ဒီးကထၢၣ် ရၢးစၢၣ် မိရ် (Dr. Russell Moore) ပာ်ဖျါထီၣ်ဝဲ, အဟံၣ်ဖိဃီဖိတဖၣ် လဲၤဝဲဆူ ဖိၣ်ဃဲကၠိ ဒ်သိးကလုၢၢ်ဖိ ဖိသၣ်တဂၤအဂ့ၢ် လၢအလံာ် “တၢ်လုၢ်ဖိလၢသးသမူဒီတစိၤအဂီၢ်” တဘ့ၣ်အပူၤန့ၣ်လီၤ. ဖဲအဝဲသ့ၣ်နုာ်လီၤဆူ ပှၤပာ်ဖိဆံးဖိတဖၣ်ဒၢးပူးန့ၣ်ဒီး, လၢကမၢကမၣ်အပူၤ တၢ်ခဲလၢာ် အိၣ်ဘှ့ၣ်အိၣ်ဘှီၣ်ဝဲဒၣ်န့ၣ်လီၤ. ဖိသၣ်အိၣ်လၢလီၢ်မံခးအပူၤတဖၣ် တဟီၣ်တယၢၤနီတဘျီဘၣ်. တၢ်အံၤတမ့ၢ်လၢ အဝဲသ့ၣ် တလိၣ်ဘၣ်တၢ်နီတမံၤ အဃိဘၣ်. မ့ၢ်လၢအဝဲသ့ၣ် သ့ၣ်ညါမၤလိန့ၢ်ဝဲလၢ ပှၤကဒိကနၣ်, ဒီးကစံးဆၢအဝဲသ့ၣ်အတၢ်ဟီၣ်တၢ်ယၢၤ တအိၣ်နီတဂၤအဃိန့ၣ်လီၤ.

ဖဲယဖးဘၣ်တၢ်ဂ့ၢ်အံၤန့ၣ်ဒီး ယသးဘၣ်ဒိဝဲဒၣ်န့ၣ်လီၤ. ယသ့ၣ်နီၣ်ထီၣ်က့ၤ ဖဲလၢယဖိတဖၣ် အနီၢ်ဆံးဒံးအကတီၢ် မုၢ်နၤတဖၣ်လၢပဂံၢ်ဒွးထီၣ် က့ၤတလၢာ်အဂ့ၢ်န့ၣ်လီၤ. ဘၣ်ဖဲပနီၢ်ဒီမိၤဝၤခံဂၤ ပမံမုာ်ဘၣ်ပသးအဆၢကတီၢ်, ဖဲပနၢ်ဟူဖိတဖၣ်ကိးသတြီထီၣ် “ပါပၢ်ဧၢ ယအိၣ်တဆူၣ်ဘၣ်” မ့တမ့ၢ် “မိမိၢ်ဧၢ, ယပျံၤတၢ်လီၤ” န့ၣ်ဒီး ပဂဲၤဆၢထၢၣ်သတူာ်ကလာ် လၢတၢ်ဘၣ်ယိၣ်အပူၤန့ၣ်လီၤ. ဒ်သိးပကမၤမုာ်ထီၣ်, ဒီးကဟုကယာ် အဝဲသ့ၣ်အဂ့ၤကတၢၢ်အဂီၢ်, ပဝဲတဂၤဂၤ ပဘၣ်ဂဲၤဆၢထၢၣ်, လဲၤဃ့ၢ်နုာ်ဆူ အဝဲသ့ၣ်အဒၢးပူၤန့ၣ်လီၤ. ပတၢ်အဲၣ်လၢ ပဖိတဖၣ်အဖီခိၣ်န့ၣ် မ့ၢ်တၢ်ဂ့ၢ် တၢ်ကျိၤ လၢပဖိတဖၣ်ကကိးဃ့ ပတၢ်မၤစၢၤ ဖဲအလိၣ်ဘၣ်ဝဲအကတီၢ်န့ၣ်လီၤ.

ထါစံးထီၣ်ပတြၢၤတဖၣ်အပူၤ ပကထံၣ်ဘၣ် ထါလၢကိးသတြီထီၣ်တၢ် မ့တမ့ၢ် ထါလၢအပာ်ဖျါတၢ်သူၣ်အုးသးအူး ဆူကစၢ်ယွၤအအိၣ်တဖၣ် အိၣ်ဝဲအါမးန့ၣ်လီၤ. ပှၤအံၣ်စရ့လးဖိဟဲစိာ်အတၢ်သူၣ်အုးသးအုးတဖၣ် ဆူကစၢ်ယွၤအအိၣ်န့ၣ်, သန့ၤထီၣ်အသးလၢ ကစၢ်ယွၤအနီၢ်ကစၢ် အတၢ်ရ့လိာ်ဘၣ်ထွဲလိာ်သးဒီးအပှၤဂီၢ်မုၢ်အဃိန့ၣ်လီၤ. ပှၤတကလုာ်အံၤ လၢ ၂ မိၤရှ့ ၄:၂၂ အပူၤန့ၣ် ကစၢ်ယွၤကိးအီၤလၢ “ယဖိဝဲၢ်ကိ” အဃိဒီး, ပှၤဂီၢ်မုၢ်တဖၣ် ဃ့တၢ်မၤစၢၤလၢကစၢ်ယွၤ, ဒ်ဃ့ဝဲလၢပၢ်တဂၤအအိၣ်အသိးန့ၣ်လီၤ. ထါစံးထီၣ်ပတြၢၤ ၂၅ န့ၣ် ပကထံၣ်ဘၣ် တၢ်နာ်န့ၢ်တၢ်တီတီ လိၤလိၤဒ်သိးအံၤ, ဖဲအဆၢဖိ ၁၆-၁၇ အပူၤ “ဃၣ်နသးဆူယအိၣ်ဒီးသးကညီၤယၤတက့ၢ်… ဒုးဟးထီၣ်ကွံာ်ယၤလၢ ယတၢ်ကိၢ်တၢ်ဂီၤတဖၣ်အပူၤန့ၣ် တက့ၢ်” န့ၣ်လီၤ. ဖိသၣ်တဖၣ် မ့ၢ်အိၣ်ဒီးတၢ်နာ်န့ၢ်လီၤသး ခီဖျိဒိးန့ၢ်ဘၣ်တၢ်အဲၣ် လၢပှၤကဟုကယာ်အီၤတဂၤအအိၣ်န့ၣ်, ကဟီၣ်ဝဲဒၣ်န့ၣ်လီၤ. ဒ်ပမ့ၢ်ပှၤလၢ အစူၢ်က့ၤနာ်က့ၤကစၢ်ယ့ၣ်ရှူး, ကစၢ်ယွၤအဖိတဖၣ်အသိး, ကစၢ်ယွၤဟ့ၣ်ပှၤတၢ်ဂ့ၢ်တၢ်ကျိၤ လၢပကကိးထီၣ်အီၤအဂီၢ်န့ၣ်လီၤ. မ့ၢ်လၢအတၢ်အဲၣ်အဒိၣ်အမုၢ်အဃိ, ကစၢ်ယွၤနၢ်ဟူပှၤ, ဒီးကဟုကယာ်ပှၤန့ၣ်လီၤ.