ဖဲ အံၣ်လ့ (Elaine) သ့ၣ်ညါဝဲလၢ အဝဲအိၣ်ဒီး ခဲစၢၣ်တၢ်ဆါ လၢအကတၢၢ်တပတီၢ်အဃိ, တယံာ်ဘၣ်အတီၢ်ပူၤ ကဘၣ်လဲၤအိၣ်ဒီးကစၢ်ယ့ၣ်ရှူးန့ၣ် အဝဲဒီး အဝၤသးဘိ ခၠၢး (Chuck) သ့ၣ်ညါဝဲန့ၣ်လီၤ. လၢယဲၢ်ဆံလွံၢ်နံၣ်အတီၢ်ပူၤန့ၣ် အဝဲသ့ၣ်ခံဂၤလိာ် ပာ်လုၢ်ပာ်ပှ့ၤ ထါစံးထီၣ်ပတြၢၤ ၂၃ အတၢ်အၢၣ်လီၤအီလီၤ လၢယွၤကအိၣ်ဒီး အဝဲသ့ၣ်အတၢ်လဲၤခီဖျိသကိး တြီလာ်လၢအယိာ်ကတၢၢ်, ဒီးအကီခဲကတၢၢ်တဖၣ်န့ၣ်လီၤ. မ့ၢ်လၢ အံၣ်လ့ စူၢ်က့ၤနာ်က့ၤတ့ၢ်လံကစၢ်ယ့ၣ်ရှူး လၢနံၣ်လၢအပူၤကွံာ် အဆံတဖၣ်လံအဃိ, ဆၢမုၢ်လၢ်ဟံးန့ၢ်ဂံၢ်ဘါ, ဒီးအိၣ်ကတဲာ်ကတီၤပာ်အသးဂ့ၤဂ့ၤ လၢတၢ်ထံၣ်လိာ်သးဒီး ကစၢ်ယ့ၣ်ရှူးအဂီၢ်န့ၣ်လီၤ.
လၢအမါသးဘိအတၢ်သ့ၣ်နီၣ်ထီၣ်က့ၤတၢ်ဘါန့ၣ်, ခၠၢး ပာ်ဖျါဝဲလၢ အဘၣ်လဲၤဒံးဒၣ်တၢ် အဖၢမုၢ်လၢ “တၢ်သံအကဒုအကစၢၢ်အကဆူးအပူၤ” (စံး၂၃:၄) န့ၣ်လီၤ. အမါသးဘိ အတၢ်အိၣ်မူလၢ မူခိၣ်န့ၣ် စးထီၣ်တ့ၢ်လံဘၣ်ဆၣ် “တၢ်သံအကဒု” န့ၣ် အိၣ်ဒံးဝဲဒၣ်ဒီးအီၤ ဃုာ်ဒီးပှၤလၢအအဲၣ်ဘၣ် အဲၣ်လ့ ဒိၣ်မးတဖၣ်အဂီၢ်န့ၣ်လီၤ.
ဖဲပလဲၤဘၣ် တၢ်အကဒုကစၢၢ်အတြီၤလာ်တဖၣ်အပူၤအကတီၢ်န့ၣ်, ပဃုထံၣ်န့ၢ်တၢ်ကပီၤ အဂံၢ်ထံးကသ့ ဖဲတၢ်လီၢ်မတၤလဲၣ်. ၁ ယိၤ ၁:၅ အပူၤ တၢ်မၢဖိစီၤယိၤဟၣ် ဒုးသ့ၣ်ညါပှၤလၢ “ယွၤမ့ၢ်တၢ်ကပီၤ, ဒီးတၢ်ခံးတအိၣ်ဘၣ်လၢအပူၤနီတမံၤဘၣ်” န့ၣ်လီၤ. ဒီးဖဲယိၤဟၣ် ၈:၁၂ အပူၤန့ၣ် ကစၢ်ယ့ၣ်ရှူးဘိးဘၣ်သ့ၣ်ညါဝဲလၢ “ယဲဒၣ်အံၤ, ယမ့ၢ်ဟီၣ်ခိၣ်အကပီၤလီၤ. ပှၤလၢ အပိာ်ယခံတဖၣ်န့ၣ်, တဟးဘၣ်ဝဲလၢတၢ်ခံးကျါဘၣ်, ဒီးကဒိးန့ၢ်ဘၣ် တၢ်မူအတၢ်ကပီၤလီၤ” န့ၣ်လီၤ.
ဒ်ပမ့ၢ်ပှၤစူၢ်က့ၤနာ်က့ၤ ကစၢ်ယ့ၣ်ရှူးအဃိ, ဒ်စံး ၈၉:၁၅ ပာ်ဖျါဝဲအသိး, ပလဲၤတၢ်လၢယွၤ အမဲာ်အတၢ်ကပီၤအပူၤန့ၣ်လီၤ. ဖဲလၢပလဲၤခီဖျိဘၣ် တၢ်အကဒုလၢ အခံးကတၢၢ်တဖၣ်အပူၤဒၣ်လဲာ်, ကစၢ်ယွၤကအိၣ်ဒီးပှၤ, ဒီးကမ့ၢ် ပတၢ်ကပီၤအဂံၢ်ထံး လၢပဂီၢ်အဂ့ၢ်န့ၣ်, အၢၣ်လီၤတ့ၢ် ဝဲဒၣ်န့ၣ်လီၤ.
