဝဲတသ့လၢၤဘၣ်န့ၣ်လီၤ. ဘၣ်ဆၣ်, လၢအတၢ်သူၣ်ကညီသးကညီဒီး ကမၤဘျါတၢ်လၢ အမၤဘၣ်ဒိဆါတဖၣ်အဂီၢ် ကစၢ်ယွၤအၢၣ်လီၤပှၤလၢ မုၢ်နံၤလၢအလီၤကမၢကမၣ်အံၤ ဟဲဝဲလံန့ၣ်လီၤ. လၢတၢ်န့ၣ်အဃိ ခဲကနံၣ်အံၤ အိၣ်ဒၣ် ပကဘၣ်စးထီၣ်အိၣ်မူတၢ်မ့ၢ်တၢ်တီအံၤန့ၣ်လီၤ. ခဲကနံၣ်အံၤဒၣ်လဲာ်, ကစၢ်ယွၤ မၤစၢၤပှၤဒ်သိး ပကစးထီၣ်အတၢ်ဖံးတၢ်မၤလၢ တၢ်မၤသီထီၣ်က့ၤ တၢ်တဂိာ်တသီၣ် အက့အခီတဖၣ်အံၤ ဆူတၢ်ဃံတၢ်လၤတဖၣ်န့ၣ်လီၤ.