လၢနံၣ်သ့ၣ်တဖၣ်အတီၢ်ပူၤန့ၣ်, တၢ်အိၣ်ဖှိၣ်အပူၤ ကၠီ(န) (John) ကဲတ့ၢ်ဝဲတၢ်သးတံၢ်တာ်ဒိၣ်မးတမံၤ လၢပှၤအဂီၢ်န့ၣ်လီၤ. အဝဲမ့ၢ်ပှၤတဂၤလၢ အသူၣ်အၢသးသီ, လိၣ်ဘၣ်တၢ်အါမး, ဒီးတလီၢ်လီၢ် မ့ၢ်ပှၤလၢ အရၢၢ်အစၢၢ်န့ၣ်လီၤ. အဝဲအ့စူၢ်အ့န့ ဘၣ်ထွဲဒီး ပှၤတဟ့ၣ်ဒုးအီၣ်ဒုးအီအီၤဂ့ၤဂ့ၤဘၣ်ဘၣ်, ဒီးစံးကတိၤ ဒုၣ်ဒွဲၣ်ဝဲ ပှၤလၢအမၤ မုၢ်သးမၤကလီၤတၢ်တဖၣ်, ဒီး ပှၤမၤတၢ်ဖိတဖၣ် တမၤလၢပှဲၤမူဒါဂ့ၤဂ့ၤဘၣ်န့ၣ်လီၤ. ပမ့ၢ်ဘၣ်စံးကတိၤတီတီန့ၣ်, အဝဲမ့ၢ်ပှၤတဂၤလၢ ပကဘၣ်အဲၣ်အီၤအဂီၢ် ကီဒိၣ်မးန့ၣ်လီၤ.

လၢတၢ်န့ၣ်အဃိ ဖဲယနၢ်ဟူ အဝဲတူၢ်ဘၣ် ခဲစၢၣ်တၢ်ဆါ (cancer)န့ၣ်ဒီး, ယကဃ့ဘါထုကဖၣ်တၢ် လၢအဂီၢ်, ကဲထီၣ်တၢ်ကီတၢ်ခဲလၢယဂီၢ်န့ၣ်လီၤ. အတၢ်ကတိၤတမုာ်တလၤတဖၣ် ဒီးအသကဲးပဝာ် တဆဲးတလၤတဖၣ် အိၣ်ပှဲၤလၢယသးပူၤန့ၣ်လီၤ. ဘၣ်ဆၣ်ယသ့ၣ်နီၣ်ထီၣ် ကစၢ်ယ့ၣ်ရှူးအတၢ်ကိးပှၤ လၢပကဘၣ်အဲၣ်တၢ်အဃိ, ကိးမုၢ်နံၤန့ၣ် ယဃ့ဘါထုကဖၣ်တၢ်ကဆှီဒီဖိ လၢ ကၠီ(န) အဂီၢ်န့ၣ်လီၤ. မုၢ်နံၤမုၢ်သီလဲၤပူၤကွံာ်ဝံၤ, ယပာ်သူၣ်ပာ်သးလၢ ဘၣ်ထွဲဒီး ကၠီ(န) အကံၢ်အစီတဖၣ် လၢအတဘၣ်သူၣ် ဘၣ်သးယၤ လၢယထံၣ်ဆိကမိၣ်တဖၣ်န့ၣ် ဆံးလီၤစှၤလီၤဝဲန့ၣ်လီၤ. ယဆိကမိၣ်အဝဲကတူၢ်ဘၣ်တၢ် နီၢ်နီၢ်န့ၣ်လီၤ. ဘၣ်သ့ၣ်သ့ၣ် အဝဲကဆိကမိၣ်လၢ အတၢ်မုၢ်လၢ်လီၤမၢ်နီၢ်နီၢ်လံန့ၣ်လီၤ.

ယသ့ၣ်ညါထံက့ၤလၢ တၢ်ထုကဖၣ်အိးထီၣ်ဒုးနဲၣ် ပနီၢ်ကစၢ်အတၢ်မ့ၢ်တၢ်, ပသးတူၢ်ဘၣ် ခီၣ်ဘၣ်တၢ်, ဒီးပတၢ်ဘၣ်ထွဲလိာ်သးဒီးပှၤဂၤ ဆူကစၢ်ယွၤအအိၣ်, ဒီးပျဲကစၢ်ယ့ၣ်ရှူး ကဟဲနုာ်ဟဲစိာ် အတၢ်ထံၣ်တၢ်ပာ်သူၣ်ပာ်သး ဆူတၢ်ခဲလၢာ် လၢပစံးဘၣ်တဲဘၣ်အီၤတဖၣ်န့ၣ်လီၤ. တၢ်ဟ့ၣ်လီၤအးလီၤ တၢ်လၢပသးအိၣ်မၤတၢ်, ဒီးပသးအတၢ်တူၢ်ဘၣ်ခီၣ်တၢ်တဖၣ် ဆူအအိၣ်ခီဖျိလၢတၢ်ထုကဖၣ်အံၤ မ့ၢ်ဒၣ် ပပျဲသးစီဆှံ ကဆီတလဲပသူၣ်ပသး ကယီကယီ ဒီးသပှၢ်ကတၢၢ်အဂီၢ်န့ၣ်လီၤ. ကစၢ်ယ့ၣ်ရှူးအတၢ်ကိး လၢပကဘၣ်အဲၣ်ပဒုၣ်ပဒါအံၤ ဘၣ်တၢ်စၢတ့ၢ်ဃးအသးဃံးဃံး, ဒီးတၢ်လၢပကဘၣ်ထုကဖၣ်တၢ်အံၤ ဖျါလၢ လူၤ ၆:၂၈ အပူၤ “ပှၤလၢအကတိၤတရီတပါ သုတဖၣ်န့ၣ်, ဘါထုကဖၣ်န့ၣ်အဂီၢ်တက့ၢ်” န့ၣ်လီၤ.

တုၤအကတီၢ်အံၤဒၣ်လဲာ် ယကဘၣ်ထံၣ် ကၠီ(န) လၢတၢ်အဂ့ၤတကပၤအဂီၢ် ယဘၣ်ဂုာ်ကျဲးစၢး အဖဲမုၢ်လီၤန့ၣ် ယဘၣ်အၢၣ်လီၤယသးန့ၣ်လီၤ. ဘၣ်ဆၣ်ဒီး ခီဖျိလၢသးစီဆှံအတၢ်မၤစၢၤအပူၤ, ဒ်သိးယကထံၣ် ကၠီ(န) ခီဖျိလၢကစၢ်ယွၤအမဲာ်ချံ, ဒီးခီဖျိလၢယွၤအသူၣ်အသး- ဒ်အမ့ၢ်ပှၤတဂၤ လၢကဘၣ်တၢ်ပျၢ်အတၢ်ကမၣ်, ဒီးကဘၣ်တၢ်အဲၣ်အီၤန့ၣ် ယမၤလိန့ၢ်ဘၣ်လံန့ၣ်လီၤ.