ဖဲလၢယဟးမုၢ်ဂီၤကတီၢ်, မုၢ်တၢ်ကပီၤဆဲးကပြုၢ်လီၤလၢ မံၣ်ရှံၣ်ကၣ် (Michigan) နိၣ်ဖးဒိၣ် အထံဖံးခိၣ်, မ့ၢ်တၢ်လၢအဖျါဃံဖျါလၤ, ထုးသူၣ်ထုးသးန့ၣ်လီၤ. မ့ၢ်လၢယအဲၣ်ဒိးဒိတၢ်ဂီၤဖိတဘ့ၣ်အဃိ ဖဲယကတဲာ် ကတီၤ ယခဲမရၣ် အကတီၢ် ယတဲယတံၤသကိးလၢ ကအိၣ်ခိးဘၣ်ယၤန့ၣ်လီၤ. မ့ၢ်လၢ မုၢ်တၢ်ကပီၤ ဆဲးကပြုၢ်အဃိ, တချုးယဒိဘၣ် တၢ်ဂီၤအံၤဝံၤန့ၣ် လၢယကွဲၢ်ဒီနၢ် အမဲာ်သၣ်ပူၤ ယတထံၣ်တၢ်ဂီၤက့ၢ်ဂီၤ ဘၣ်ဆၣ်, ဒ်ယဒိယဲတၢ်ဂီၤတဖၣ်လၢအပူၤကွံာ်အသိး, ယသ့ၣ်ညါလၢ တၢ်တဘျီအံၤ ကဒုးအိၣ်ထီၣ် တၢ်ဂီၤအဂ့ၤကတၢၢ်တဘ့ၣ်န့ၣ်လီၤ. ယတဲဘၣ် ယတံၤသကိးလၢ “အခဲအံၤ တၢ်ဂီၤတဖျါဘၣ်ဆၣ် တၢ်ဂီၤဒ်သိးအံၤတဖၣ် ထီဘိ တၢ်ဂီၤဟဲထီၣ်ဂ့ၤဝဲသပှၢ်တၢၢ်န့ၣ်လီၤ.”
တၢ်စူၢ်တၢ်နာ်အတၢ်လဲၤ လၢပတၢ်အိၣ်မူအံၤ, တလီၢ်လီၢ်န့ၣ် လီၤဂာ်ဒ်သိးပဒိတၢ်ဂီၤဖိအံၤန့ၣ်လီၤ. ထီဘိန့ၣ် တၢ်ဟဲဖျါလၢ ကွဲၢ်ဒီနၢ်/ ခဲမရၣ် အမဲာ်သၣ်လိၤတဖၣ်, နတထံၣ်တၢ်လီၤတံၢ်လီၤဆဲးဘၣ်ဆၣ်, တၢ်အခီပညီတမ့ၢ်လၢ တၢ်ဂီၤအဂ့ၤတအိၣ်လၢအပူၤဘၣ်န့ၣ်လီၤ. နတထံၣ် ကစၢ်ယွၤမၤတၢ်တဖၣ် ဘၣ်ဆၣ်, ထီဘိနနာ်န့ၢ်အီၤသ့လၢ ယွၤအိၣ်ဝဲဖဲန့ၣ်န့ၣ်လီၤ. ဧ့ၤဘြံၤ ၁၁:၁ အပူၤ ဒ်ပှၤကွဲးလံာ်ဧ့ၤဘြံၤ ပာ်ဖျါဝဲအသိး “ဒီးတၢ်စူၢ်တၢ်နာ် မ့ၢ်တၢ်မုၢ်လၢ်န့ၣ် အတၢ်သန့ၤပသးဒီး တၢ်လၢပတထံၣ်ဘၣ်တဖၣ် အတၢ်သ့ၣ်ညါလီၤ” န့ၣ်လီၤ. ခီဖျိလၢတၢ်နာ်န့ၣ်, ပပာ်ထီၣ် ပတၢ်နာ်န့ၢ်လီၤသးလၢကစၢ်ယွၤ, ဃုာ်ဒီးတၢ်အုၣ်ကီၤ လၢကစၢ်ယွၤအပူၤ- လီၤဆီဒၣ်တၢ်, တၢ်လၢယွၤမၤဝဲတဖၣ် ပမ့ၢ်တထံၣ် မ့တမ့ၢ် ပမ့ၢ်တနၢ်ပၢၢ် ဒံးဘၣ်ဒၣ်လဲာ်န့ၣ်လီၤ.
ခီဖျိလၢတၢ်နာ်န့ၣ်, တၢ်လၢပတထံၣ်ဒံးဘၣ်တၢ်တဖၣ်န့ၣ် တမ့ၢ်တၢ်လၢ အတြီၤဃၢ်ပှၤလၢ “ပကဒိတၢ်ဂီၤ” အဂီၢ်ဘၣ်န့ၣ်လီၤ. တၢ်အံၤကမ့ၢ် တၢ်လၢပကဘၣ်ဃ့ထုကဖၣ်အါထီၣ် ဒီးဃုထံၣ်န့ၢ် ကစၢ်ယွၤအတၢ်နဲၣ်ကျဲန့ၣ်လီၤ. အဆၢဖိ ၄-၁၂ အပူၤပကထံၣ်ဘၣ် ပသန့ၤထီၣ်ပသးသ့ ခီဖျိပသ့ၣ်ညါ ဖဲလၢအပူၤကွံာ် ပှၤလဲၤတၢ်လၢတၢ်နာ်တဖၣ် အတၢ်လဲၤခီဖျိအပူၤဃုာ်ဒီး ပနီၢ်တဂၤ အတၢ်ဂ့ၢ်တၢ်ကျိၤ တဖၣ်အပူၤစ့ၢ်ကီးန့ၣ်လီၤ. တၢ်လၢအပူၤကွံာ် ကစၢ်ယွၤမၤတ့ၢ်လံတဖၣ်န့ၣ် ကမၤကဒီးဝဲဒၣ်စ့ၢ်ကီး န့ၣ်လီၤ.
