အဆိကတၢၢ် တၢ်လၢယပာ်သူၣ်ပာ်သးဘၣ် ဝ့ၢ်ဖးဒိၣ်အံၤ မ့ၢ်တၢ်တၤကျိၤတၤစ့အလီၢ်တဖၣ်န့ၣ်လီၤ. တၢ်အဂၤလၢယထံၣ်မ့ၢ် ကျးလၢအဆါညါဖီတဖၣ်, ကျးလၢပှၤဆါပိးလီၤလၢ ဝံဝာ်ဒီတဒၢတၢ်ကလုာ်ကလိၤ တဖၣ်, ဒီးတၢ်ဘိးဘၣ်သ့ၣ်ညါ အဘ့ၣ်ဘၣ်ဖးဒိၣ် လၢပီၢ်ရီတဖၣ်ကဃုကျိၣ်စ့ ခီဖျိလၢ ပှၤအတၢ်ဟဲဝံအၢ တဖၣ်အအိၣ်န့ၣ်လီၤ. တၢ်လၢအပူၤကွံာ်န့ၣ် ယလဲၤတုၤဝ့ၢ်ဖးဒိၣ်တဖၣ် လၢအပှဲၤဒီးပှၤမၤတၢ်ဒဲးဘးတဖၣ် န့ၣ်ဒီး, ဝ့ၢ်တဖျၢၣ်အံၤ အပတီၢ်ဖျါလၢ တၢ်လီၤသးဟးဂီၤကတၢၢ်န့ၣ်လီၤ.

ဘၣ်ဆၣ်, လၢခံတဂီၤ ဖဲယကတိၤတၢ်ဒီးပှၤနီၣ်သိလ့ၣ်ထဲးကစံၣ်တဂၤန့ၣ်ဒီး, ယသးပူၤတၢ်မၤအသး ဖျါဒ်သိးသးအတၢ်ထံၣ်ဟဲကပီၤထီၣ်ဝဲဒၣ်န့ၣ်လီၤ. အဝဲစံးဘၣ်ယၤ “ကိးမုၢ်နံၤဒဲး ယဃ့ထုကဖၣ်ကစၢ်ယွၤ ကဆှၢလီၤန့ၢ်ယၤ ပှၤလၢကစၢ်ယွၤအဲၣ်ဒိး လၢယကမၤစၢၤအီၤတဖၣ်, ပှၤလၢအသးစဲထီဒီးတၢ်တၤကျိၣ် တၤစ့, ပှၤဃုကျိၣ်စ့ခီဖျိဆါလီၤအီၣ်နီၣ်ခိတဖၣ်, ဒီးပှၤအိၣ်ဟဲလၢဟံၣ်ဒူၣ်ဃီထၢအလီၤမုၢ်လီၤဖးတဖၣ်, မ့ၢ်တဲဘၣ်ယၤအတၢ်ဂ့ၢ်ကီလၢမဲာ်ထံမဲာ်နိန့ၣ်ဒီး ယအိၣ်ပတုာ်သိလ့ၣ်, ယဒိကနၣ်အတၢ်ဂ့ၢ်ကီတဖၣ်, ဒီးယဃ့ထုကဖၣ်တၢ်လၢ အဝဲသ့ၣ်အဂီၢ်န့ၣ်လီၤ. တၢ်မၤအံၤမ့ၢ် ယတၢ်သးခုကစီၣ်အတၢ်မၤန့ၣ်လီၤ.”

ဖံလံးပံၤ ၂:၅-၈ အပူၤ ပှၤတၢ်မၢဖိစီၤပီလူးပာ်ဖျါထီၣ် ကစၢ်ယ့ၣ်ရှူး အတၢ်ဟဲလီၤဆူပဟီၣ်ခိၣ်ချၢ လၢအလီၤတဲာ်ကွံာ်လၢတၢ်ဒဲးဘးန့ၣ်ဒီး, ဟ့ၣ်ဂံၢ်ဟ့ၣ်ဘါ ပှၤစူၢ်က့ၤနာ်က့ၤကစၢ်ယ့ၣ်ရှူးခရံာ်တဖၣ် တၢ်လၢကဘၣ်မၤဝဲတဖၣ်န့ၣ်လီၤ. အဆၢဖိ ၁၃ န့ၣ်စံးဝဲ မၤတၢ်လၢအဘၣ်ယွၤအသး, ဒီးအဆၢဖိ ၁၆ န့ၣ် ပမ့ၢ်ဟံးဃာ် “တၢ်မူကလုၢ်”-တၢ်သးခုကစီၣ်န့ၣ်ဒီး. အဆၢဖိ ၁၅ န့ၣ်စံးဘၣ်ပှၤလၢ ပကမ့ၢ်ယွၤအဖိ လၢအတၢ်ကမၣ်တအိၣ်ဘၣ်, လၢပှၤသူၣ်က့ၣ်သးက့ၣ်, သူၣ်ကီၤသးကီတစိၤအကျါ, ဒ် “တၢ်ကပီၤ တဖၣ်လၢဟီၣ်ခိၣ်ချၢအသိး” န့ၣ်လီၤ. ဒ်ပှၤနီၣ်သိလ့ၣ်ထဲးကစံၣ်တဂၤအသိး, ပကဘၣ်မ့ၢ်ပှၤလၢ အဟဲစိာ် ကစၢ်ယ့ၣ်ရှူးအတၢ်ကပီၤ ဆူဟီၣ်ခိၣ်လၢအခံးသူအပူၤအဂီၢ်န့ၣ်လီၤ.

ပှၤကူၣ်သ့လၢတၢ်စံၣ်စိၤတဲစိၤ ခရံးစတိၣ်ဖၢၣ် ဒီၣ်စၢၣ် (Christopher Dawson)စံးဝဲ, “ပှၤလၢအစူၢ်က့ၤနာ်က့ၤခရံာ်တဂၤ ဒ်သိးကဆီတလဲကွံာ်ဟီၣ်ခိၣ်အဂီၢ်န့ၣ် အလီၢ်အိၣ်ဒၣ်ထဲတမံၤဧိၤ လၢကအိၣ်မူတီတီလိၤလိၤဒီးယွၤ န့ၣ်လီၤ. မ့ၢ်လၢတၢ်အိၣ်မူဒ်သိးအံၤန့ၣ် အိၣ်ပှဲၤဒီးတၢ်ခူသူၣ်ကိးမံၤလၢ တၢ်မူလၢယွၤဟ့ၣ်ဝဲ” အဃိ န့ၣ်လီၤ. မ်ပကဃ့သကိးတၢ်လၢ ကစၢ်ယွၤအသးစီဆှံ ကဟ့ၣ်ဂံၢ်ဟ့ၣ်ဘါပှၤလၢ ပကအိၣ်မူအိၣ်ဂဲၤတီတီလိၤလိၤ ဒ်ကစၢ်ယ့ၣ်ရှူးအပှၤဂီၢ်မုၢ် လၢအဒုးကပီၤထီၣ်အတၢ်ကပီၤ လၢဟီၣ်ခိၣ်အတၢ်လီၢ်တဖၣ် လၢအခံးသူကတၢၢ်န့ၣ်တက့ၢ်.