ဘၣ်တနံၤ ဖဲတၢ်ယီၤခါကတီၢ်, ထိၣ်ဖိလၢအအိၣ်ဘူးဒီးပဟံၣ်အဃၢၤတဖၣ် အကလုၢ်သီၣ်ထီၣ်သတြူးသတြီၤ သတူာ်ကလာ်န့ၣ်လီၤ. ထိၣ်ဖိလၢ အပှ့ၤသီၣ်မုာ်တဖၣ်, အကလုၢ်လၢအသီၣ်ဃဲကအဲး သီၣ်ဆူၣ်ထီၣ်ဒိၣ်ထီၣ်လၢ သ့ၣ်တဖၣ်အလိၤန့ၣ်လီၤ. အကတၢၢ်န့ၣ် ပသ့ၣ်ညါထွဲက့ၤတၢ်ဂ့ၢ်, ဖဲလၢမုၢ်လီၤနုာ်အကတီၢ်န့ၣ်, မ့ၢ်လၢလံာ်ဃးဖးဒိၣ်တဘ့ၣ် တဖှိလီၤလၢ သ့ၣ်တထူၣ်အစိးအဃိ, ထိၣ်ဖိတဖၣ် လီၤပြံလီၤပြါ လၢတၢ်ပျံၤတၢ်ဖုး ဒီးမၤသီၣ်မၤသဲအကလုၢ် ဒ်တၢ်ဒုးပလီၢ်တၢ် ဖဲအဃ့ၢ်ပူၤဖျဲးအသးလၢ တၢ်လီၤဘၣ်ယိၣ်အပူၤန့ၣ်လီၤ.

လၢပတၢ်အိၣ်မူအပူၤ, နီၢ်သးတၢ်ဟ့ၣ်ပလီၢ်ဆိတဖၣ် ပနၢ်ဟူအီၤသ့လၢ လံာ်စီဆှံဒီတဘ့ၣ်အပူၤ, ပမ့ၢ်ကွၢ်အဒိန့ၣ်ဒီး- တၢ်ဟ့ၣ်ပလီၢ်ထီဒါ တၢ်သိၣ်ကမၣ်သီကမၣ်တၢ်တဖၣ်န့ၣ်လီၤ. တၢ်လၢပနၢ်ဟူတဖၣ်အဃိ ဘၣ်သ့ၣ်သ့ၣ် ပသးကဒ့ဒီဝဲဒၣ်န့ၣ်လီၤ. မ့ၢ်လၢကစၢ်ယ့ၣ်ရှူးအတၢ်အဲၣ်ဘၣ်ပှၤ အဃိ, ပပၢ်လၢမူခိၣ် ဟ့ၣ်မၤစၢၤပှၤ ဒ်သိးပကနၢ်ပၢၢ် လံာ်စီဆှံ ဖျါဖျါဆှံဆှံ, လၢအဒုးသ့ၣ်ညါနၢ်ပၢၢ်ပှၤလၢ နီၢ်သးအတၢ်လီၤဘၣ်ယိၣ်တဖၣ် ညီညီဘှါဘှါ အဂီၢ်န့ၣ်လီၤ.

မးသဲ ၇:၁၅ အပူၤန့ၣ် ကစၢ်ယ့ၣ်ရှူး သိၣ်လိနဲၣ်လိဝဲလၢ “ပလီၢ်သုသးလၢ ဝံအဘျၣ်လၢ အဟဲဆူသုအိၣ်, သိးဒီးသိအကူအသိး, ဒီးလၢအပူၤန့ၣ် မ့ၢ်ထွံၣ်မံၤလၢအဒူတဖၣ်” အဂ့ၢ်န့ၣ်လီၤ. အဆၢဖိ ၁၆-၁၇,၂၀ အပူၤန့ၣ် စံးကဒီးဝဲလၢ “ဒီးသုကသ့ၣ်ညါအီၤလၢ အတၤသၣ်လီၤ… ကယဲၢ်သ့ၣ်လၢအဂ့ၤ ကိးထံးဒဲးန့ၣ် သၣ်ထီၣ်တၤသၣ်အဂ့ၤလီၤ. မ့မ့ၢ်သ့ၣ်လၢအအၢတထံးန့ၣ် သၣ်ထီၣ်တၤသၣ်အအၢလီၤ.” ဝံၤန့ၣ်ဒီး, ကစၢ်ယ့ၣ်ရှူးဟ့ၣ်ပလီၢ်ပှၤလၢ “မၤသးဒ်န့ၣ်ဒီး သုကသ့ၣ်ညါအီၤလၢ အတၤသၣ်လီၤ” န့ၣ်လီၤ.

လံာ်တၢ်ကတိၤဒိ ၂၂:၃ အပူၤစ့ၢ်ကီး ဟ့ၣ်ပလီၢ်ပှၤလၢ “ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအသးလီၤ. မ့မ့ၢ်ပှၤအတမၤလိဘၣ်တၢ် ဘၣ်န့ၣ် လဲၤဒၣ်တၢ်, ဒီးဘၣ်တၢ်ဒုးတၢ်ဖှီၣ်လီၤ” န့ၣ်လီၤ. တၢ်စဲထီဃာ်သးဒီး တၢ်ဒုးပလီၢ် ဒ်သိးအံၤတဖၣ်န့ၣ် မ့ၢ်ကစၢ်ယွၤအတၢ်အဲၣ်လၢအဒီတဒၢတၢ်, လၢပဂီၢ် လီၣ်ဖျါထီၣ်အသးလၢအကလုၢ်ကထါအပူၤန့ၣ်လီၤ.

ဒ်ထိၣ်ဖိတဖၣ် ဟ့ၣ်ပလီၢ်လိာ်သးလၢနီၢ်ခိအတၢ်လီၤပျံၤလီၤဖုးအသိး, မ်ပကဒိကနၣ်လံာ်စီဆှံအတၢ်ဟ့ၣ်ပလီၢ်ပှၤ ဒ်သိးပကယူၤပူၤဖျဲးပသးလၢ နီၢ်သးအတၢ်လီၤဘၣ်ယိၣ်ဘၣ်ဘီ, ဒီးဟံးန့ၢ်တၢ်အိၣ်တဒၢ လၢကစၢ်ယွၤအစုတီၤအဖီလာ်န့ၣ်တက့ၢ်.