ပှၤစူၢ်က့ၤနာ်က့ၤတၢ်ဖိ လၢနံၣ်ကယၤတဆံဃုအကတီၢ်န့ၣ်, ထရံစၣ် လၢအဘ့လၣ် ကွဲးဖျါထီၣ်ဝဲ “လၢတၢ်ကိးမံၤ ပဃုထံၣ်ကျိၤကျဲ အမုာ်အလၤတဖၣ် လၢတၢ်ကမၤ ကစၢ်ယွၤ အတၢ်မၤအဂီၢ်လီၤ” န့ၣ်လီၤ. လၢတၢ်သးဘၣ်ဒိအပူၤ အဝဲပာ်ဖျါထီၣ်ဝဲ, လၢတၢ်ဟ့ၣ်လီၤသးဆူကစၢ်ယွၤ လၢာ်လၢာ် ဆ့ဆ့အလီၢ်န့ၣ်, ပဃုထံၣ် တၢ်ကအိၣ်ဆိးလၢ တၢ်ပၢၤဃာ်တၢ်, ခီဖျိလၢတၢ်ဘှီၣ်တၢ်ညီ, ကျိၤကျဲလၢ “အမုာ်အလၤ” တဖၣ် လၢကျဲအါဘိအပူၤန့ၣ်လီၤ. လၢတၢ်မၤဒိၣ်ထီၣ် တၢ်နာ်န့ၢ်အီၤ လၢပနီၢ်ခိနီၢ်သးတၢ်ခဲလၢာ်အဂီၢ် ညီနုၢ်ပအဲၣ်ဒိးမၤ ကုၤရုၤကုၤရုၤ, လၢတၢ်တလီၤတံၢ်လီၤဆဲး, ဒီးလၢသူၣ်တဆူၣ်သးတဆူၣ်အပူၤန့ၣ်လီၤ. လၢတၢ်န့ၣ်အဃိ, ထရံစၣ် အၢၣ်လီၤဝဲ “ပမ့ၢ်ထိၣ်တဲာ် ပတၢ်အိၣ်မူတဖၣ်လၢနၤန့ၣ်ဒီး / ပကဘၣ်အိၣ်ဒီးတၢ်သးမံ / လၢတၢ်တူၢ်လိာ်(ယွၤ)အတၢ်ဟ့ၣ် တလီၤစီၤဘၣ်တလီၤစီၤ / တဘျီတစဲး / တုၤလီၤလၢ ပဟ့ၣ်လီၤအးလီၤပတၢ်အိၣ်မူ လၢာ်လၢာ်ဆ့ဆ့ ဆူအအိၣ်တစုန့ၣ်လီၤ.”
ပမ့ၢ်ပှၤဟီၣ်ခိၣ်ဖိတဖၣ်အဃိဒီး, ပဝဲအါဒံအါဂၤအဂီၢ် တၢ်နာ်န့ၢ်တၢ်န့ၣ် ကဲထီၣ်အသးဒၣ်ဝဲ တသ့ဘၣ်. လၢတၢ်န့ၣ်အဃိ, ပလဲၤခီဖျိဒိးန့ၢ် ကစၢ်ယွၤအဘျုးအဖှိၣ် ဒီးအတၢ်အဲၣ်န့ၣ် မ့ၢ်သန့ၤထီၣ်အသးလၢပတၢ်နာ် သန့ၤသးလၢယွၤ, ဒီးပတၢ်သ့ဒိးန့ၢ်တၢ်အလိၤန့ၣ်ဒီး, ကကဲထီၣ် တၢ်ကီတၢ်ခဲလၢပဂီၢ်န့ၣ်လီၤ.
ဘၣ်ဆၣ်, ဖဲပဖး ၁ ယိၤဟၣ် ၄:၁၉ န့ၣ်ဒီး ကစၢ်ယွၤအတၢ်အဲၣ်မ့ၢ် တၢ်လၢအဟဲဆိဝဲလၢပဂီၢ် န့ၣ်လီၤ. တချုးလၢပအဲၣ်ကစၢ်ယွၤဒံးဘၣ်န့ၣ် အဝဲအဲၣ်ဆိတ့ၢ်လံပှၤ, အဲၣ်ဝဲဒိၣ်နီၢ်မးအဃိ အသးအိၣ်လုၢ်ထီၣ် အဖိခွါလၢပဂီၢ်န့ၣ်လီၤ. လၢတၢ်ကမၢကမၣ်, ဒီးလၢတၢ်စံးဘျုးက့ၤယွၤအဂီၢ်, အဆၢဖိ ၁၀ အပူၤ စီၤယိၤဟၣ်ကွဲးဖျါထီၣ် “…တၢ်အံၤ မ့ၢ်တၢ်အဲၣ်တၢ်ကွံလီၤ” န့ၣ်လီၤ.
ဒ်သိးပကတူၢ်လိာ် အတၢ်အဲၣ်တၢ်ကွံအဂီၢ် ကစၢ်ယွၤယါဘျါပနီၢ်သးတဖၣ် ကယီကယီ, တစဲးဘၣ်တစဲး, ကဖီလီဖိန့ၣ်လီၤ. ဒ်သိး ပကဟ့ၣ်လီၤအးလီၤ ပတၢ်ပျံၤတၢ်ဖုးတဖၣ်ဆူအအိၣ် အဂီၢ် ယွၤအဘျုးအဖှိၣ်ကမၤစၢၤပှၤ တလီၤစီၤဘၣ်တလီၤစီၤန့ၣ်လီၤ. တလီၤစီၤဘၣ်တလီၤစီၤ ယွၤ အဘျုးအဖှိၣ် ကတုၤဃီၤဆူပနီၢ်သး တုၤပသ့ၣ်ညါလီၤက့ၤပသး ဖဲပလဲၤခီဖျိဘၣ်ယွၤအတၢ်ဃံ တၢ်လၤ, ဒီးအတၢ်အဲၣ်တၢ်ကွံ ဟဲလီၤဘၣ်ပှၤထူးထူးတီၤတီၤတစုန့ၣ်လီၤ.
