Ernest Hemingway (အၢနဲး ဟဲမ့ၣ်ဝ့) အလံာ်တၢ်တဲဖးထီအပူၤ ပာ်ဖျါဝဲ အတံၤသကိးလၢအီသံးဆူၣ်မးတဖၣ်ဒီးလၢတယံာ်ဒံးဘၣ်န့ၣ် ဘၣ်ကွၢ်ဆၢၣ်မဲာ် ဟီၣ်ခိၣ်ဒီဘ့ၣ် တၢ်ဒုးဖးဒိၣ် တၢတဘျီန့ၣ်လီၤ. ခီဖျိလၢ တၢ်ဒုးဖးဒိၣ် မၤဟးဂီၤတၢ် ဒိၣ်ဒိၣ်ကလဲာ်အဃိ အဝဲသ့ၣ်တူၢ်ဘၣ်ခီၣ်ဘၣ်ဝဲ လိၤလိၤမ့ၢ်ဂ့ၤ, ဘၣ်ဒိဘၣ်ထံးတဆီမ့ၢ်ဂ့ၤ, အပူၤလီၢ်ခီမဲာ်တဖၣ် အိၣ်လီၤတဲာ်တ့ၢ်ဒီးအဝဲသ့ၣ်အဃိ လၢတၢ်မၤမုာ်က့ၤအသးအဂီၢ် မၤမူးအီၣ်အီမုာ်လၤတဖၣ် တၢ်ဂုာ်လဲၤဖျိကွၢ်တဖၣ်, ဒီးတၢ်ဟးအိၣ်ဟးမံတဖၣ်န့ၣ်လီၤ. ဒ်သိးကမၤဘျါက့ၤ အတၢ်တူၢ်ဘၣ်ခီၣ်ဘၣ်တဖၣ်အဂီၢ် ထီဘိန့ၣ် တၢ်အီသံးမ့ၢ် တၢ်တမံၤဘၣ်ဆၣ် တၢ်သးခုတအိၣ်ဒီးအဝဲသ့ၣ် နီတဂၤဘၣ်.
ဟဲမ့ၣ်ဝ့ အလံာ်အခိၣ်တီ ‘The Sun Also Rises’ (မုၢ်ဟဲထီၣ်စ့ၢ်ကီး) အိၣ်ဟဲလိၤလိၤ ဖဲ စံၣ်တဲၤတဲ ၁:၁ န့ၣ် စီၤပၤရှလိၤမိၤ ပာ်ဖျါလီၤအသး ဒ်အမ့ၢ် ပှၤစံၣ်တဲၤတဲလီၤတၢ်တဂၤန့ၣ်လီၤ. အဆၢဖိ ၂ ပာ်ဖျါဝဲ လၢ အမၤလိန့ၢ် “တၢ်ခဲလၢာ် မ့ၢ်တၢ်ကလီကလီ”,ဒီးလၢ အဆၢဖိ ၃ အပူၤသံကွၢ်ဝဲ “ပှၤကညီဖိလၢ အမၤတၢ်န့ၣ် မ့ၢ်အန့ၢ်ဘျုးတၢ်မနုၤလဲၣ်” န့ၣ်လီၤ. အဆၢဖိ ၅-၇ စံးဝဲ စီၤရှလိၤမိၤ ထံၣ် မုၢ်ဟဲထီၣ် ဒီးမုၢ်လီၤနုာ်, ကလံၤအူ ဆူန့ၣ်ဆူအံၤ ဒီးထံကျိယွၤလီၤဆူ ပီၣ်လဲၣ်ပူၤခဲလၢာ်ဘၣ်ဆၣ် ပီၣ်လဲၣ် လၢတပှဲၤဘၣ်အဂ့ၢ်န့ၣ်လီၤ. အဆၢဖိ ၁၁ န့ၣ် စံးဝဲ အကတၢၢ်န့ၣ် ကယဲၢ်တၢ်ခဲလၢာ် ဘၣ်တၢ်သးပ့ၤနီၣ်ကွံာ်ဝဲဒၣ်န့ၣ်လီၤ.
ဟဲမ့ၣ်ဝ့ ဒီးပှၤကွဲးလံာ်စံၣ်တဲၤတဲလီၤတၢ်ခံဂၤလၢာ် စံးဘၣ်ပှၤလိၤလိၤ လၢပအိၣ်မူ ထဲဒၣ်တၢ်မူတစိၤအံၤအဂီၢ်န့ၣ် မ့ၢ်ဒၣ် တၢ်ကလီကလီ လၢဖျါတဂ့ၤတဃိဘၣ်န့ၣ်လီၤ. ဘၣ်ဆၣ် လၢအလံာ်ပူၤ စီၤရှလိၤမိၤ ပာ်ဖျါနဲၣ်ဆိပှၤ ကစၢ်ယွၤလၢ အလီၤလးတဂၤအဂ့ၢ်န့ၣ်လီၤ. တၢ်လီၤထူလီၤယိာ်န့ၣ် အိၣ်ဝဲ ဒီးတၢ်တမံၤအံၤ မ့ၢ်တၢ်မုၢ်လၢ်နီၢ်နီၢ်န့ၣ်လီၤ. လံာ်စံၣ်တဲၤတဲလီၤတၢ် ပာ်ဖျါပှၤ ဒ်အတၢ်မ့ၢ်တၢ်နီၢ်နီၢ်အသိးပာ်ဖျါစ့ၢ်ကီးဝဲ ကစၢ်ယွၤ ဒ်တၢ်မ့ၢ်တၢ်အသိးန့ၣ်လီၤ. စံၣ်တဲၤတဲတၢ် ၃:၁၄ အပူၤ စီၤရှလိၤမိၤစံးဝဲ “ကယဲၢ်တၢ်လၢယွၤမၤဝဲန့ၣ် ကအိၣ်ဝဲလီၤထူလီၤယိာ်လီၤ”, ဒီးပတၢ်မုၢ်လၢ်ဖးဒိၣ် အိၣ်ဝဲဒၣ် ဖဲန့ၣ်လီၤ. မ့ၢ်လၢကစၢ်ယွၤဟ့ၣ်ပှၤ အတၢ်ဟ့ၣ် လၢအမ့ၢ် အဖိခွါယ့ၣ်ရှူးအဃိန့ၣ်လီၤ.
မ့တမ့ၢ် လၢကစၢ်ယွၤဘၣ်န့ၣ်ဒီး ပကလီၤထွံ ဘၣ်တၢ်စိာ်ဝ့ၤဝီၤပှၤ ဖဲပီၣ်လဲၣ်လၢ အကတၢၢ်တအိၣ် တၢ်သးမံတအိၣ်နီတဘျီဘၣ် အပူၤန့ၣ်လီၤ. ခီဖျိလၢအဖိခွါ ယ့ၣ်ရှူးအတၢ် ဂဲၤထၢၣ်သမူထီၣ်က့ၤ အဃိ ပဘၣ်တၢ်မၤဘၣ်လိာ်ဖိးဒ့လိာ်သးဒီး ကစၢ်ယွၤ ဒီးပထံၣ်န့ၢ်က့ၤ တၢ်အိၣ်မူအခီပညီ, ပလုၢ်ပပှ့ၤ ဒီးပတၢ်တိာ်တဖၣ်န့ၣ်လီၤ.
