ပှၤမၤလိပီၣ်လဲၣ်ဂ့ၢ်ကျိၤ (Oceanographer) စ့ဘယၣ် အါ (Sylvia Earle)န့ၣ် အနီၢ်ကစၢ်ထံၣ်ဘၣ် ပီၣ်လဲၣ်အလၢၢ်သိၣ်ကျိၤတဖၣ် ဟးဂီၤကွံာ်ဝဲဒၣ်န့ၣ်လီၤ. အဝဲဒုးအိၣ်ထီၣ် မံးရှၢၣ်လါအဲး (Mission Blue) တၢ်ကရၢကရိ လၢကဒုးအိၣ်ထီၣ် တၢ်မုၢ်လၢ် အတၢ်လီၢ်တၢ်ကျဲတဖၣ် “hope spots” လၢဟီၣ်ခိၣ်ဒီဘ့ၣ်အဂီၢ်န့ၣ်လီၤ. လၢဟီၣ်ခိၣ်ဒီဘ့ၣ် တၢ်လီၢ်လီၤဆီတဖၣ်အံၤ မ့ၢ်ဝဲ “တၢ်လီၤဘၣ်ယိၣ် လၢပီၣ်လဲၣ်မိၢ်ပှၢ်အတၢ်အိၣ်ဆူၣ်အိၣ်ချ့အဂီၢ်,” ဒီးမ့ၢ်စ့ၢ်ကီးတၢ်လၢ ကမၤဘၣ်ဒိပတၢ်အိၣ်မူတဖၣ်လၢ ဟီၣ်ခိၣ်အံၤန့ၣ်လီၤ. ခီဖျိလၢတၢ်တိာ်သူၣ်ပာ်သးအပူၤ, တၢ်ကဟုကယာ်က့ၤတၢ်လီၢ်တဖၣ်အံၤန့ၣ် ပှၤသ့စဲအ့ၣ်ဖိတဖၣ်ထံၣ်ဝဲ, တၢ်အတဝၢတဖၣ်လၢ ပီၣ်လဲၣ်ထံဖံးခိၣ်အဖီလာ်တဖၣ် အတၢ်ဘၣ်ထွဲလိာ်က့ၤအသးဂ့ၤဂ့ၤ, ဒီးတၢ်ဘၣ်ယိၣ်အလီၢ်အိၣ်လၢ တၢ်သးသမူကလုာ်ဖိတဖၣ် ကလီၤမၢ်ဘူးထီၣ်လံအဃိ ဘၣ်တၢ်ကၢၤက့ၤ, ကတီၤက့ၤအီၤန့ၣ်လီၤ.

ဖဲစံးထီၣ်ပတြၢၤ ၃၃:၆-၉ န့ၣ် ပှၤကွဲးထါအၢၣ်လီၤတူၢ်လိာ်ဝဲလၢ ကစၢ်ယွၤဟ့ၣ်လီၤအကလုၢ်, ဒီးတၢ်ခဲလၢာ်ကဲထီၣ်လိၣ်ထီၣ်, ဒီးတၢ်လၢအမၤဝဲခဲလၢာ် ကအိၣ်စံၣ်အိၣ်ကျၢၤအဂီၢ် မၤလီၤတံၢ်ဝဲဒၣ် န့ၣ်လီၤ. အဆၢဖိ ၁၁-၁၉ အပူၤပာ်ဖျါဝဲ ကစၢ်ယွၤ ဒ်အမ့ၢ်ပှၤပၢဆှၢ စၢၤသွဲၣ်အစိၤစိၤ, ဒီးဘီမုၢ်တဖၣ် အသိးအဃိ, ထဲဒၣ်ယွၤတဂၤဧိၤ ကမၤလိၤမၤဘၣ်က့ၤ တၢ်ရ့လိာ်ဘၣ်ထွဲလိာ်သးတဖၣ်, ကအုၣ်က့ၤ ခီၣ်က့ၤသးသမူတဖၣ်, ဒီးကဒုးအိၣ်ထီၣ်က့ၤ တၢ်မုၢ်လၢ်န့ၣ်လီၤ. ကွၢ်ဖဲကမ့ၢ်ဒၣ်ဝဲ, ဒ်သိးပကမ့ၢ် ပှၤကဟုကယာ်ဟီၣ်ခိၣ်ဃုာ်ဒီးကယဲၢ်ပှၤလၢအဝဲတ့လီၤဝဲတဖၣ်အဂီၢ် ကစၢ်ယွၤကွဲမုာ်ပှၤန့ၣ်လီၤ.

ဖဲပထံၣ်တၢၢ်ကွဲၤအလွဲၢ် လၢမူခိၣ်အလွဲၢ်ဝါဃးအကျါ တၢ်အၢၣ် အပူၤ, မ့တမ့ၢ် တၢ်ဆဲးကတြ့ၣ်ထီၣ်လၢလပီလၢပီၣ်လဲၣ်ပူၤ ဟဲဒိတီၢ် လၢၢ်မုၣ်တဖၣ်လၢပီၣ်လဲၣ်နံၤ, ဒီးလၢတၢ်သ့ၣ်တဖၣ်အံၤအဂီၢ်, ဖဲပစံးထီၣ်ပတြၢၤကစၢ်ယွၤတဘျီလၢ်လၢ်န့ၣ် အဆၢဖိ ၂၂ ပာ်ဖျါဝဲလၢ ဒ်ပအိၣ်ဒီးတၢ်မုၢ်လၢ်လၢကစၢ်အပူၤအဃိ, ပကိးသတြီဘိးဘၣ်သ့ၣ်ညါ အတၢ်အဲၣ်လၢတလီၤတူာ် လီၤကာ်, ဒီးအတၢ်အိၣ်ဒီးပှၤ သ့ဝဲဒၣ်န့ၣ်လီၤ.

ဖဲပဆိကမိၣ်ထီၣ် တၢ်မၤအသးလၢဟီၣ်ခိၣ်န့ၣ်ဒီး ပဘၣ် တၢ်လ့ပစီပှၤ ဒ်သိးပသးကဟးဂီၤ မ့တမ့ၢ် ပကပျံၤတၢ်အဂီၢ် ဒီးဘၣ်သ့ၣ်သ့ၣ် ပကဆိကမိၣ်လၢ ပမၤတၢ်လီၤလီၤဆီဆီ တသ့နီတမံၤဘၣ် န့ၣ်လီၤ. ဘၣ်ဆၣ် ဒ်ယွၤအတၢ်ကဟုကယာ်ကရၢဖိတဂၤအသိး ပမ့ၢ်မၤလၢပှဲၤပမူဒါန့ၣ်ဒီး, ကမ့ၢ် တၢ်မၤလၤကပီၤယွၤ ဒ်ပှၤတ့လီၤတၢ်တဂၤအသိး, ဒီးကမ့ၢ်တၢ်မၤစၢၤပှၤဂၤတဖၣ် ဒ်သိးကအိၣ်ဒီး တၢ်မုၢ်လၢ် အတၢ်လီၢ်တၢ်ကျဲ လၢကစၢ်ယ့ၣ်ရှူးအပူၤအဂီၢ်န့ၣ်လီၤ.