အခီၣ်ထံးန့ၣ် ယတပာ်သူၣ်ပာ်သးဘၣ် ပှၤတဂၤအံၤန့ၣ်ဘၣ်. ယကအီၣ်ဂီၤတၢ်အီၣ်အဂီၢ် ယဟဲလီၤ လၢယဟိၣ်ထဲန့ၣ်လီၤ. တၢ်ခဲလၢာ်အိၣ်ကဆှဲကဆှီလၢတၢ်အီၣ်အဒၢးပူၤန့ၣ်လီၤ. တၢ်အီၣ်တၢ်အီ တဖၣ်အိၣ်ပှဲၤလၢစီၣ်နီၤခိၣ်န့ၣ်လီၤ. တၢ်ခုၣ်ဒၢအပူၤ တၢ်အီၣ်တၢ်အီအိၣ်အပှဲၤ, တၢ်ပီးတၢ်လီလၢ ပစူးကါအီၤတဖၣ် ဘၣ်တၢ်ပာ်အီၤဂ့ၤဂ့ၤ, ဒီးကယၢ်တၢ်ခဲလၢာ်လၢပှဲၤဝဲဒၣ်န့ၣ်လီၤ.
ဖဲန့ၣ် ယထံၣ်အီၤန့ၣ်လီၤ. ဖျါလၢအအိၣ်ဒီးတၢ်ဆီၣ်လီၤသးတဂၤ, မၤပှဲၤတၢ်လၢအလိၣ်တဖၣ်, ဒီးမၤကဆှဲကဆှီတၢ်န့ၣ်လီၤ. တမ့ၢ်မၤဝဲအတၢ်မၤဒ်သိးပှၤကပာ်သူၣ်ပာ်သးအီၤအဂီၢ်ဘၣ်. ဘၣ်ဆၣ် ယဆ့ၣ်နီၤကွၢ်အဝဲမၤတၢ်ယံာ်ထီၣ်ယံာ်ထီၣ်, ဒီးလၢယသးပူၤတၢ်ကမၢကမၣ်အါထီၣ်ဝဲဒၣ်န့ၣ်လီၤ. ပှၤတဂၤအံၤ မၤတၢ်ချ့, အိၣ်ဒီးတၢ်ပာ်သူၣ်ပာ်သး လၢတၢ်ကိးမံၤ, ဒီးတချူးလၢပှၤတဂၤဂၤလိၣ်ဘၣ် တၢ်တမံၤမံၤန့ၣ် မၤပှဲၤက့ၤတၢ်ကိးမံၤဒဲးန့ၣ်လီၤ. ယနီၢ်ကစၢ်ဒၣ်ဝဲ ဒ်အမ့ၢ်ပှၤမၤတ့ၢ်တၢ်လၢ တၢ်ကတဲာ် ကတီၤရဲၣ်ကျဲၤ တၢ်အီၣ်တၢ်အီတဂၤအသိး ယပာ်သူၣ်ပာ်သးလၢ အဝဲတပျဲတၢ်လီၤဟိလၢ တၢ်ကိးမံၤ အပူၤအဂီၢ်န့ၣ်လီၤ. မ့ၢ်လၢပှၤတဂၤအံၤမၤတၢ် လၢတၢ်သးတီအဃိ ပှၤပာ်သူၣ်ပာ်သးအီၤ အိၣ်ဒၣ်ထဲ ပှၤစှၤဂၤဘၣ်ဆၣ် တၢ်ခဲလၢာ် လၢပှဲၤဝဲဒၣ်န့ၣ်လီၤ.
ယခိးကွၢ် ပှၤတဂၤအံၤဖံးတၢ်မၤတၢ်လီၤတံၢ်လီၤဆဲး, မၤဝဲအဂ့ၤကတၢၢ်န့ၣ် ယသ့ၣ်နီၣ် စီၤပီလူး ဟ့ၣ်ဂံၢ်ဟ့ၣ်ဘါ ပှၤသ့းစၤလနံဖိတဖၣ်, လၢ ၁ သ့း ၄:၁၁-၁၂ အပူၤစံးဝဲ “ပလီၢ်သုသးသပှၢ်ပှၢ် လၢသုကအိၣ်ဂၢၢ်အိၣ်ဘှီၣ် ဒီးမၤသုတၢ်ဒၣ်သုဝဲ ဒီးမၤတၢ်ဖံးတၢ်လၢ သုစုဒၣ်သုဝဲ ဒ်ယမၤလိာ်တ့ၢ်သု အသိးန့ၣ်… ဒ်သိး သုကလဲၤတၢ်ဂ့ၤဂ့ၤဘၣ်ဘၣ် လၢပှၤအိၣ်လၢခိအမဲာ်ညါ…” န့ၣ်လီၤ. စီၤပီလူး နၢ်ပၢၢ်ဝဲလၢ ပှၤမၤတၢ်တီတီန့ၣ် ကမၤန့ၢ်ပှၤဂၤတဖၣ်အတၢ်ပာ်ဒိၣ်ပးကဲအီၤန့ၣ်လီၤ. တၢ်ဟ့ၣ်ထီၣ် ပတၢ်အုၣ်သး ဘှ့ၣ်ဘှ့ၣ်ဘှီၣ်ဘှီၣ်ဖိအံၤ, ဖျါလၢကမ့ၢ်တၢ်မၤအဆံးဖိဘၣ်ဆၣ် အိၣ်ပှဲၤဒီးအသူး အသ့ၣ်, အတၢ်ပညိၣ်အဃိ အဘျုးအဖှိၣ်အိၣ်ဝဲလၢတၢ်သးခုကစီၣ်အဂီၢ်ဒိၣ်မးန့ၣ်လီၤ.
ပှၤလၢယထံၣ်ဘၣ်အီၤဖဲမုၢ်နံၤအံၤ, မ့ၢ်ပှၤစူၢ်နာ်ခရံာ်တဂၤဧါန့ၣ် ယတသ့ၣ်ညါဘၣ်. ဘၣ်ဆၣ် ဒ်သိးယကသန့ၤသးလၢယွၤ, ဒီးအိၣ်မူအိၣ်ဂဲၤလၢတၢ်သးတီကစုဒုအပူၤ, တၢ်လၢအလီၣ်ဖျါထီၣ် ကစၢ်အတၢ်တီတၢ်လိၤအကျဲတဖၣ်အဂီၢ် အတၢ်မၤဂ့ၤတၢ် ကစုဒုဖိအံၤ ဒုးသ့ၣ်နီၣ်ယၤအဃိ, ယစံးဘျုးဘၣ်အီၤန့ၣ်လီၤ.
