ဖဲ ၁၉၅၁ နံၣ်န့ၣ်, ကၠိစဲး စတၤလ့ (Joseph Stalin) ဒ်သိးကကတီၤဃာ် အတၢ်အိၣ်ဆူၣ်အိၣ်ချ့ အဂီၢ်, အကသံၣ်သရၣ် ဟ့ၣ်ကူၣ်အီၤလၢ ကမၤစှၤလီၤ အတၢ်မၤတဖၣ်န့ၣ်လီၤ. ပှၤပၢဆှၢ ဆိၣ်ဘံယဲး ယူနယဲၢ် (Soviet Union) တဂၤအံၤ ဆှိးထီၣ် ကသံၣ်သရၣ် ဒ်ပှၤကွၢ်ဟုၣ်ကွၢ်စုးတၢ်, ဒီးမၢပှၤဖီၣ်အီၤန့ၣ်လီၤ. ပှၤပၢဆူၣ်ပၢစိးတၢ်တဂၤအံၤ, မၤနးမၤဖှီၣ်ပှၤအါဂၤ လၢတၢ်လီတၢ်ဝ့ၤအပူၤ အဃိ တၢ်လၢအမ့ၢ်အတီန့ၣ်တူၢ်လိာ်ဝဲတသ့ဘၣ်န့ၣ်လီၤ. ဒ်အမၤတ့ၢ်ဝဲ တလီၢ်လီၢ်အသိး, အဝဲပဲာ်ပျီသုးကွံာ် ပှၤလၢအစံးကတိၤပာ်ဖျါ တၢ်အမ့ၢ်အတီတဖၣ်န့ၣ်လီၤ. ဒ်လဲၣ်ဂ့ၤ ဒ်လဲၣ်ဂ့ၤ, တၢ်မ့ၢ်တၢ်တီ မၤနၢၤတၢ်န့ၣ်လီၤ. စတၤလ့ သံဖဲ ၁၉၅၃ နံၣ်န့ၣ်လီၤ.
ယံး ၃၈:၁-၆, ၄၀:၁ အပူၤပာ်ဖျါဝဲလၢ ဝံယံးရမံယၤ ဘၣ်တၢ်တၢ်ဖီၣ်အီၤ, ဒီးပှၤစၢဃာ်လၢ ပျံၤသွဲ ခီဖျိလၢအတၢ်ကစီၣ်တဖၣ် နးဝဲဆူၣ်ဝဲဒိၣ်မး, တၢ်ကမၤအသးနီၢ်နီၢ် လၢဝ့ၢ်ယရူၤရှလ့ၣ် အဂ့ၢ်န့ၣ် ဝံယံးရမံယၤစံးဘၣ် ယူဒၤအစီၤပၤလီၤတံၢ်လီၤဆဲးအဃိန့ၣ်လီၤ. ယံး ၃၈:၂၀ အပူၤန့ၣ်, ဝံစံးဘၣ် စီၤပၤစံးဒကံယၤလၢ “စူၢ်လၢ်ယွၤအကလုၢ် လၢယကတိၤတၢ်ဒီးနၤတက့ၢ်” န့ၣ်လီၤ. ပှၤဂီၢ်မုၢ် မ့ၢ်တဟ့ၣ်လီၤအသးဆူ သုးမုၢ်တဖၣ်လၢ အိၣ်ကဝီၤဃာ်ဝ့ၢ်ဘၣ်န့ၣ်ဒီး, တၢ်မၤအသး ကအၢန့ၢ်တၢ်အန့ၣ်လီၤ. အဆၢဖိ ၂၃ အပူၤ ဝံယံးရမံယၤ ဟ့ၣ်ပလီၢ်ဝဲ “ပှၤကဟဲစိာ်နမါခဲလၢာ် ဒီးနဖိနလံၤ ဆူပှၤက့ၤစ့းဖိအအိၣ်, ဒီးနတပူၤတဖျဲးဘၣ်လၢ အစုဘၣ်. ဒီးဘၤဘူၤလိၣ် အစီၤပၤ အစုကဖီၣ်ဃာ်နၤ…” န့ၣ်လီၤ. အဆၢဒိၣ် ၃၉ ပာ်ဖျါဝဲ စီၤပၤစံးဒကံယၤ တမၤဝဲဒ်တၢ်အမ့ၢ် အတီအံၤဘၣ်န့ၣ်လီၤ. အကတၢၢ်န့ၣ် ပှၤဘၤဘူၤလိၣ်ဖိတဖၣ် ဖီၣ်န့ၢ်စီၤပၤ, ဒီးမၤသံကွံာ် အဖိခွါ တဖၣ်ခဲလၢာ်, ဒီးဆူထီၣ်ကွံာ်ဝ့ၢ်လၢ မ့ၣ်အူန့ၣ်လီၤ
လၢတၢ်ဂ့ၢ်တမံၤမံၤအပူၤန့ၣ်, ပှၤဟီၣ်ခိၣ်ဖိကိးဂၤဒဲး ကဘၣ်ကွၢ်ဆၢၣ်မဲာ်တၢ်ဂ့ၢ်ကီ ဒ်စီၤပၤ စံးဒကံယၤအသိးန့ၣ်လီၤ. ပဘၣ်တၢ်ကတြံာ်ဃာ်ပသး လၢပကစၢ်ဒၣ်ဝဲအတၢ်ဒဲးဘး, ဒီးပဃုထၢ တၢ်လၢအကမၣ်တဖၣ်အပူၤန့ၣ်လီၤ. မ့ၢ်လၢပလဲၤကပာ် ပှၤလၢအစံးကတိၤပာ်ဖျါ ပနီၢ်ကစၢ်အဂ့ၢ် အကျိၤအမ့ၢ်အတီတဖၣ်အဃိ ကဲထီၣ်လၢပမၤကီထီၣ်တၢ်လီၤ. တၢ်တမံၤဧိၤလၢ ပကဘၣ်မၤန့ၣ် မ့ၢ်ဒၣ်တၢ်ဟ့ၣ်လီၤသးဆူကစၢ်လၢအစံးဝဲဖဲ ယိၤ ၁၄ :၆ အပူၤ “ယဲဒၣ်အံၤ ယမ့ၢ်ကျဲ, ဒီးတၢ်မ့ၢ် တၢ်တီ, ဒီးတၢ်မူလီၤ. မ့တမ့ၢ်ဘၣ်ယၤဒီး, ပှၤတဟဲဘၣ်ဆူ ပၢ်အအိၣ်နီတဂၤဘၣ်” န့ၣ်လီၤ.
