အပူၤကွံာ်တဘျုးနံၣ်န့ၣ် ဖဲလၢယမၤလိတၢ်လၢ စ့ၤမ့ၤနရံအကတီၢ် ပအိၣ်ဒီး တနွံတဘျီ ခၠးပဲၣ် (Chapel) တၢ်ဘါန့ၣ်လီၤ. ဘၣ်ဖဲတၢ်ဘါတဘျီန့ၣ်, ပဝဲကၠိဖိတဖၣ် ပသးဝံၣ်သကိး “ယွၤန့ၣ်ဒိၣ်ဝဲ” အကတီၢ် ယထံၣ်ပသရၣ်သၢဂၤ လၢပအဲၣ်ဘၣ်တဖၣ်န့ၣ် သးဝံၣ်ဃုာ်ဒီးပှၤ လၢတၢ်သးဆူၣ် န့ၣ်လီၤ. အဝဲသ့ၣ်အမဲာ်သၣ်ကပြုၢ်ကပြီၤထီၣ် ခီဖျီလၢတၢ်သးခု, ဒီးမ့ၢ်လၢအဝဲသ့ၣ် စူၢ်နာ် ကစၢ်ယွၤအဃိ တၢ်မၤအသးဒ်သိးအံၤန့ၣ် ကဲထီၣ်သ့ဝဲဒၣ်န့ၣ်လီၤ. နံၣ်တဖၣ်လဲၤပူၤကွံာ်ဝံၤန့ၣ်ဒီး အဝဲသ့ၣ်တဂၤစုာ်စုာ် တူၢ်ဘၣ်ခီၣ်ဘၣ်တၢ်ဆါအၢအကတီၢ်, တၢ်နာ်တမံၤဃီအံၤအဃိ တူၢ်ဝဲခီၣ်ဝဲ တၢ်ဆူးတၢ်ဆါန့ၢ်, ဒီးဟ့ၣ်ဂံၢ်ဟ့ၣ်ဘါပှၤဂၤသ့ဝဲဒၣ်စ့ၢ်ကီးန့ၣ်လီၤ.
တနံၤအံၤ, ဒ်သိးယကလဲၤခီဖျိန့ၢ် တၢ်မၤကွၢ်အကီအခဲတဖၣ်အဂီၢ်, တၢ်လၢအသဆၣ်ထီၣ်ယၤ မ့ၢ်တၢ်သ့ၣ်နီၣ်ထီၣ် ယသရၣ်တဖၣ်သးဝံၣ်တၢ်န့ၣ်လီၤ. ပှၤအိၣ်မူအိၣ်ဂဲၤလၢတၢ်နာ်အဂ့ၢ်အကျိၤ အါမးတဖၣ်အကျါ, အဝဲသ့ၣ်မ့ၢ်ပှၤတနီၤ, လၢယဂီၢ်အဝဲသ့ၣ်မ့ၢ် ပှၤလၢအမၤဆူၣ်ထီၣ်ပသးန့ၣ်လီၤ. အဝဲသ့ၣ်မ့ၢ်ပှၤလၢအမၤသ့ၣ်နီၣ်ထီၣ်က့ၤတၢ် ဖဲလၢ ဧ့ၤဘြံၤ ၁၂:၂-၃ အပူၤ ပှၤကွဲးလံာ်ကွဲမုာ်ပှၤလၢ ပကပာ်လီၤသးကျၢၤမှုဆှု လၢကစၢ်ယ့ၣ်ရှူးအပူၤ ဒီးစံးဝဲ “မ်ပကကွၢ်ဃီၤတၢ်ဆူအအိၣ်တက့ၢ်, အဝဲဒၣ်ဒိးထူၣ်စုညါ, … လၢတၢ်သးခုအိၣ်ပာ်လီၤအသးလၢအမဲာ်ညါအဃိ…” န့ၣ်လီၤ.
ဖဲပဘၣ်လဲၤခီဖျိတၢ်မၤကွၢ်တဖၣ်အကတီၢ်- လၢတၢ်မၤအၢမၤနးပှၤမ့ၢ်ဂ့ၤ, လၢတၢ်အိၣ်မူ အတၢ်တၤပှၤတဖၣ်မ့ၢ်ဂ့ၤ- ပကလဲၤတၢ်ဆူညါအဂီၢ် ကမၤကီမၤခဲပှၤဘၣ်ဆၣ်, ပအိၣ်ဒီး ပှၤလၢ ဟံးဃာ်ယွၤအကလုၢ်ကထါ, ဒီးနာ်န့ၢ်အတၢ်အၢၣ်လီၤအီၤလီၤတဖၣ်န့ၣ် မ့ၢ်တၢ်အဒိတဖၣ်လၢပဂီၢ် န့ၣ်လီၤ. လၢတၢ်သ့ၣ်နီၣ်ထီၣ် ကစၢ်ယ့ၣ်ရှူး- ဒီးပှၤလၢအလဲၤတ့ၢ်လံလၢပမဲာ်ညါတဖၣ်- တူၢ်တၢ်န့ၢ်ဝဲ အသိး အဆၢဖိ ၁ ပာ်ဖျါဝဲ “ဒီးတၢ်ဃ့ၢ်သတြီၤအိၣ်လၢပမဲာ်ညါန့ၣ်, မ်ပဃ့ၢ်လၢတၢ်သးစူၤတက့ၢ်” န့ၣ်လီၤ. အဆၢဖိ ၃ အပူၤ ပှၤကွဲးတၢ်ဟ့ၣ်ဂံၢ်ဟ့ၣ်ဘါပှၤလၢ “ကွၢ်ဆိကမိၣ်ကစၢ်ယ့ၣ်ရှူး… ဒ်သိးတၢ်ဘှံးသုသးသုတအိၣ်, ဒီးသုသုတလီၤဘှံးလီၤတီၤ တဂ့ၤန့ၣ်တက့ၢ်” န့ၣ်လီၤ. ခဲကနံၣ်အံၤ ယသရၣ်တဖၣ် ကသးခုလၢမူခိၣ်, ဘၣ်သ့ၣ်သ့ၣ်ကစံးဝဲလၢ – “တၢ်အိၣ်မူလၢ တၢ်စူၢ်တၢ်နာ်န့ၣ်ဂ့ၤဝဲကြၢးဝဲန့ၣ်လီၤ. လဲၤဆူညါထီဘိန့ၣ်တက့ၢ်” န့ၣ်လီၤ.
